ZEN வழியில் சந்தோஷமாக இருக்க 3 எளிய வழிகள்!

சந்தோஷம்... இதை தேடி தான் நிறைய பேர் ஓடிட்டு இருக்கோம். ஆனா அது ஏதோ பெரிய விஷயம், ரொம்ப கஷ்டப்பட்டு அடையணும்னு நிறைய பேர் நினைக்கிறோம். நிஜத்துல, சந்தோஷம் ஒன்னும் பெரிய விஷயம் இல்லைங்க. குறிப்பா, ஜென் தத்துவம் சொல்லித்தர சில விஷயங்கள் ரொம்ப சிம்பிளா, நாம இருக்குற இடத்துல இருந்தே சந்தோஷமா இருக்க உதவும். அதுக்கு ரொம்ப மெனக்கெடணும்னு அவசியம் இல்ல. ஒரு சின்ன மனமாற்றம் போதும். 

'இப்போ இருக்குற மொமெண்ட்டை கவனிங்க'. நம்ம மனசு எப்பவும் கடந்த காலத்துல நடந்ததையோ இல்லன்னா எதிர்காலத்துல என்ன ஆகுமோனு தான் அலைபாயும். இதனால இருக்குற நிம்மதியும் போயிடும். ஜென் சொல்றது என்னன்னா, உங்க கவனத்தை இப்போ, இந்த நிமிஷத்துல கொண்டு வாங்க. நீங்க இப்போ என்ன செஞ்சிட்டு இருக்கீங்க, உங்க மூச்சு காத்து உள்ளே போயிட்டு வெளியில வர்றதை கவனிங்க. சிம்பிளா இருக்குறதை கவனிச்சா போதும். இது மனசுல இருக்குற தேவையற்ற பாரத்தை குறைச்சு, ஒருவித அமைதியைக் கொடுக்கும்.

'நடக்குற விஷயங்களை அப்படியே ஏத்துக்கோங்க'. நம்ம வாழ்க்கைல சில விஷயங்கள் நாம நினைக்கிற மாதிரி நடக்காது. அப்போ அத எதிர்த்து சண்டை போடுவோம், வருத்தப்படுவோம். ஆனா இதனால நமக்கு தான் கஷ்டம். ஜென் என்ன சொல்லுதுனா, நடக்கிற விஷயங்களை 'இது இப்படித்தான் இருக்கு'னு அப்படியே ஏத்துக்கோங்க. அது நல்லது கெட்டதுனு உடனே முத்திரை குத்தாதீங்க. உணர்வுகளை உணருங்க, ஆனா அதுலயே மூழ்கி போயிடாதீங்க. இந்த ஏற்றுக்கொள்ளும் மனப்பான்மை, தேவையற்ற போராட்டங்களை குறைச்சு, மன நிம்மதியைத் தரும்.

'சின்ன சின்ன விஷயங்கள்ல சந்தோஷத்தை கண்டுபிடிங்க’. சந்தோஷம்னா பெரிய பங்களா, கார், நிறைய பணம்னு ஏதோ வெளியில இருக்குற பொருள்ல தான் இருக்குனு தேடி ஓடுறோம். ஆனா, நிஜமான சந்தோஷம் ரொம்ப பக்கத்துல, சின்ன சின்ன விஷயங்கள்ல கூட இருக்கு. காலையில குடிக்கிற ஒரு கப் காபி, செடியில் பூத்திருக்கும் ஒரு அழகான பூ, குழந்தையோட சிரிப்பு, இது எல்லாத்துலயும் சந்தோஷம் இருக்கு. இதையெல்லாம் கவனிக்க ஆரம்பிங்க. 

அதே சமயம், உங்களோட மனசுல தேவையற்ற பயம், கவலை, கடந்த கால கசப்பான நினைவுகள்னு தேவையில்லாத பாரத்தை விட்டுடுங்க. உங்க சுத்தி இருக்குற இடத்தையும் சிம்பிளா வச்சுக்கோங்க. இது உங்க வாழ்க்கையை எளிமையாக்கி, இருக்குறதுல மகிழ்ச்சி அடைய உதவும்.