உலகிலேயே பயம்னா என்னன்னே தெரியாத விலங்கு எது தெரியுமா?

1. காட்டில் உள்ள எந்த ஒரு விலங்கிடமும் பயப்படாமல் எதிர்த்து நின்று சண்டை போடும் தைரியம் இந்த ஹனி பேஜருக்கு இருக்கிறது. இந்த அசாத்தியமான தைரியமே கின்னஸ் புத்தகத்தில் 'மிகவும் பயமற்ற துணிச்சலான விலங்கு' என்ற பெயர் வர காரணமானது. 

2. உணவாக எது கிடைத்தாலும் உண்ணும். அசால்ட்டாக தேன்கூட்டை கலைத்து விட்டு தேனை எடுத்து சாப்பிடும். தேனிக்கள் கொட்டினாலும் இதற்கு ஒன்றும் ஆவதில்லை. ஏனென்றால் இதன் தோல் மிகவும் தடிமனாக இருக்கும். மிகவும் விஷமான நாகப் பாம்பையே கொன்று சாப்பிடும்.

பாம்பு கொத்தினாலும் இதன் நோய் எதிர்ப்பு சக்தி மண்டலம் அதற்கு எதிராக செயல்பட்டு 30 நிமிடங்கள் மட்டும் மயக்கத்தில் இருந்து விட்டு, பிறகு மீண்டும் பழைய நிலைமைக்கு திரும்பி விடும்.

3. இதன் நகங்களும், பற்களும் கூர்மையாக இருப்பதால் எதிரே உள்ள வேட்டை விலங்குகளை சரமாரியாக தாக்குகிறது. இதன் பற்கள் ஆமையின் ஓட்டை உடைக்கும் அளவிற்கு வலிமையாக இருக்கும். ஒருபோதும் பயந்து பின்வாங்குவதில்லை. யானை, சிங்கம், புலி, சிறுத்தை என எதுவாக இருந்தாலும் எதிர்த்து சண்டை போடும். 

4. இயற்கை சூழலில் வாழக்கூடிய தேன் வளைக்கரடி 7 முதல் 12 ஆண்டுகள் வரை வாழும். நோய் தொற்று, பிற விலங்குகளின் தாக்குதல்கள் மூலம் ஏற்படும் காயங்கள் போன்ற பல காரணங்களால் இதன் ஆயுளானது கேள்விக்குறியாகிறது? சரணாலயத்தில் வளர்க்கப்படக் கூடியவை சுமார் 24 ஆண்டுகள் வரை வாழும்.

5. தேன் வளைக்கரடி பெரும்பாலும் வறண்ட புல்வெளிகள் மற்றும் மலைப் பகுதிகளான ஆப்பிரிக்கா, மத்திய கிழக்கு நாடுகள் அதோடு இந்தியாவின் ஒரு சில பகுதிகளிலும் காணப்படுகிறது. குழி தோண்டி பொந்துகளில் வாழும். மற்ற விலங்குகளின் பொந்துகளையும் ஆக்கிரமித்துக் கொள்ளும்.

6. இதன் தோல் மிகவும் தடிமனாக 6mm வரை இருக்கும். இவற்றின் தோல் உடலோடு ஒட்டாமல் ஒருவித நெகிழும் தன்மையோடு இருக்கும். சுலபமாக எந்த ஒரு விலங்கும் இதனை கடித்து தோலை கிழிக்க முடியாது. இதன் தோல் தான் இதற்கு மிக முக்கிய பாதுகாப்பாக இருக்கிறது. தேனீக்களின் கொடுக்குகளும் இதன் தோளில் ஊடுருவ முடியாது.

7. இவை புத்திசாலித்தனத்திற்கு பெயர் பெற்றவை. சரணாலயங்களில் தப்பிக்க முடியாத இடங்களில் மாட்டிக் கொண்டாலும் கூட, சிறு சிறு கற்களை அடுக்கி மேலே வர பார்ப்பதும், அல்லது ஏணிகள் மூலம் ஏறி மேலே வந்து தப்பித்து வெளியே சென்றும் விடுகின்றன. அதேபோல் உயரத்தைப் பற்றியும் இதற்கு கவலை இல்லை. 

8. மலக்குடலில் அமைந்துள்ள சுரப்பியிலிருந்து வெளிவரும் துர்நாற்றம் வீசக்கூடிய திரவம் வேட்டை விலங்குகளிடமிருந்து தப்பிக்க இதற்கு பயன்படுகிறது. மிகவும் ஆபத்தான நேரங்களில் வாலைத் தூக்கி இந்த கெட்ட திரவத்தை வெளியிடும். இந்த வாடை மிகவும் கொடுமையான அழுகிய முட்டை அல்லது அழுகிய இறைச்சியை விட பல மடங்கு துர்நாற்றமாக இருக்கும்.

இதனால் எதிரி விலங்குகளின் முகம் சுளித்து போய்விடும். அந்த நேரத்தை பயன்படுத்தி இது தப்பித்து விடும். தற்காப்பையும் தாண்டி தனது எல்லைகளை மற்ற விலங்குகளுக்கு தெரியப்படுத்தவும், மற்ற பெண் ஹனி பேஜர்களை ஈர்க்கவும் இந்த திரவத்தை பயன்படுத்துகிறது.

9. முன்னோக்கி செல்வது போல் பின்னோக்கியும், பக்கவாட்டிலும் வேகமாக செல்லும். எதிரிகளை நிலைகுலைய செய்யவும், தற்காப்பிற்காகவும் இதுபோன்று செய்யும். 

10. ஹனி கைடு என்று அழைக்கப்படும் பறவையானது தேன்கூட்டை பார்த்ததும் ஒருவித சத்தத்தை ஏற்படுத்தும். இதை பார்த்த ஹனி பேஜர் தேன் கூட்டை நோக்கி செல்லும். தேனை சாப்பிட்டு முடித்துவிட்டு, அதில் உள்ள லார்வாக்களை அந்த பறவைகளுக்கு உணவாக விட்டு வந்துவிடும். இயற்கையில் இந்த ஹனி ஹைடு பறவையும் ஹனி பேஜரும் உணவு தேடுவதில் சிறந்த கூட்டணியாக செயல்படுகிறது.

இப்படி பல வியத்துக்கு வாழ்வியல் தகவமைப்புகளை கொண்டதுதான் இந்த தேன் வளைக்கரடி!!