உங்கள் ஸ்மார்ட்போன் போதும்... ஆதார் முகவரியை நொடியில் மாற்றலாம்!

இந்தியாவின் டிஜிட்டல் அடையாள அட்டையான ஆதார், தற்போதைய காலகட்டத்தில் தவிர்க்க முடியாத ஒரு ஆவணமாக மாறியுள்ளது. வங்கிச் சேவைகள் முதல் அரசு நலத்திட்டங்கள் வரை அனைத்திற்கும் ஆதார் அவசியமாகிறது. பயனர்களின் வசதியைக் கருத்தில் கொண்டு, இந்திய தனித்துவ அடையாள ஆணையம் (UIDAI) ஒரு மிகப்பெரிய மாற்றத்தைக் கொண்டுவந்துள்ளது.

இனி பொதுமக்கள் தங்களின் மொபைல் எண் மற்றும் முகவரியைப் புதுப்பிக்க ஆதார் சேவை மையங்களுக்கு நேரில் செல்லவேண்டிய அவசியமில்லை. தங்களுடைய ஸ்மார்ட்போன் மூலமாகவே சில நிமிடங்களில் இதைச் செய்து முடிக்கலாம். வாருங்கள். இது குறித்து விரிவான தகவல்களை இங்கு காணலாம்.

இந்திய அரசின் 'டிஜிட்டல் இந்தியா' திட்டத்தின் ஒரு பகுதியாக, இந்தச் செயல்முறை மிகவும் எளிமையாக்கப் பட்டுள்ளது. குறிப்பாக, கிராமப்புறங்களில் வசிக்கும் மக்களுக்கும், வேலைப்பளு அதிகம் உள்ளவர்களுக்கும் இந்த வசதி ஒரு வரப்பிரசாதமாகும்.

புதிய அப்டேட் மூலம், பயோமெட்ரிக் கருவிகள் இல்லாமலேயே 'ஃபேஸ் அங்கீகாரம்' (Face Authentication) மற்றும் OTP முறை மூலம் மொபைல் எண் மாற்றத்தைச் செய்ய முடியும். இதன் மூலம் நீண்ட வரிசையில் காத்திருப்பது மற்றும் ஆவணங்களை நேரில் சமர்ப்பிக்கும் சிரமங்கள் தவிர்க்கப்படுகின்றன.

மொபைல் எண்ணை ஆன்லைனில் மாற்றுவது எப்படி?

உங்கள் மொபைல் எண்ணைப் புதுப்பிக்க, முதலில் உங்கள் ஸ்மார்ட்போனில் அதிகாரப்பூர்வமான ஆதார் செயலியை (mAadhaar App) பதிவிறக்கம் செய்யவேண்டும். செயலியைத் திறந்து, அதில் உள்ள 'Update Mobile Number' என்ற விருப்பத்தைத் தேர்ந்தெடுக்கவும். பின்னர், நீங்கள் இணைக்க விரும்பும் புதிய மொபைல் எண்ணை டைப் செய்ய வேண்டும். அந்த எண்ணிற்கு வரும் OTP-யை உள்ளீடு செய்து சரிபார்க்கவும். இறுதிப் படியாக, உங்கள் முகத்தை ஸ்கேன் செய்யும் 'Face Authentication' முறையை முடித்தவுடன் உங்கள் கோரிக்கை சமர்ப்பிக்கப்படும். மேலும், உங்கள் ஆதார் அப்டேட் எந்த நிலையில் உள்ளது என்பதை செயலியிலேயே கண்காணித்துக் கொள்ளலாம்.

முகவரியை மாற்றம் செய்யும் வழிமுறை:

முகவரி மாற்றத்தைப் பொறுத்தவரை, உங்களிடம் முறையான ஆவணங்கள் இருந்தால் மிக விரைவாகச் செய்துவிடலாம். செயலியில் லாகின் செய்த பிறகு, 'Services' பகுதிக்குச் சென்று 'Address Update' என்பதைத் தேர்ந்தெடுக்கவும். உங்கள் குடும்பத் தலைவரின் (Head of Family) ஆதாரைப் பயன்படுத்தியோ அல்லது உங்களிடம் உள்ள முகவரிச் சான்றுகளைப் பதிவேற்றியோ மாற்றங்களைச் செய்யலாம். புதிய முகவரி விவரங்களை உள்ளிட்டு, தேவையான ஆவணங்களை ஸ்கேன் செய்து அப்லோட் செய்யவேண்டும். இதற்கு கட்டணமாக ₹75 செலுத்த வேண்டியிருக்கும். பணம் செலுத்திய பின், UIDAI அதிகாரிகள் உங்கள் விவரங்களைச் சரிபார்த்து சில நாட்களில் அப்டேட் செய்துவிடுவார்கள்.

இந்த ஆன்லைன் முறையினால் கால விரயம் தவிர்க்கப்படுகிறது. அலுவலகங்களுக்குச் சென்று அலைய வேண்டிய தேவையில்லை என்பதால் பயணச் செலவுகளும் குறைகின்றன. ஃபேஸ் ஆதென்டிகேஷன் தொழில்நுட்பத்தைப் பயன்படுத்துவதால், இது மிகவும் பாதுகாப்பானதாகவும், முறைகேடுகளுக்கு இடமளிக்காத வகையிலும் வடிவமைக்கப்பட்டுள்ளது.

ஆதார் விவரங்கள் துல்லியமாக இருப்பது ஏன் முக்கியம் என்றால் கேஒய்சி (KYC) சரிபார்ப்பு மற்றும் வங்கிப் பரிவர்த்தனைகளுக்கு இதுவே அடிப்படை. முகவரியோ அல்லது மொபைல் எண்ணோ தவறாக இருந்தால், அரசு வழங்கும் மானியங்கள் மற்றும் இதர சலுகைகள் உங்களுக்குக் கிடைப்பதில் சிக்கல் ஏற்படலாம். குறிப்பாக, ஆன்லைன் சேவைகளைப் பயன்படுத்தும் போது பழைய மொபைல் எண் பயன்பாட்டில் இல்லை என்றால், உங்களால் ஓடிபி-யைப் பெற முடியாது. எனவே, தடையற்ற சேவைகளைப் பெற உங்கள் ஆதாரைப் புதுப்பித்து வைத்திருப்பது அவசியமாகும்.

கவனத்தில் கொள்ள வேண்டிய விஷயம் என்னவென்றால், அதிகாரப்பூர்வமான ஆதார் செயலியை மட்டுமே பயன்படுத்துங்கள். பாதுகாப்பற்ற இணைய தளங்களிலோ அல்லது செயலிகளிலோ உங்கள் ஆதார் எண்களைப் பகிரவேண்டாம். இந்த வசதியைப் பயன்படுத்தி உங்கள் ஆதாரை மேம்படுத்தி, டிஜிட்டல் சேவைகளைத் தடையின்றி அனுபவியுங்கள்.