சத்தமில்லாமல் ஓடும் நதி! இந்தியாவின் ‘அமைதியான’ குந்திப்புழா - ஓர் ஆச்சரியப் பயணம்!

நதி அல்லது ஆறு என்றாலே நமக்கு முதலில் நினைவிற்கு வருவது, ஓடும் நீரின் இரைச்சல்தான். ஆனால் அதை வெறும் இரைச்சல் என்று சொல்லமுடியாது; அது நதியின் இசை, நீரின் இசை. அதனுடன் சேர்ந்து பறவைகளின் குரல்கள், நம்மை இழுத்துச்செல்லும் ஒரு இனிய அனுபவத்தை தருகின்றன.

ஆனால் இந்தியாவில் ஒரு இடத்தில் மட்டும், ஒரு நதி அமைதியாக தன் வழியில் ஓடிக்கொண்டிருக்கிறது என்றால் நம்பமுடியுமா? அந்த அற்புதமான இடத்தைப் பற்றித்தான் இங்கு பார்க்கப்போகிறோம்.

இது கேரளாவின் சைலன்ட் வாலி தேசிய பூங்காவை அமைதியாக கடந்து செல்லும் ஒரு தெளிந்த, ஆழமற்ற நதி. இங்கு நதியின் சத்தத்தை விட, பறவைகளின் குரலும், வனப்பூச்சிகளின் ஒலியும்தான் அதிகமாக கேட்கும். அதனால்தான் இந்த நதி இந்தியாவின் “அமைதியான நதி” என்று அழைக்கப்படுகிறது.

நம்மில் சிலருக்கு கூட்டம் என்றால் பிடிக்காது. அதனால் கூட்டம் நிரம்பிய சுற்றுலா இடங்களை தவிர்க்க விரும்புவார்கள். அப்படிப்பட்டவர்களுக்கு இந்த நதி ஒரு புதிய அனுபவத்தை தருகிறது.

புராண காலத்து மகாபாரதத்தில், குந்தி பாண்டவர்களுடன் வனவாசத்தில் இருந்தபோது இந்த நதியில் நீராடியதாக கூறப்படுகிறது. கேரள மாநிலத்தில் ஓடும் பாரதப்புழா நதியின் முக்கிய கிளைநதிகளில் இதுவும் ஒன்று. இந்தியாவின் “அமைதியான நதி” என்று அழைக்கப்படும் குந்திப்புழா, சைலன்ட் வாலி தேசிய பூங்காவை முழுவதும் கடந்து செல்கிறது. மேற்கு தொடர்ச்சி மலைகளில் அமைந்துள்ள இந்த பகுதி, இந்தியாவின் கடைசி மழைக்காடுகளில் ஒன்றாகும்.

1970களில் இந்த நதியில் அணை கட்டும் திட்டம் முன்வந்தபோது, “Save Silent Valley” என்ற சுற்றுச்சூழல் போராட்டத்தின் மூலம் இந்த காடு பாதுகாக்கப்பட்டது. பின்னர் 1984-ஆம் ஆண்டு இது தேசிய பூங்காவாக அறிவிக்கப்பட்டது.

இந்த குந்திப்புழா நதி ஆழமற்றதாகவும், அமைதியாக மெதுவாக ஓடுவதாலும் சிறப்பு பெறுகிறது. மாசுபாடு இல்லாத இந்த பகுதியில், நீர் மிகவும் தெளிவாக இருக்கும்; நதிக்கடியில் உள்ள கற்களையும், மீன்களையும் கூட தெளிவாக பார்க்க முடியும்.

பயணம் செய்வது எப்படி?

சைலன்ட் வாலி தேசிய பூங்கா கேரளாவின் பாலக்காடு மாவட்டத்தில் உள்ளது.

செல்வது: விமானம்: கோயம்புத்தூர் / கோழிக்கோடு / கொச்சி

ரயில்: பாலக்காடு அல்லது கோயம்புத்தூர்

முக்கிய நுழைவாயில்: முக்காளி

முக்காளி முதல் சைரந்திரி வரை ஜீப் பயணம் மனதை மகிழ்விக்கும் அனுபவம். காட்டின் நடுவே செல்லும்போது பசுமை சூழல், பறவைகளின் குரல், காற்றின் இனிய தென்றல் சேர்ந்து ஒரு அமைதியான உணர்வை தரும். வாட்ச் டவரில் நின்று சுற்றிலும் விரிந்த காட்டு காட்சிகளை பார்க்கும்போது, இயற்கையின் அழகு நம்மை ஆச்சரியப்படுத்தும்.

அதன்பின் நதிக்கரைக்கு செல்லும் நடைபயணம் இன்னும் நெருக்கமான அனுபவம். வழியிலே சிங்கவால் குரங்கு, நிலகிரி லங்கூர், யானைகள், பல்வேறு பறவைகள் ஆகியவற்றை காணலாம். ஆனால் இது ஒரு சாதாரண சபாரி அல்ல; இயற்கையின் அமைதியை உணர்ந்து மகிழ்வதே இந்த பயணத்தின் சிறப்பு.

இந்த இடத்திற்கு செல்ல சிறந்த காலம் அக்டோபர் முதல் மார்ச் வரை. இந்த நாட்களில் காலநிலை குளிர்ச்சியாகவும் இனிமையாகவும் இருக்கும். ஏப்ரல் முதல் ஜூன் வரை வெயில் அதிகமாக இருக்கும்; மழைக்காலத்தில் சுற்றுப்புறம் அழகாக இருந்தாலும், பாதைகள் சிரமமாக இருக்கலாம்.

முக்காளியில் எளிய வனவாசஸ்தலங்கள் கிடைக்கின்றன. மேலும் பாலக்காடு, மன்னார்க்காடு போன்ற இடங்களில் ஹோட்டல்கள் உள்ளதால், வசதியான தங்கும் ஏற்பாடுகளையும் தேர்வு செய்யலாம்.

பயணம் செய்யும்போது பொறுப்பான சுற்றுலாவை கடைபிடிக்க வேண்டும். குப்பை எங்கும் போடாமல் சூழலை சுத்தமாக வைத்துக் கொள்ளுங்கள். காட்டின் அமைதியை காக்கவும், நதியில் குளிக்காமல் பாதுகாப்பாக இருக்கவும் வேண்டும். இயற்கையை மதிப்பதே இந்த பயணத்தின் உண்மையான நோக்கம்.

குந்திப்புழா ஒரு பெரும் சத்தமுள்ள நதி அல்ல. அமைதியாக ஓடும் இந்த நதி, சுற்றியுள்ள அடர்ந்த காடு மற்றும் சுத்தமான காற்றுடன் சேர்ந்து மனதை அமைதியாக்கும். அதன் மென்மையான நீரோட்டம், இங்கு வரும் ஒவ்வொருவருக்கும் ஒரு தனித்துவமான அனுபவத்தை தருகிறது.

இந்த “அமைதியான நதி” மனிதனையும் அமைதியாக மாற்றும் சக்தி கொண்டது. நீங்கள் பதற்றமாக வந்து, இங்கிருந்து அமைதியை மனதில் ஏந்திக்கொண்டு திரும்பிச் செல்வீர்கள் — அதுவே இந்த இடத்தின் உண்மையான அழகு.