ராமேஸ்வரத்தில் மறைந்திருக்கும் பொக்கிஷம்.. ஆங்கிலேயர் கட்டிய இந்த இடத்திற்கு போயிருக்கீங்களா!

வாழ்க்கையில் ஒரு முறையாவது  ராமேஸ்வரம் பாம்பன் பாலத்தில் ரயிலில் பயணித்து கடலின் அழகை ரசிக்க வேண்டும் என்பது பலரின் கனவாக இருக்கும். அப்படி நீங்கள் அங்கு செல்லும்போது பலரும் அறியாத ஒரு அட்டகாசமான மறைக்கப்பட்ட பொக்கிஷம் ஒன்று பாம்பன் வடக்கு பகுதியில் அமைந்துள்ளது. அதுதான் பிரிட்டிஷ் காலத்தில் கட்டப்பட்ட பழமையான பாம்பன் கலங்கரை விளக்கம். 

இது நாள் வரை இந்த இடத்தை நாம் வெளியிலிருந்து மட்டுமே பார்த்து ரசித்திருப்போம். ஆனால் இப்போது நாமும் இதன் உள்ளே சென்று உச்சியில் நின்று இயற்கை அழகை ரசிக்கும் வாய்ப்பு கிடைத்துள்ளது. வாருங்கள் இந்த வரலாற்று சிறப்புமிக்க இடத்தை பற்றி தெரிந்து கொள்ளலாம் வாங்க.

வரலாறு!

19-ம் நூற்றாண்டின் தொடக்கத்தில் அதாவது 1902-ம் ஆண்டில் ஆங்கிலேயர்களால் இந்த பிரம்மாண்டமான கட்டிடம் உருவாக்கப்பட்டது. அந்த காலத்தில் கப்பல்களுக்கு சரியான திசையை காட்டுவதற்காக பாம்பன் கால்வாய் பகுதியில் 66 அடி உயரத்தில் உருளை வடிவில் இதனை மிக நேர்த்தியாக கட்டி வைத்துள்ளனர். இதன் உச்சியில் இருந்து வீசும் மின் விளக்கு ஒளி சுமார் மூன்று கிலோமீட்டர் தூரம் வரை சென்று கப்பல்களுக்கு பாதுகாப்பாக வழிகாட்டும் தொழில்நுட்பம் கொண்டது. 

இத்தனை வருடங்களாக சாதாரண மக்கள் இதன் மேலே செல்ல எந்த ஒரு அனுமதியும் இல்லாமல் இருந்தது. மக்களின் தொடர் கோரிக்கையை அடுத்து கடந்த 2024-ம் ஆண்டு நவம்பர் மாதம் முதல் இது சுற்றுலா பயணிகளுக்காக அதிகாரப்பூர்வமாக திறக்கப்பட்டுள்ளது.

நேரம், கட்டணம்!

இந்த சூப்பரான இடத்திற்குச் செல்ல நுழைவுக்கட்டணம் மிகவும் குறைவுதான். பெரியவர்களுக்கு வெறும்10 ரூபாயும், சிறியவர்களுக்கு 5 ரூபாயும், வெளிநாட்டவர்களுக்கு 25 ரூபாயும் மட்டுமே கட்டணமாக வசூலிக்கப்படுகிறது. தினமும் மதியம் 2 மணி முதல் மாலை 5 மணி வரை மட்டுமே இங்கு செல்ல பொதுமக்களுக்கு அனுமதி வழங்கப்பட்டுள்ளது.

 மேலும் உங்களுடன் வரும் சுட்டீஸ் ஜாலியாக விளையாட ஊஞ்சல் போன்ற பல விளையாட்டு உபகரணங்களும் இங்கே அழகாக அமைக்கப்பட்டுள்ளன. எனவே குடும்பத்துடன் சென்று ஒரு நல்ல மாலை பொழுதை கழிக்க இது ஒரு பெஸ்ட் ஸ்பாட்.

கழுகு பார்வையில் ராமேஸ்வரம்!

இந்த கலங்கரை விளக்கத்தின் உச்சிக்கு சென்றுப் பார்த்தால் கிடைக்கும் காட்சி உண்மையிலேயே வார்த்தைகளால் விவரிக்க முடியாத அளவு மிகவும் ரம்மியமாக இருக்கும். சில்லென்று வீசும் கடல் காற்று உங்கள் முகத்தைத் தழுவ ஒட்டுமொத்த ராமேஸ்வரம் தீவின் அழகையும் கழுகுப் பார்வையில் நீங்கள் ஆச்சரியத்தோடு கண்டு ரசிக்கலாம். 

ஒரு பக்கம் அமைதியான பாக் ஜலசந்தி கடலும் மறுபக்கம் ஆக்ரோஷமான மன்னார் வளைகுடா கடலும் என இயற்கை எழில் கொஞ்சும் காட்சிகளை உங்கள் கேமராவில் அழகாக பதிவு செய்யலாம். இது மட்டுமில்லாமல் சுமார் பதினைந்து கிலோமீட்டர் தொலைவில் அமைந்திருக்கும் ராமேஸ்வரம் ராமநாதசுவாமி கோவில் கோபுரத்தின் பிரம்மாண்டத்தையும் இங்கிருந்தபடியே மிக தெளிவாக பார்க்க முடியும்.

நீங்கள் அடுத்த முறை உங்கள் நண்பர்கள் அல்லது குடும்பத்தினருடன் ராமேஸ்வரம் ட்ரிப் பிளான் செய்தால் பாம்பன் பாலம் மற்றும் தனுஷ்கோடியை மட்டும் பார்க்காமல் இந்த பழமையான கலங்கரை விளக்கத்திற்கும் ஒருமுறை கட்டாயம் விசிட் அடியுங்கள். ஆங்கிலேயர்களின் கட்டுமானத் திறனையும் நமது ஊரின் கடல் அழகையும் ஒரே இடத்தில் ரசிக்கும் ஒரு புதுவிதமான அனுபவம் உங்களுக்கு நிச்சயம் கிடைக்கும்.