கடலுக்கு அடியில் இருந்து வானை நோக்கிப் பீச்சியடிக்கும் மினி கெய்ஸர்! டோங்கா தீவிற்கு ஒரு பயணம்!

தென்பசிபிக்கில் இருக்கும் ஒரு அமைதியான இடம்தான் டோங்காதாபு (Tonga). 'புனித தெற்கு' என்று அழைக்கப்படும் இந்த நகரம், கலை, கலாச்சாரம், இயற்கை நிறைந்த வரலாற்று சிறப்புமிக்க ஒரு இடமாகும். நீங்கள் எதிர்பாக்கும் ஒரு சூப்பரான வெளிநாட்டு பயணத்திற்கு இது ஒரு நல்ல தேர்வு. இங்குள்ள நுகுஅலோஃபா (Nuku'alofa) நகரின் கலாச்சாரத் துடிப்பு முதல், பிரமிக்க வைக்கும் கடற்கரை அமைப்பு வரை, இந்தத் தீவில் நீங்கள் காண வேண்டியவற்றை விரிவாகப் பார்க்கலாம்.

டோங்காதாபுவின் தலைநகரமான நுகுஅலோஃபோ ஒரு அமைதியான, வண்ணமயமான பாரம்பரிய வீடுகளையும், ஒருவித காலனித்துவ அழகையும் கொண்டது.

இங்கு நாம் காண வேண்டிய இடங்கள் ஏராளம். அவற்றில் சில,

அரண்மனை மற்றும் தேவாலயங்கள்:

இங்குள்ள அரச அரண்மனை கடற்கரையை ஒட்டி அமைந்துள்ளது. இது மரத்தாலான ஒரு எளிமையான, ஆனால் கம்பீரமான கட்டிடம். உள்ளே நுழைய அனுமதி இல்லை என்றாலும், அதன் வெளிப்புற அழகைக் கண்டு ரசிக்கலாம். அருகில் உள்ள பழமையான சர்ச்சுகளும் தொங்காவின் வலுவான மத நம்பிக்கையையும், வரலாற்றையும் பறைசாற்றுகின்றன.

மக்களின் கலாச்சாரம் மற்றும் எளிமையான பயணம்:

இங்கு வார நாட்களில் நகரம் உயிர்ப்புடன் இருக்கும். ஞாயிற்றுக்கிழமைகளில் நகரமே அமைதியாகிவிடும். உள்ளூர் சந்தையில் (Talamahu Market ல்) கைவினைப் பொருட்கள் மற்றும் புதிய பழங்களை வாங்குவது ஒரு சுவாரஸ்யமான அனுபவம் என்பது சுற்றுலா பயணிகளின் கருத்து. தீவைச் சுற்றிப் பார்க்க டாக்ஸிகள் அல்லது வாடகை கார்கள் எளிதாகக் கிடைக்கின்றன.

(Ha'amonga 'a Maui) ஹா’அமோங்கா அ மா'யு'யி'யின் மர்மம்

டோங்காவின் கிழக்கில், வரலாற்று முக்கியத்துவம் வாய்ந்த ஒரு பிரமிக்க வைக்கும் நினைவுச்சின்னம் உள்ளது – அதுதான் 'ஹா’அமோங்கா அ மா'யு'யி' (Ha'amonga 'a Maui).

இது கி.பி. 1200-களில் கட்டப்பட்டதாக நம்பப்படும் ஒரு பிரம்மாண்டமான முக்கோண வளைவு (Trilithon Archway). இரண்டு செங்குத்தான கல் தூண்கள் மீது ஒரு கிடைமட்ட கல் வைக்கப்பட்டு இந்த வளைவு உருவாக்கப்பட்டுள்ளது. 'மா'யு'யி' என்ற தொங்காவின் கடவுளால் இது உருவாக்கப்பட்டதாக உள்ளூர் கதைகள் கூறுகின்றன.

இந்த நினைவுச்சின்னத்தின் நோக்கம் குறித்து பல மர்மங்கள் நிலவுகின்றன. சிலர் இதை ஒரு பண்டைய நுழைவாயில் என்கின்றனர், வேறு சிலர் இது ஆண்டு காலண்டரை (Celestial Calendar) கணக்கிடப் பயன்படுத்தப்பட்ட வானியல் கருவி என்கின்றனர். இதன் அருகில் நின்று பார்க்கும் போது, தொங்காவின் பழங்கால சாம்ராஜ்யத்தின் கட்டடக்கலை திறனை எண்ணி வியக்காமல் இருக்க முடியாது.

பஃப்ட் அவுட்:

டோங்காதாபுவின் தெற்குக் கடற்கரையில், இயற்கையின் பிரம்மாண்டமான சக்தியை நாம் கண்முன் காணலாம். இங்குதான் புகழ்பெற்ற "பஃப்ட் அவுட்" எனப்படும் பாறைத் துளைகள் (Blowholes) உள்ளன.

கடலில் இருந்து வரும் அலைகள், கடற்கரையின் சுவர்ப்பாறைகளுக்கு அடியில் உள்ள குகைகள் மற்றும் துளைகள் வழியாக மிக வேகமாக ஊடுருவிச் சென்று, பாறையின் மேலே உள்ள சிறிய துளைகள் வழியாக வானை நோக்கிப் பீச்சியடிக்கும்.

இந்த நீர் பீச்சியடிப்பு, ஒரு மினி-கெய்ஸர் (Mini-Geyser) போல் சில சமயங்களில் 30 மீட்டர் உயரம் வரை செல்வது ஒரு அற்புதமான காட்சி. ஆயிரக்கணக்கான துளைகள் வழியாக ஒரே நேரத்தில் தண்ணீர் பீச்சியடிப்பதைக் காணும்போது, கடல் அலைகளின் ஓயாத சக்தியை உணர முடியும். இந்த இடம் புகைப்படம் எடுக்கவும், இயற்கையின் விந்தையைப் பார்வையிடவும் மிகச் சிறந்தது.

டோங்காதாபு தீவு, அதன் வரலாற்றுச் சின்னங்கள், அரச கலாச்சாரம் மற்றும் கடற்கரையின் சக்திவாய்ந்த காட்சிகள் மூலம், ஒவ்வொரு பயணியின் மனதிலும் இவ்விடம் நீங்கா இடம் பிடிக்கும் என்பதில் சந்தேகமில்லை.