மணிக் கணக்குல செய்ய வேண்டிய வேலைய நிமிஷத்துல முடிக்கலாம் எப்படின்னு பாருங்க!

நாம் எல்லோருக்கும் வேலை என்றாலே ஒரு விதமான சலிப்பு தட்டுவது இயற்கை. காலையில் எழுந்ததும் அந்த வேலையை முடிக்க வேண்டுமே என்று நினைக்கும் போதே பாதி எனர்ஜி குறைந்துவிடும். ஆனால் சில நேரங்களில் நமக்கு மிகவும் பிடித்த ஒரு வேலையைச் செய்யும்போது நேரம் போவதே தெரியாமல் செய்வோம். 

சாப்பாடு, தூக்கம் கூட மறந்து அந்த வேலையில் மூழ்கி விடுவோம். அந்த நிலையைத்தான் உளவியலில் 'ஃப்ளோ ஸ்டேட்' (Flow State) என்று சொல்கிறார்கள். அந்த நிலையை எப்படி அடைவது என்றும், கடினமான வேலைகளைக் கூட எப்படி சுலபமாக மாற்றுவது என்றும் விரிவாகப் பார்ப்போம்.

தடையற்ற கவனம்!

நம்மால் ஒரு வேலையைச் சீக்கிரமாக முடிக்க முடியாமல் போவதற்கு முக்கிய காரணம் கவனச்சிதறல்கள். ஒரு வேலையை ஆரம்பிப்போம், உடனே மொபைலில் ஒரு நோட்டிபிகேஷன் வரும். அதை எடுத்துப் பார்த்தால் அரை மணி நேரம் காணாமல் போய்விடும். இந்த ஃப்ளோ ஸ்டேட் நிலைக்குச் செல்லவேண்டும் என்றால் முதலில் நம் கவனத்தை முழுமையாக அந்த வேலையில் குவிக்க வேண்டும். நம்மைச் சுற்றி இருக்கும் தொந்தரவுகளை முற்றிலுமாக நீக்கினால் மட்டுமே நம்மால் அந்த ஆழமான நிலைக்குச் செல்ல முடியும். தண்ணீர் எப்படி எந்தத் தடையுமின்றி ஓடுகிறதோ, அதேபோல நம் மனமும் வேலையில் ஒன்றிவிட வேண்டும்.

தொடக்கம் தான் முக்கியம்!

எந்த ஒரு வேலையையும் ஆரம்பிப்பது தான் உலகிலேயே மிகக் கடினமான விஷயம். ஒரு முறை ஆரம்பித்து விட்டால், அது தானாகவே நடக்கத் தொடங்கிவிடும். ராக்கெட் கிளம்பும்போதுதான் அதிக எரிபொருள் தேவைப்படும். மேலே சென்ற பிறகு அது மிகவும் எளிதாகப் பறக்கும். அதேபோலத்தான் நாமும் ஒரு வேலையைத் தொடங்கும் முதல் சில நிமிடங்கள் மட்டுமே கஷ்டமாக இருக்கும். அந்தத் தடையைத் தாண்டிவிட்டால், நாம் அந்த ஃப்ளோ ஸ்டேட்டிற்குள் சென்றுவிடுவோம். அதன் பிறகு அந்த வேலை ஒரு சுமையாகத் தெரியாது. அது ஒரு விளையாட்டுபோல மாறிவிடும்.

சவாலும் திறமையும்!

வேலை மிகவும் எளிதாக இருந்தால் நமக்கு போரடித்துவிடும். அதே சமயம் வேலை மிகவும் கடினமாக இருந்தால் நமக்கு பயம் வந்துவிடும். இந்த இரண்டுக்கும் நடுவில் ஒரு சரியான புள்ளியைப் பிடிப்பது தான் இந்த ஃப்ளோ ஸ்டேட். நம் திறமைக்கு ஏற்ற சவாலான வேலையாக அது இருக்க வேண்டும். அப்போதுதான் நம் மூளை முழு ஈடுபாட்டுடன் செயல்படும். அந்த வேலையை முடிப்பதில் ஒரு இன்பம் கிடைக்கும். இந்த ஆடியோவில் சொல்வது போல, வேலையை நாம் ரசித்துச் செய்யும்போது, களைப்பு என்பது நம்மை நெருங்கவே நெருங்காது.

வாழ்க்கையில் வெற்றி பெற்ற பல சாதனையாளர்கள் இந்த ஃப்ளோ ஸ்டேட் உத்தியைப் பயன்படுத்துகிறார்கள். நாம் செய்யும் வேலையில் முழு ஈடுபாட்டோடு, கவனச் சிதறல் இல்லாமல், ஆர்வத்தோடு இறங்கினால் நாமும் இந்த நிலையை அடையலாம்.