பாவங்களைப் போக்கும் பாபாங்குசா ஏகாதசி: நல்வாழ்வு தரும் அற்புத விரத முறை!

இந்து சமயத்தில் ஒவ்வொரு ஏகாதசிக்கும் தனிச்சிறப்பு உண்டு. மாதந்தோறும் வளர்பிறையிலும் தேய்பிறையிலும் வரும் ஏகாதசி திதிகள், மகாவிஷ்ணுவை வழிபடுவதற்குரிய புனித நாள்களாகக் கருதப்படுகின்றன. அந்த வகையில், அக்டோபர் 22ஆம் தேதி வரும் பாபாங்குசா ஏகாதசி, பக்தர்களுக்கு ஆன்மிகச் சிந்தனையையும் மனத்தூய்மையையும் நினைவூட்டும் சிறப்பான நாளாகும்.

பாபாங்குசா ஏகாதசி என்பது ஐப்பசி மாத வளர்பிறையில் வரும் ஏகாதசியாகும். வடமொழியில் ‘பாபம்’ என்பது பாவத்தையும், ‘அங்குசம்’ என்பது யானையைக் கட்டுப்படுத்த உதவும் கருவியையும் குறிக்கிறது. அங்குசம் யானையை நல்வழியில் செலுத்துவதுபோல, இறைவனை நினைத்து வாழ்வது மனிதனின் தீயஎண்ணங்களைக் கட்டுப்படுத்த உதவும் என்ற ஆன்மிகப்பொருளை இந்தப் பெயர் உணர்த்துகிறது.

இந்த நாளில் மகாவிஷ்ணுவை வழிபடுவதால் பாவங்கள் நீங்கி நல்வாழ்வு கிடைக்கும் என்பது பக்தர்களின் நம்பிக்கை.

ஏகாதசி விரதத்தின் மகிமையைப் பத்ம புராணம் உள்ளிட்ட இந்து சமய நூல்கள் எடுத்துரைக்கின்றன. விரதம் என்பது உணவைத் தவிர்ப்பது மட்டுமல்ல; மனதைக் கட்டுப்படுத்துவது, பிறருக்குத் தீங்கு நினைக்காமல் இருப்பது, பொறாமை மற்றும் கோபத்தைக் குறைப்பது போன்ற நற்பண்புகளையும் வளர்த்துக்கொள்வதாகும்.

பாபாங்குசா ஏகாதசியன்று அதிகாலையில் எழுந்து நீராடி, மகாவிஷ்ணுவை மனதார வழிபடலாம். துளசி இலைகளால் அர்ச்சனை செய்வதும், விஷ்ணு சகஸ்ரநாமம், ஹரி நாமம் போன்றவற்றைப் பாராயணம் செய்வதும் சிறப்பானதாகக் கருதப்படுகிறது. அருகிலுள்ள பெருமாள் கோவிலுக்குச் சென்று தரிசனம் செய்யலாம். இயன்றவர்கள் அன்னதானம் செய்து ஏழை எளியவர்களுக்கு உதவலாம்.

இந்த ஏகாதசியுடன் தொடர்புடைய புராண மரபுகள், மனிதன் தனது செயல்களின் விளைவுகளை உணர்ந்து நல்ல பாதையில் செல்ல வேண்டும் என்பதை வலியுறுத்துகின்றன. இறைவனிடம் சரணடைவது என்பது நமது தவறுகளை உணர்ந்து திருத்திக்கொள்வதற்கான மனப்பக்குவத்தையும் குறிக்கிறது.

விரதம் இருப்பவர்கள் தங்கள் உடல்நிலைக்கு ஏற்றவாறு உணவு முறையைத் தேர்ந்தெடுக்க வேண்டும். முழு உபவாசம் இருக்க இயலாதவர்கள் எளிய உணவை உட்கொண்டு இறைநாமத்தைச் சொல்லி வழிபடலாம். உடல்நலக்குறைபாடு உள்ளவர்கள் உணவைத் தவிர்க்காமல் வழிபாட்டில் கவனம் செலுத்தலாம். விரதத்தின் உண்மையான நோக்கம் உடலை வருத்துவது அல்ல; உள்ளத்தைத் தூய்மைப்படுத்துவதே!

