ஒரு வேலையை சீக்கிரம் முடிக்கணுமா.. இந்த 10 மணிநேர விதியை ட்ரை பண்ணுங்க!

நாம் ஒரு புதிய வேலையை செய்ய நினைக்கும்போது அதற்காக நிறைய நேரம் எடுத்துக்கொள்வது வழக்கம். ஒரு வாரத்தில் முடிக்க வேண்டிய வேலையை கடைசி நாள் வரை இழுத்தடிப்பது சாதாரண மனித இயல்பு. இந்த பழக்கத்தை மாற்றி வெற்றியின் உச்சிக்கு நகர உதவும் ஒரு சூப்பரான தந்திரம் தான் 10 மணிநேர விதி (10-Hour Rule). கெடு தேதிகள் அதாவது Deadlines எப்படி நமது வெற்றிக்கான ரகசிய ஆயுதமாக செயல்படுகிறது என்பதை இந்தப் பதிவில் பார்க்கலாம்.

வேலையின் அளவும் நேரமும்!

பொதுவாக ஒரு வேலையை முடிக்க நமக்கு எவ்வளவு நேரம் கொடுக்கப்படுகிறதோ அந்த வேலை அத்தனை நேரத்தையும் கட்டாயம் எடுத்துக்கொள்ளும். இதை பார்கின்சன் விதி (Parkinson's Law) என்று கூறுவார்கள். அதாவது ஒரு சிறு வேலையை முடிக்க ஒரு மாதம் நேரம் கொடுத்தால், அந்த வேலை ஒரு மாதம் முழுவதையும் இழுத்தடிக்கும்.

ஆனால், அதே வேலையை வெறும் பத்து மணிநேரத்தில் முடிக்க வேண்டும் என்று உங்களுக்கு நீங்களே ஒரு கடுமையான கெடு விதித்துக்கொண்டால் உங்களின் மூளை அபாரமாக செயல்பட தொடங்கும்.

பள்ளி மற்றும் கல்லூரி!

உதாரணமாக பள்ளி அல்லது கல்லூரி நாட்களில் தேர்வு வருவதற்கு பல மாதங்கள் இருக்கும்போதே நாம் படிக்க ஆரம்பிக்க மாட்டோம். நாட்கள் செல்ல செல்ல நமது சோம்பேறித்தனமும் அதிகரித்துக்கொண்டே போகும். ஆனால் தேர்வுக்கு முந்தைய நாள் இரவு, மொத்த பாடத்தையும் ஒரே மூச்சில் படித்து முடிக்கும் ஒரு மாயாஜாலம் நம்மிடம் நடக்கும். 

இதற்குக் காரணம் அந்த ஒரு நாள் கெடு தான். இந்த 10 மணிநேர விதி அதே தந்திரத்தை தான் நமது அன்றாட வேலையிலும் மிக சிறப்பாக செயல்படுத்துகிறது. உங்களுக்கு கொடுக்கப்பட்ட ஒரு பெரிய ப்ராஜெக்ட்டை பத்து மணிநேரத்தில் முடிக்க வேண்டும் என இலக்கு நிர்ணயித்தால் உங்கள் வேகம் பல மடங்கு அதிகரிக்கும்.

கவனச்சிதறல் இல்லாத கவனம்!

நீங்கள் இந்த பத்து மணிநேர இலக்கை நிர்ணயிக்கும் போது தேவையற்ற கவனச்சிதறல்களுக்கு உங்கள் மனதில் இடமிருக்காது. சமூக வலைத்தளங்களை பார்ப்பது மற்றும் அரட்டை அடிப்பது போன்ற விஷயங்களை மூளை தானாகவே தவிர்த்துவிடும். முக்கியமாக அனைத்தையும் பெர்ஃபெக்ட்டாக செய்ய வேண்டும் என்ற எண்ணம் மறைந்து, வேலையை எப்படியாவது குறிப்பிட்ட நேரத்திற்குள் முடிக்க வேண்டும் என்ற உத்வேகம் பிறக்கும்.

குறைவான நேரம் இருக்கும் போது நமது முழு கவனமும் அந்த குறிப்பிட்ட வேலையின் மீது மட்டுமே குவியும். இதனால் பல நாட்களாக இழுத்தடித்த ஒரு வேலையை கூட உங்களால் ஒரே நாளில் மிக எளிதாக சாதித்து காட்ட முடியும்.

எப்படி செயல்படுத்துவது?

இந்த அருமையான விதியை உங்கள் அன்றாட வாழ்வில் மிக எளிதாக பயன்படுத்தலாம். ஒரு பெரிய வேலையை ஒட்டுமொத்தமாக பார்த்து மலைக்காமல், அதனை சிறுசிறு பகுதிகளாக பிரித்துக்கொள்ளுங்கள். உதாரணத்திற்கு ஒரு பெரிய புத்தகத்தை எழுதி முடிக்க வேண்டும் என்றால், தினமும் இரண்டு மணி நேரம் ஒதுக்கி ஐந்து நாட்களில் அதனை முடிக்க வேண்டும் என திட்டமிடுங்கள். 

இந்த கெடு நெருங்க நெருங்க உங்களின் வேகம் தானாகவே அதிகரிக்கும். உங்களை நீங்களே தொடர்ந்து சவாலுக்கு உட்படுத்துவது மாபெரும் வெற்றிக்கான பாதையை அமைத்து கொடுக்கும். உங்களைச் சுற்றியுள்ளவர்கள் ஆச்சரியப்படும் அளவிற்கு உங்களின் வேலைத்திறன் பெருகும்.

நேரம், நம் கைகளில் இருக்கும் மிகப்பெரிய ஆயுதம். அந்த நேரத்தை சரியாக கட்டுப்படுத்தி, 10 மணிநேர விதி போன்ற ஸ்மார்ட்டான தந்திரங்களை பயன்படுத்தினால் உங்களின் வெற்றி நூறு சதவீதம் உறுதி. எந்த ஒரு வேலையாக இருந்தாலும் சரி அதற்கான ஒரு உறுதியான டெட்லைனை நிர்ணயித்து இன்று முதலே செயல்படத் தொடங்குங்கள்.