கடமையை மனப்பூர்வமாகச் செய்தால் எதுவும் சாத்தியமே!

வானிலிருந்து ஊசிபோல் விழும் சிறு சிறு மழைத்துளிகள்தானே விஸ்வரூபம் எடுத்து நதியாக மாறுகிறது என்பதை உணர்ந்து, நாம் செய்யும் சிறு சிறு செயல்களைக் கூட அலட்சியப் படுத்தாமல், நாளை அவைகள் ஒன்றினைந்து, நம் வாழ்க்கையில் வெற்றி என்னும் விஸ்வரூபம் எடுத்து உயர்ந்த நிலைக்கு இட்டுச் செல்லும் என்பதை உணருவோம்.

சாமானிய மக்களாகிய நாம் மழை போன்ற வாழ்க்கையை வாழ்வோம். மழை நதியாக பரிணமித்து, ஓடும் இடங்களில் எல்லாம் சிறப்பு சேர்த்து, கடலுக்குள் சங்கமமாகிறது. மனிதர்கள் ஆகிய நாமும், நல்ல சிந்தனகளை விதைத்து, ஆற்றும் கரங்கள் சிறந்து, நம் வாழ்க்கையை அர்ப்பணித்து, பாரத மண்ணுக்கு வலுவான கட்டமைப்பை உருவாக்கி, வளர்ச்சிப் பாதையில் தடம் பதிக்க முயற்சி செய்வோம்.

அதற்கு நம்முடைய உள்ளமும் சிந்தனையும் தெளிவாக இருக்க வேண்டும். செயலில் தன்னம்பிக்கை, உழைப்பில் உறுதியாக இருந்தால், நம்மை வீழ்த்தி நினைக்கும் சக்திகள், தானே வீழ்ந்து போகும் என்பதை புரிந்து செயல் ஆற்றுவோம்.

உழைப்பு இல்லையேல், உயர்வு இல்லை. உயர்வு இல்லையேல் வாழ்க்கை இல்லை என்பது பொதுவான கருத்து இல்லை. நம் மனித குலத்துக்கு ஏற்புடைய கருத்து. ஆறறிவு படைத்த நமக்கு முதல் படி கற்பது, இரண்டாவதுபடி உழைப்பது. இந்த இரண்டு படிகளை கடந்து செல்லும் வாழ்க்கைதான், மனித தன்மையோடு விளங்கி, தன்னிலும், பொதுவிலும் தன்னிகரற்ற உயர்வான இடத்திற்கு இட்டுச் செல்கிறது.

அடுத்தவர் நம்மை புகழவேண்டும் என்பதற்காக, ஒருபோதும் நம் செயல்கள் இருக்கக் கூடாது. நம்மை செம்மைப்படுத்தவும், அதற்கான அங்கீகாரமாகவும் இருக்கவேண்டும் என்பதில் உறுதியாக இருந்தால் தான், நம்முடைய வாழ்க்கை உயர்வாக செதுக்கப் படும்.  அதன்படி வாழ்ந்து, வாழ்க்கை பயணத்தை அர்த்தமுள்ளதாக ஆக்க பாடுபடுவோம்.

வாழ்க்கையில் பொறாமை நோய் பற்றினால், தன்மானம் நம்மிடம் இருந்து நிரந்தர விடுப்பு எடுத்துக்கொள்ளும். வஞ்சக நெருப்பை கையில் எடுத்தால், அது நம்மையே பதம் பார்க்கும். துரோகம் செய்யத் துணிந்தால், அது பூம்ராங் மாதிரி திருப்பி வீழ்த்தும். இவைகள் அனைத்தும் வீழ்த்தி, செம்மையாக வாழ்வதற்கு, எதிர்மறை சிந்திக்கும் எண்ணங்களை விட்டு, நேர்மறை எண்ணங்களுக்கு வலுவான பாதை அமைப்போம். அந்தப் பாதை நமக்கானது என்பதை உறுதி செய்வோம்.

நாம் ஏற்றுக்கொள்ளும் செயலை திறம்படச் செய்வதற்கு, சிந்தித்து ஊக்கமும் ஆக்கமும் சேர்ந்து, அதில் நேர்மையும், உண்மையும் கலந்து செயல் ஆற்றுவோம். கடமையை, கடமையாக செய்யாமல், மனப்பூர்வமாக செய்ய விரும்பி செய்தால், எதுவும் சாத்தியம் என்பதை செய்து காட்டுவோம்.

மனதை உயர்ந்த இலட்சியங்களில் அடித்தளம் இடுவோம். அதில் உயரிய சிந்தனையில் ஆற்றல் விதைப்போம். அவற்றை களப்பணியில் செயல்திறன் படைத்தது, வாழ்க்கையில் முன்னேற வழி தேடுவோம். மனித சக்திக்கு நிகர் வேறு எதுவும் இல்லை என்பதை புரிந்து கொண்டு, சிறப்பான முறையில் செயலாற்றி, வாழ்க்கை பயணத்தில், வெற்றி வாகை சூடுவோம்.

முயற்சி திருவினையாக்கும் என்ற பழமொழியை நினைவில் நிறுத்தி, அதற்கேற்ப வாழ்க்கையில் சிறக்க வாழ்ந்து காட்டி, மற்றவர்களுக்கு முன் மாதிரியாகவும், வழி காட்டியாகவும் விளங்குவோம்!