

மறுநாள் ஆறுமுகம், சதாசிவம் வீட்டருகே வந்து ‘ஐயா..ஐயா...’ என்று கத்தினார். அங்கிருப்பவர்கள் நடந்ததை கூற ஆறுமுகம் ஒன்றும் தெரியாததுபோல அழுது நடித்தார். இதற்குள் மகேஷும் வந்துவிட்டான்.
“எப்பப்பா வந்தீங்க?”
“அதை விடு... முதல்ல நீ ஏன்டா, ஐயா இறந்ததைச் சொல்லலை.. யாருடா இந்த வீட்டைப் பூட்டி வச்சா?” என்று கூப்பாடு போட்டு ரகளை செய்யவே அருகிலிருப்பவர்கள் இன்ஸ்பெக்டருக்கு கால் செய்யவே, அவரும் அங்கு வந்து அழகாக நாடகமாடினார்.
“ஹலோ... நீங்க யாரு? எதுக்கு இப்பக் கத்தறீங்க?"
“மரியாதையா என் ஐயா வீட்டை திறந்து விடுங்க... அப்புறம் தீபா பாப்பாவை வரவழைங்க... சதாசிவம் ஐயாவையும் அம்மாவையும் யாரோ கொலை பண்ணி இருக்காங்க.. அது யாருன்னு தெரியாம நான் போகமாட்டேன்...” என்று ஜோராக கத்திக்கொண்டிருந்தார் ஆறுமுகம்.
இதற்குள், எதுவும் தெரியாததுபோல விவேக்கும் நாடகத்தின் உள்ளே என்ட்ரி கொடுத்தான்.
போலீஸார் அவனை தடுத்து,
“ஹலோ மிஸ்டர்! நீ யாருப்பா..?”