வெந்நீர் ஹீட்டருக்குள் இவ்வளவு அழுக்கு இருக்கிறதா... கரண்ட் பில் எகிற இதுதான் காரணம்!

குளிர்காலம் வந்தாலே நம் வீடுகளில் வாட்டர் ஹீட்டர்களின் பயன்பாடு அதிகரித்துவிடுகிறது. காலை வேளையில் சுடுநீரில் குளிப்பது உடலுக்குப் புத்துணர்ச்சியைத் தரும். நாம் தினசரி பயன்படுத்தும் இந்தச் சாதனத்தை முறையாகப் பராமரிக்கிறோமா என்றால் இல்லை என்றே சொல்ல வேண்டும். 

கார் அல்லது பைக்கை சர்வீஸ் செய்வதைப் போல, வாட்டர் ஹீட்டரையும் குறிப்பிட்ட கால இடைவெளியில் சுத்தம் செய்ய வேண்டியது அவசியம். அப்படிச் செய்யாவிட்டால், அது அதிக மின்சாரத்தை இழுப்பதோடு மட்டுமல்லாமல், விரைவிலேயே பழுதாகிவிடும் அபாயமும் உள்ளது. நமக்குத் தெரியாமலே ஹீட்டருக்குள் நடக்கும் மாற்றங்களையும், அதைச் சரிசெய்யும் முறைகள் பற்றியும் தெரிந்து கொள்ளலாம் வாங்க. 

ஹீட்டரின் எதிரி!

நாம் பயன்படுத்தும் தண்ணீரில் இயற்கையாகவே தாது உப்புக்கள் மற்றும் மண் துகள்கள் கலந்துள்ளன. வாட்டர் ஹீட்டர் தொடர்ந்து செயல்படும்போது, இந்தத் துகள்கள் வெப்பத்தின் காரணமாகப் பிரிந்து, தொட்டியின் அடிப்பகுதியில் வண்டலாகப் படியத் தொடங்குகின்றன. நாட்கள் செல்லச் செல்ல இந்த வண்டல் ஒரு கெட்டிப் படலமாக மாறிவிடும். இது வெப்பமூட்டும் கம்பிக்கும் தண்ணீருக்கும் இடையே ஒரு சுவர் போலச் செயல்படும். இதனால் தண்ணீர் சூடாவதற்கு அதிக நேரம் எடுக்கும். விளைவு, உங்கள் மின்சாரக் கட்டணம் தாறுமாறாக உயரும்.

எச்சரிக்கை!

உங்கள் ஹீட்டரைச் சுத்தம் செய்ய வேண்டிய நேரம் வந்துவிட்டது என்பதைச் சில அறிகுறிகள் மூலம் தெரிந்துகொள்ளலாம். ஹீட்டரை ஆன் செய்தவுடன் அதிலிருந்து பாப்கார்ன் பொரிவது போலவோ அல்லது கடகடவென்ற சத்தமோ வந்தால், உள்ளே அதிக அளவு வண்டல் படிந்துள்ளது என்று அர்த்தம்.

அதேபோல, குழாயில் வரும் வெந்நீர் நிறம் மாறித் துருப்பிடித்ததைப் போலச் செந்நிறமாக வந்தால், ஹீட்டரின் உள்பகுதி அரிக்கப்பட்டுள்ளது என்பதைக் குறிக்கிறது. சில நேரங்களில் தண்ணீரில் அழுகிய முட்டை வாசனை வீசக்கூடும். இது தொட்டிக்குள் பாக்டீரியாக்கள் வளர்ந்திருப்பதன் அறிகுறியாகும். வெந்நீர் வருவதற்கு வழக்கத்தை விட அதிக நேரம் எடுத்துக்கொண்டாலும் நாம் உஷாராக வேண்டும்.

சுத்தம் செய்யும் முறை!

இதைத் தாங்களே சுத்தம் செய்வது ஒன்றும் பெரிய கம்ப சூத்திரம் இல்லை. முதலில் ஹீட்டருக்கான மின் இணைப்பு மற்றும் எரிவாயு இணைப்பைத் துண்டிக்க வேண்டும். குளிர்ந்த நீர் உள்ளே செல்லும் வால்வை மூடிவிட வேண்டும். பின்னர் ஹீட்டரின் அடிப்பகுதியில் உள்ள டிரைன் வால்வில் ஒரு டியூப்பை இணைத்து, மறுமுனையை ஒரு பக்கெட் அல்லது சிங்க்கில் விட வேண்டும். இப்போது சுடுநீர் வரும் குழாயைத் திறந்து காற்றழுத்தத்தை வெளியேற்றிவிட்டு, டிரைன் வால்வைத் திறந்தால் உள்ளே தேங்கியுள்ள அழுக்கு நீர் முழுவதும் வெளியேறிவிடும்.

ஆறு மாதங்களுக்கு ஒருமுறையோ அல்லது வருடத்திற்கு ஒருமுறையோ இதைச் செய்வது நல்லது. உங்கள் பகுதியில் உப்புத் தண்ணீர் அதிகமாக இருந்தால், ஆறு மாதங்களுக்கு ஒருமுறை செய்வது கட்டாயமாகும். வசந்த காலம் அல்லது இலையுதிர் காலத்தில் இதைச் செய்வது சிறந்தது. இப்படிச் செய்வதன் மூலம் ஹீட்டரின் ஆயுட்காலம் மூன்று முதல் ஐந்து ஆண்டுகள் வரை அதிகரிக்கும்.

வாட்டர் ஹீட்டர் என்பது அதிக விலை கொடுத்து வாங்கும் ஒரு வீட்டு உபயோகப் பொருள். அதைச் சரியான முறையில் பராமரிப்பது நம் கடமை. வெறும் பத்து நிமிடங்கள் செலவழித்துச் சுத்தம் செய்வதன் மூலம், ஆயிரக்கணக்கில் செலவாகும் பழுதுபார்ப்புச் செலவை மிச்சப்படுத்தலாம்.