இந்த கோடைக்காலத்தில் தனியாக ட்ரிப் போறீங்களா... இதோ உங்களுக்கான சூப்பர் ஐடியாக்கள்!

கோடைக்காலம் வந்துவிட்டாலே வெயிலின் தாக்கம் நம்மை வாட்டி வதைக்கத் தொடங்கிவிடும். இந்த சலிப்பான சூழ்நிலையில் இருந்து தப்பிக்க ஒரு பிரேக் எடுத்தால் நன்றாக இருக்கும் என மனம் ஏங்கும். நண்பர்கள் அல்லது குடும்பத்துடன் செல்வதை விட, தனியாக ஒரு சோலோ ட்ரிப் செல்வது இப்போது பலரின் விருப்பமான ஒன்றாக மாறிவிட்டது. 

தனியாகப் பயணம் செய்வது ஒரு அலாதியான சுகம். யாரிடமும் அனுமதி கேட்க வேண்டாம், நமக்கு பிடித்த நேரத்தில் எழலாம், பிடித்ததைச் சாப்பிடலாம். இந்த சுட்டெரிக்கும் கோடையில் எப்படி ஒரு சூப்பரான சோலோ ட்ரிப் பிளான் செய்வது என்பதை  இந்தப் பதிவில் பார்க்கலாம்.

சரியான இடத்தை தேர்வு செய்யுங்கள்!

வெயிலில் இருந்து தப்பிக்க மலைப்பிரதேசங்களை குறிவைப்பதுதான் எப்போதுமே பெஸ்ட் ஐடியா. பிரபலமான சுற்றுலா தலங்களில் உள்ள கூட்ட நெரிசலைத் தவிர்த்துவிட்டு, சற்று அமைதியான கிராமப்புற ஹோம்ஸ்டேக்களைத் தேர்ந்தெடுத்துத் தங்கலாம்.

கேரளாவின் வயநாடு, கர்நாடகாவின் கூர்க் அல்லது வட இந்தியாவின் சில மலை கிராமங்கள் என பசுமையான இடங்களுக்குச் செல்வது கண்களுக்கு ரொம்பவே குளிர்ச்சியாக இருக்கும். கடல் சார்ந்த இடங்களுக்குச் செல்வதாக இருந்தால், நண்பகல் நேரத்தை தவிர்த்துவிட்டு, அதிகாலை மற்றும் மாலை நேரங்களில் மட்டும் வெளியே சுற்றுவதுபோல பிளான் செய்துகொள்ளுங்கள்.

ஸ்மார்ட்டான பேக்கிங் முறை!

கோடைக்கால பயணத்தில் மிக முக்கியமானது நாம் பேக் செய்யும் பொருட்கள்தான். ரொம்ப கனமான துணிகளைத் தவிர்த்துவிட்டு, உடலுக்குக் காற்றோட்டமாக இருக்கும் மெல்லிய காட்டன் ஆடைகளை மட்டும் எடுத்துக்கொள்ளுங்கள். 

தொப்பி, கூலிங் கிளாஸ் மற்றும் சன்ஸ்கிரீன் லோஷன் ஆகிய மூன்றும் உங்கள் பேக்கில் கட்டாயம் இருக்க வேண்டும். ரொம்பவே குறைவான லக்கேஜ் எடுத்துச் செல்வது உங்கள் பயணத்தை சுலபமாக்கும். பல கிலோமீட்டர்கள் நடக்க வேண்டி இருக்கும் என்பதால், கால்களுக்கு வசதியான ஒரு நல்ல ஷூ அணிவது மிகவும் அவசியம்.

உணவு, ஆரோக்கியம்!

தனியாகச் செல்லும்போது கண்ட இடங்களில் சாப்பிட்டு வயிற்றைக் கெடுத்துக்கொள்ளக் கூடாது. காரமான மற்றும் அதிக மசாலா நிறைந்த உணவுகளைத் தவிர்ப்பது நல்லது. இளநீர், தர்பூசணி மற்றும் நீர்மோர் போன்றவற்றை அதிகமாக எடுத்துக்கொண்டு உடலை எப்போதுமே நீரேற்றமாக அதாவது ஹைட்ரேட்டடாக வைத்திருப்பது ரொம்பவே அவசியம். 

உங்கள் கையில் எப்போதும் ஒரு வாட்டர் பாட்டில் இருப்பதை உறுதி செய்துகொள்ளுங்கள். மதியம் பன்னிரண்டு மணி முதல் மூன்று மணி வரை சுட்டெரிக்கும் வெயிலில் வெளியே சுற்றும் பிளானை முற்றிலுமாகத் தவிர்த்துவிடுங்கள். அந்த நேரத்தில் ரூமில் நிம்மதியாக ஒரு குட்டித் தூக்கம் போடலாம்.

பாதுகாப்பு!

தனியாக ஊர் சுற்றும்போது பாதுகாப்பு மிக முக்கியம். நீங்கள் எங்கு தங்கியிருக்கிறீர்கள் என்ற தகவலையும், உங்களின் லைவ் லொகேஷனையும் வீட்டில் உள்ள நெருக்கமான யாரிடமாவது எப்போதும் பகிர்ந்து வாருங்கள். முன்கூட்டியே ரூம் மற்றும் டிக்கெட்டுகளை புக் செய்து வைப்பது கடைசி நேர டென்ஷனைக் குறைக்கும். அதிக பணம் கையில் வைத்திருப்பதைத் தவிர்த்துவிட்டு, டிஜிட்டல் பேமெண்ட் முறைகளை அதிகம் பயன்படுத்துங்கள்.

இந்த கோடைக் காலத்தை வெறும் நான்கு சுவர்களுக்குள் வீணாக்காமல், பாதுகாப்பான முறையில் உங்களின் முதல் சோலோ பயணத்தை இன்றே தொடங்குங்கள். இது உங்கள் வாழ்நாள் முழுவதும் நினைவில் நிற்கும் ஒரு இனிமையான அனுபவமாக அமையும்.