இந்த நாளில் பெருமாள் கோவில்களில் நடைபெறும் சிறப்பு வழிபாடுகளில் பக்தர்கள் கலந்துகொண்டு துளசி மாலை சாற்றி மகாவிஷ்ணுவை வழிபடலாம்.. வீட்டில் விளக்கேற்றி பெருமாளின் திருநாமங்களைச் சொல்லி விஷ்ணு சஹஸ்ரநாமம், நாராயணீயம் அல்லது பகவத் கீதையின் சில பகுதிகளைப் படிக்கலாம்.

நாள் முழுவதும் இறைச் சிந்தனையில் ஈடுபடுவது மனதிற்கு அமைதியையும் ஒருமுகப்படுத்தும் பயிற்சியையும் அளிக்கும். ஏகாதசி விரதத்தில் தானத்திற்கும் முக்கியத்துவம் அளிக்கப்படுகிறது. பசியால் வாடுபவர்களுக்கு உணவு வழங்குதல், வயதானவர்களிடம் அன்பாக நடந்து கொள்ளுதல் போன்ற செயல்களும் இறைவனுக்கு செய்யும் தொண்டாக கருதப்படுகிறது.

விரதத்தின் பலனை எதிர்பார்ப்பதைவிட பிறருடைய துயரத்தைப் போக்குவதில் மகிழ்ச்சி காண்பதே உயர்ந்த ஆன்மிகப் பண்பாகும். ‌‌பாபாங்குசா ஏகாதசி நமக்கு நினைவூட்டுவது வாழ்க்கையில் ஒவ்வொரு நாளும் நல்ல மாற்றத்தைத் தொடங்க முடியும் என்பதுதான்.

கோபத்தைக் குறைத்து, பொறுமையை வளர்த்து, உண்மையைப் பேசி பிறருக்கு உதவும் மனப்பான்மையுடன் வாழ்வதே இறைவழிபாட்டின் உண்மையான பயனாகும்.

ஐப்பசி மாதத்தின் ஆன்மிகச் சிறப்பு;

ஐப்பசி மாதம் ஆன்மிக வழிபாடுகளுக்கும் தான தர்மங்களுக்கும் சிறப்புடையதாகக் கருதப்படுகிறது . இம்மாத்தில் வரும் பாபாங்குசா ஏகாதசி பெருமாளின் அருளைப் பெறுவதுடன் மனத் தூய்மையையும், நற்பண்புகளையும் வளர்த்துக்கொள்ள நினைவூட்டுகிறது.

ஐப்பசி மாதத்தில் இறைவனை வழிபட்டு இயன்றவரை உணவும் உதவியும் அளிப்பதன் மூலம் பக்தியையும் மனித நேயத்தையும் ஒருங்கே வளர்த்துக்கொள்ளலாம்.

பாபாங்குசா ஏகாதசி அன்று பெருமாளின் திருநாமங்களைச் சொல்லி துளசி தீர்த்தம் அருந்தி பக்தியுடன் வழிபாடு செய்வது உத்தமம். அன்றைய தினம் ஏழைகளுக்கு உணவு அளிப்பதும் மனதார இறைவனைச் சரணடைவதும் வாழ்வில் நிம்மதியையும் மனநிறைவையும் அளிக்கும்.

பாபாங்குசா ஏகாதசி நமக்கு உணர்த்தும் முக்கியமான செய்தி, தீய எண்ணங்களை விலக்கி நற்செயல்களைப் பெருக்கிக்கொள்வதாகும். அன்றைய தினம் பெருமாளை வழிபட்டு, இயன்றவர்களுக்கு உதவி செய்து, மனஅமைதியுடன் வாழ உறுதியேற்போம். இந்தக் கட்டுரையை வாசிப்பதன் மூலம் ஏகாதசியின் ஆன்மிகச் சிறப்பையும் அதன் பின்னணியில் உள்ள நற்பண்புகளையும் அறிந்துகொண்டு, நமது வாழ்வில் அன்பையும் அறத்தையும் வளர்த்துக்கொள்ளலாம்.