ஊதா இதயம் (Purple Heart) - வீரத் தியாகத்தின் உயரிய சின்னம் - இராணுவ வீரர்களுக்கான பதக்கம்!

ஒரு நாடு அமைதியாகவும் பாதுகாப்பாகவும் வாழ்வதற்குப் பின்னால் எண்ணற்ற இராணுவ வீரர்களின் தியாகம் உள்ளது. அவர்கள் தங்கள் உயிரையும் உடலையும் நாட்டிற்காக அர்ப்பணிக்கத் தயங்குவதில்லை. இப்படிப்பட்ட வீரர்களின் தியாகத்தை நினைவுகூரவும், அவர்களின் காயங்களையும் உயிரிழப்பையும் மரியாதை செலுத்தவும் வழங்கப்படும் சிறப்பு இராணுவ விருதே Purple Heart Awardஆகும். தமிழில் இதனை ஊதா இதய பதக்கம் என்று கூறலாம்.

வரலாற்று பின்னணி:

ஊதா இதய பதக்கத்தின் வரலாறு மிகவும் பழமையானது. 1782 ஆம் ஆண்டு அமெரிக்க விடுதலைப் போரின் போது, அமெரிக்க இராணுவத்தின் தலைவராக இருந்த ஜார்ஜ் வாஷிங்டன் அவர்களால் “Badge of Military Merit” என்ற விருதை அறிமுகப்படுத்தினார். அந்த காலத்தில் சாதாரண வீரர்களின் சேவையைப் பாராட்டுவது அரிதாக இருந்தது. ஆனால் ஜார்ஜ் வாஷிங்டன் வீரர்களின் தனிப்பட்ட தியாகத்தை மதிக்க வேண்டும் என்று கருதி இந்த விருதை உருவாக்கினார். பின்னர் பல ஆண்டுகள் இந்த விருது வழங்கப்படாமல் இருந்தது.1932 ஆம் ஆண்டு, ஜார்ஜ் வாஷிங்டனின் பிறந்தநாளை முன்னிட்டு, இந்த விருது மீண்டும் அறிமுகப்படுத்தப்பட்டது. அப்போது இதற்கு 'Purple Heart' என்று பெயரிடப்பட்டது. அதன் பின்னர் இது அமெரிக்க இராணுவத்தின் முக்கியமான விருதாக (Purple Heart Award) நிலைத்தது.

ஊதா இதய பதக்கம் வழங்கப்படும் விதிமுறைகள்:

போரில் எதிரி தாக்குதலால் காயமடைந்த இராணுவ வீரர்களுக்கு, எதிரி தாக்குதலால் உயிரிழந்தவர்களுக்கு, நாட்டின் பாதுகாப்பு பணியில் இருக்கும்போது நேரடியாக போர்ச் சம்பவங்களால் பாதிக்கப்பட்டவர்களுக்கு வழங்கப்படுகிறது.

இதன் தனிச்சிறப்பு:

ஒருவர் வீரச் செயலால் பதக்கம் பெறலாம்; ஆனால் ஊதா இதய பதக்கம் என்பது காயம் அல்லது உயிரிழப்பு போன்ற தியாகத்திற்கான அங்கீகாரம்.

விருதின் வடிவமும் சின்னங்களும்;

இது ஒரு இதயம் வடிவிலான பதக்கம். இதன் முக்கிய அம்சங்கள்: ஊதா நிற பின்னணி, தங்க நிற எல்லை, நடுவில் ஜார்ஜ் வாஷிங்டனின் உருவப் படம், மேலே அமெரிக்க தேசிய சின்னமான கழுகு (Eagle).

ஊதா நிறம் மரியாதை, தியாகம் மற்றும் வீரத்தைக் குறிக்கிறது. இதய வடிவம் அன்பையும் உயிரையும் குறிக்கிறது. இந்த இரண்டும் இணைந்து “நாட்டிற்காக அர்ப்பணிக்கப்பட்ட இதயம்” என்ற அர்த்தத்தை வெளிப்படுத்துகின்றன.

வரலாற்றில் முக்கிய பங்கு:

முதல் உலகப் போர், இரண்டாம் உலகப் போர், கொரியப் போர், வியட்நாம் போர், ஈராக் மற்றும் ஆப்கானிஸ்தான் போர்களில் ஆயிரக்கணக்கான வீரர்கள் இந்த விருதைப் பெற்றுள்ளனர். சில சமயங்களில் ஒரே வீரர் பல முறை காயமடைந்தால், அவருக்கு ஒன்றுக்கும் மேற்பட்ட ஊதா இதயங்கள் வழங்கப்படலாம். இது அவரின் மீண்டும் மீண்டும் செய்த தியாகத்தைச் சுட்டிக்காட்டுகிறது.

சமூகத்தில் இதன் தாக்கம்:

ஊதா இதய பதக்கம் என்பது நாட்டுப்பற்றின் அடையாளம், வீரர்களின் தியாகத்தை மக்களிடம் நினைவூட்டும் சின்னம், இராணுவ குடும்பங்களுக்கு மரியாதை வழங்கும் அடையாளம், அமெரிக்காவில் “Purple Heart Day” என்ற தினமும் கடைப்பிடிக்கப்படுகிறது. அந்நாளில் இந்த விருது பெற்ற வீரர்களை மக்கள் மரியாதை செலுத்துகின்றனர்.

ஊதா இதய பதக்கம் பெற்றவர்கள் தங்கள் உடலில் ஏற்பட்ட காயங்களுடன் வாழ்ந்தாலும், அந்த பதக்கம் அவர்கள் செய்த சேவையை நிரந்தரமாக பதிவு செய்கிறது. உயிரிழந்த வீரர்களின் குடும்பங்களுக்கு இது பெருமையும் வலியும் கலந்த ஒரு நினைவாக திகழ்கிறது. இந்த விருது தியாகத்தின் சின்னம், வீரத்தின் சாட்சி, நாட்டின் நன்றியின் வெளிப்பாடு.

நாட்டின் பாதுகாப்பிற்காக தங்கள் உயிரையும் உடலையும் அர்ப்பணித்த வீரர்களை கௌரவிக்கும் உயரிய அங்கீகாரமாக Purple Heart விளங்குகிறது. எந்த நாட்டிலும் அமைதி நிலவுவதற்குப் பின்னால் இருக்கும் வீரர்களின் அர்ப்பணிப்பை நினைவுகூரும் போது, இது போன்ற விருதுகள் மனிதகுலத்திற்கு தியாகத்தின் மதிப்பை உணர்த்துகின்றன.