சோஷியல் மீடியா நிறுவனங்கள் உங்க மனச எப்படி ஹேக் பண்றாங்க தெரியுமா?

காலையில் எழுந்தவுடன் மொபைல் போனை கையில் எடுப்பதும், இரவு தூங்கச் செல்வதற்கு முன்பு வரை ஏதோ ஒரு செயலியைத் தொடர்ந்து பார்த்துக்கொண்டே இருப்பதும் தவிர்க்க முடியாத ஒன்றாக மாறிவிட்டது. அதிலும் குறிப்பாக சமூக வலைத்தளங்களில் உள்ள ரீல்ஸ் மற்றும் வீடியோக்களை தேவையில்லாமல் மணிக்கணக்கில் பார்ப்பதை 'டூம்ஸ்க்ரோலிங்' (Doomscrolling) என்று அழைக்கிறார்கள்.

இந்தத் தொடர் சமூக வலைத்தள பயன்பாடு நமது மூளையையும் நேரத்தையும் எப்படி முடக்குகிறது என்பதைப் பற்றித்தான் நாம் இங்கு விரிவாகக் காணப்போகிறோம். பலரும் இது வெறும் பொழுதுபோக்கு என்று நினைத்துக் கொண்டிருக்கிறார்கள். ஆனால் உண்மையில் இது நமது உளவியலைக் குறிவைத்து நடத்தப்படும் ஒரு பெரிய வணிகமாகும்.

உங்கள் கவனத்தை ஈர்க்கிறார்கள்!

நாம் ஒரு செயலியைப் பயன்படுத்தும் போது, நமது கைகளில் உள்ள ஒவ்வொரு சின்ன அசைவையும் அந்த நிறுவனம் கண்காணிக்கிறது. உங்களுக்கு எந்த வகையான வீடியோக்கள் பிடிக்கும், எதை நீங்கள் தவிர்க்கிறீர்கள் என்பதை உங்களை விட அந்த அல்காரிதம் மிகத் துல்லியமாகத் தெரிந்து வைத்திருக்கும். அதனால் தான் நீங்கள் சோகமாக இருக்கும் போது சோகமான பாடல்களும், மகிழ்ச்சியாக இருக்கும் போது அதற்கேற்ற பதிவுகளும் உங்கள் கண்ணில் படும்படி செய்யப்படுகின்றன.

மேலும், அந்த செயலிகளில் இருந்து வரும் நோட்டிபிகேஷன் சத்தங்கள் நம்மை அறியாமலேயே ஒருவிதமான ஆவலைத் தூண்டுகின்றன. சாதாரண குறுஞ்செய்திகளின் சத்தத்தைப் போலவே இவையும் இருப்பதால், நாம் அவசரமாக அதை எடுத்துப் பார்க்கத் தூண்டப்படுகிறோம். இது நமது மூளையில் டோபமைன் எனப்படும் மகிழ்ச்சி ஹார்மோனை சுரக்கச் செய்து நம்மை அதற்கு முழு அடிமையாகவே மாற்றிவிடுகிறது.

சிவப்பு நிறத்தின் ரகசியம்!

நம்முடைய மொபைல் போனில் வரும் ஒவ்வொரு நோட்டிபிகேஷனும் ஏன் சிவப்பு நிறத்தில் இருக்கிறது என்று நீங்கள் எப்போதாவது யோசித்தது உண்டா. மனித மூளை இயற்கையாகவே சிவப்பு நிறத்தை ஓர் ஆபத்தாக அல்லது உடனடியாக கவனிக்க வேண்டிய விஷயமாகப் பார்க்கும் தன்மை கொண்டது. இந்த அடிப்படை உளவியலைத்தான் சமூக வலைத்தள நிறுவனங்கள் தங்களுக்குச் சாதகமாகப் பயன்படுத்திக் கொள்கின்றன. ஒரு சிறிய சிவப்புப் புள்ளி கூட நமது கவனத்தை எளிதாகத் திசை திருப்பிவிடும் ஆற்றல் கொண்டது.

இதுமட்டுமில்லாமல், Snapchat போன்ற செயலிகளில் உள்ள Streaks எனப்படும் அம்சம், இளைஞர்கள் மத்தியில் பெரும் தாக்கத்தை ஏற்படுத்தி வருகிறது. அதைத் தவறவிட்டால் ஏதோ ஒரு பெரிய இழப்பு நேர்ந்துவிடும் என்ற பயத்தை அது உருவாக்குகிறது. இது போன்ற தந்திரங்களால்தான் இந்தியர்கள் சராசரியாக தினமும் மூன்று மணி நேரத்திற்கும் மேலாக சமூக வலைத்தளங்களிலேயே மூழ்கிக் கிடக்கின்றனர்.

மூளையில் ஏற்படும் கடுமையான பாதிப்புகள்!

தொடர்ந்து பல மணி நேரங்களை மொபைல் போனில் செலவிடுவதால் நமது மூளையின் சிந்திக்கும் திறன் பெருமளவு பாதிக்கப்படுவதாக அதிர்ச்சியூட்டும் மருத்துவ ஆய்வுகள் தெரிவிக்கின்றன. குறிப்பாக நமது முடிவெடுக்கும் திறன் மற்றும் தர்க்கரீதியாகச் சிந்திக்கும் பகுதியான ப்ரீஃப்ரண்டல் கார்டெக்ஸ் (Prefrontal Cortex) இந்தத் தொடர் பழக்கத்தினால் சுருங்கிவிடுகிறது. இது ஒருவரை எதற்கெடுத்தாலும் எளிதில் உணர்ச்சிவசப்படக் கூடியவராகவும், அதிக மன உளைச்சல் கொண்டவராகவும் மாற்றிவிடும்.

நமது மூளை இயற்கையாகவே ஒரு குறிப்பிட்ட அளவிலான தூண்டுதலுக்கு மட்டுமே பழக்கப்பட்டு இருக்கிறது. ஆனால், நொடிக்கு நொடி மாறும் இந்தச் சிறிய வீடியோக்கள் நமது மூளையை அளவுக்கு அதிகமாகச் சோர்வடையச் செய்கின்றன. அதனால்தான் சில நொடிகள் பொறுமையாக ஒரு விஷயத்தைப் பார்ப்பது கூட இன்று பலருக்கும் மிகவும் கடினமான ஒரு விஷயமாக மாறிவிட்டது. இது நமது ஒட்டுமொத்த வேலைத்திறனையும் கடுமையாகப் பாதிக்கிறது.

இந்த ஸ்மார்ட்போன் அடிமைத்தனம் என்பது நம்மை அறியாமலேயே நம்மை ஆட்கொள்ளும் ஒரு மிகப்பெரிய அரக்கனாகும். ஆனால் இதிலிருந்து வெளியே வர முடியாது என்று நினைப்பது முற்றிலும் தவறானது. தொழில்நுட்ப நிறுவனங்கள் என்னதான் தந்திரங்களைப் பயன்படுத்தினாலும், அதை எப்படி கையாள வேண்டும் என்ற கட்டுப்பாடு நம்மிடமே உள்ளது.