தினமும் சீக்கிரம் எந்திரிச்சு, வீட்ல சமைக்கிறீங்களா? ஐயோ, நீங்க ரொம்ப 'போரிங்'... ஆனா தப்பிச்சீங்க!

இப்போதைய சோஷியல் மீடியா உலகில், "வாழ்க்கைன்னா ஜாலியா இருக்கணும்", "ஒரே த்ரில்லா இருக்கணும்", "வாரா வாரம் பார்ட்டி பண்ணனும்" என்கிற ஒரு பிம்பம் நம் எல்லோர் மனதிலும் ஆழமாகப் பதிந்துவிட்டது. இதையெல்லாம் செய்யாமல், அமைதியாக, ஒழுக்கமாக ஒரு வாழ்க்கை வாழ்ந்தால், உடனே "என்னப்பா, உன் லைஃப் ரொம்ப 'போரிங்'ஆ இருக்கு!" என்று கிண்டல் செய்ய ஒரு கூட்டம் இருக்கும். 

ஆனால், அந்த "போரிங்" என்று சொல்லப்படும் வாழ்க்கைதான், உண்மையில் நம்மைப் பல பிரச்சனைகளிலிருந்து காப்பாற்றும் ஒரு கவசம். வாங்க, அந்த 'போரிங்' வாழ்க்கையின் அருமையைப் பற்றி கொஞ்சம் தெரிஞ்சுக்கலாம்.

ஏன் இந்த வாழ்க்கை 'போரிங்' என்று தோன்றுகிறது?

"போரிங்" வாழ்க்கை என்பது தினமும் விடியற்காலையில் சீக்கிரம் எழுந்திருப்பது, எழுந்து ஃபோனைப் பார்க்காமல், கொஞ்ச தூரம் நடைப்பயிற்சி செல்வது, காலை வெயில் உடலில் படும்படி நிற்பது, உடம்புக்கு கொஞ்சம் வேலை கொடுப்பது, கண்ட கண்ட ஃபாஸ்ட் ஃபுட்களை ஆர்டர் செய்யாமல், ஆரோக்கியமாக வீட்டில் சமைத்துச் சாப்பிடுவது, தண்ணி அடிப்பது போன்ற கெட்ட பழக்கங்களைக் குறைத்துக் கொள்வது. 

இவ்வளவுதான் அந்த 'பார்முலா'. இதில் எங்குமே உடனடி 'கிக்' இல்லை. ராத்திரி 2 மணி பார்ட்டியில் கிடைக்கும் போலி சந்தோஷமோ, பீட்சாவைச் சாப்பிடும்போது கிடைக்கும் உடனடி சுகமோ இதில் இல்லை. இங்கே இருப்பது ஒழுக்கம் மட்டுமே. இந்த ஒழுக்கம்தான் பலருக்கு "போரிங்" ஆகத் தெரிகிறது.

இந்த 'போரிங்' வாழ்க்கை எப்படி நம்மைக் காப்பாற்றுகிறது?

நாம் 'ஜாலி' என்று நினைத்துச் செய்யும் பல விஷயங்கள், நமக்குத் தெரியாமலேயே பல பிரச்சனைகளைக் கூடவே கூட்டி வருகின்றன. ஆரோக்கியமற்ற உணவு, உடற்பயிற்சியின்மை, தூக்கமின்மை... இவையெல்லாம் நேரடியாக நம் உடலை பாதிக்கிறது. இதனால் வரும் நோய்களுக்கும், மருத்துவமனைச் செலவுகளுக்கும் அளவே இருக்காது. 

இது உடல்ரீதியான பிரச்சனை என்றால், மனரீதியான பிரச்சனைகளும் ஏராளம். 'போரிங்' வாழ்க்கை என்று சொல்லப்படும் அந்த ஒழுக்கமான வாழ்க்கை, முதலில் நம் ஆரோக்கியத்தைக் காப்பாற்றுகிறது. காலையில் எழுந்து நடப்பதும், வெயிலில் நிற்பதும் மன அழுத்தத்தைக் குறைக்கிறது. வீட்டில் சமைக்கும்போது, தேவையற்ற கொழுப்பு, உப்பு குறைந்து, உடல் சீராகிறது. இதனால் மருத்துவமனை வாசலை மிதிக்க வேண்டிய அவசியமே குறைகிறது.

நிம்மதியே உண்மையான த்ரில்!

தண்ணி அடிப்பது போன்ற பழக்கங்களைக் குறைக்கும்போது, நம் பணமும் மிச்சமாகிறது, தேவையில்லாத சண்டைகள், மன உளைச்சல்களும் குறைகின்றன. குடும்பத்துடன் நேரம் செலவிடும்போது, உறவுகளுக்குள் பிணைப்பு அதிகமாகிறது. 

நாளைக்கு வயதான காலத்தில், நம்மைப் பார்த்துக்கொள்ள ஆள் இல்லாமல் தவிப்பதோ, அல்லது நோய்களுடன் போராடுவதோ போன்ற பெரிய பிரச்சனைகளிலிருந்து இந்த 'போரிங்' வாழ்க்கைதான் நம்மைக் காப்பாற்றுகிறது. சுருக்கமாகச் சொன்னால், நோய்கள், கடன், மன உளைச்சல், குடும்பப் பிரச்சனைகள் என, பிற்காலத்தில் வரக்கூடிய பல சிக்கல்களுக்கான கதவை, இந்த 'போரிங்' வாழ்க்கை இப்போதே மூடிவிடுகிறது.

இறுதியாக ஒன்று சொல்லிக்கொள்கிறேன். வாழ்க்கை என்பது ஒருநாள் கூத்து அல்ல; அது ஒரு நீண்ட பயணம். இன்றைய தற்காலிக 'த்ரில்'லுக்காக, நாளைய நீண்டகால நிம்மதியைப் பணயம் வைக்கக் கூடாது. அதனால், கொஞ்சம் 'போர்' அடித்தாலும் பரவாயில்லை, இந்த நிம்மதியான வாழ்க்கையை வாழ்ந்து பாருங்களேன்.