புதிய அம்மாவா நீங்க? 'பேபி ப்ளூஸ்' பற்றி தெரியுமா?

கர்ப்பம் என்பது ஒரு பெண்ணின் வாழ்க்கையில் மிக முக்கியமான கட்டங்களில் ஒன்றாகும். இதனால் பெண்கள் மனரீதியான, உடல் ரீதியான, உணர்ச்சி ரீதியான பல மாற்றங்களுக்கு ஆளாகுகிறார்கள். இருப்பினும், பிரசவத்திற்குப் பிறகு அதிக மாற்றங்கள் ஏற்படுகின்றன.

மகப்பேறுக்கு பின் தாய்மார்கள் எதிர்கொள்கின்ற மிகவும் பொதுவான பிரச்சினை எது என்று கேட்டால் அது மனச்சோர்வு தான். பிரசவத்திற்குப் பிந்தைய மனச்சோர்வு ஒவ்வொருவரையும் வித்தியாசமாக பாதிக்கிறது. குழந்தை பிறந்த முதல் வருடத்தின் எந்த நேரத்திலும் இது தொடங்கலாம். கர்ப்ப காலத்திலிருந்தே இது தொடரலாம் அல்லது திடீரெனவோ படிப்படியாகவோ உருவாகலாம்.

பிரசவத்திற்குப் பிறகு முதல் வாரத்தில் பலர் சற்று சோர்வாகவோ, தனக்குத் தானே அழுது கொண்டோ அல்லது பதட்டமாகவோ உணர்கிறார்கள். இது பெரும்பாலும் 'பேபி ப்ளூஸ்' என்று அழைக்கப்படுகிறது. மேலும் இது மிகவும் பொதுவானது, இது சாதாரணமாகக் கருதப்படுகிறது. பொதுவாக பிரசவத்திற்குப் பிறகு பேபி ப்ளூஸ் 2 வாரங்களுக்கு மேல் நீடிக்காது. ஆனால் சில பேருக்கு நீடித்து கொண்டும் போகிறது.

'பேபி ப்ளூஸ்' என்றால் என்ன?

பிரசவத்திற்குப் பிறகு சுமார் இரண்டு முதல் மூன்று நாட்களுக்கு மனச்சோர்வு மற்றும் பதட்டம் போன்ற உணர்வுகள் பொதுவானவை. நீங்கள் எந்த காரணமும் இல்லாமல் அழுவதை, தூங்குவதில் சிரமப்படுவதை அல்லது உங்கள் புதிய குழந்தையைப் பராமரிக்கும் திறனை கேள்விக்குள்ளாக்குவதை அனுபவிக்கலாம். "இது பெரும்பாலும் புரோஜெஸ்ட்டிரோன் அளவுகளில் ஏற்படும் மாற்றத்தால் ஏற்படுகிறது".

இந்த ஹார்மோன் மாற்றங்களுக்கு அப்பால், நீடித்த சோர்வு அல்லது தாய்ப்பால் கொடுப்பதில் உள்ள சவால்கள் மற்றும் பிரசவத்திற்குப் பிறகான சிக்கல்கள் போன்ற பிற காரணிகளும் இந்த உணர்வுகளுக்கு வழிவகுக்கும்.

பொதுவான அறிகுறிகள் பின்வருமாறு:

1. மனச்சோர்வு / பதட்டமாக உணர்வது.

2. எளிதில் வருத்தப்படுவது.

3. புதிதாகப் பிறந்த குழந்தை, மற்ற குழந்தைகள் அல்லது துணைவர் மீது கோபமாக இருப்பது.

4. தெளிவான காரணமின்றி அழுவது.

5. தூங்குவது, சாப்பிடுவது மற்றும் தேர்வுகள் செய்வதில் சிக்கல்.

6. ஒரு குழந்தையைப் பராமரிக்க முடியுமா? என்று கேள்வி எழுப்புதல்.

இந்த அறிகுறிகளுக்கு தகுந்த சிகிச்சையளிக்கப்படாவிட்டால், பிரசவத்திற்குப் பிந்தைய மனச்சோர்வு மாதங்கள் அல்லது ஆண்டுகள் கூட நீடிக்கும். தாயின் ஆரோக்கியத்தைப் பாதிப்பதோடு மட்டுமல்லாமல், அது தனது குழந்தையுடன் தொடர்பு கொள்ளவும், பராமரிக்கவும் அவளது திறனில் தலையிடக்கூடும், மேலும் குழந்தை வளரும்போது தூக்கம், உணவு மற்றும் நடத்தையில் சிக்கல்களை உருவாக்கக்கூடும்.

இது காலம் காலமாக பிரசவித்த பெண்கள் சந்திப்பதுதான் என்றாலும், தற்போதைய நகர நாகரிகத்தில் அதன் பாதிப்பும், எண்ணிக்கையும் அதிகரித்துள்ளன. ஏனென்றால் முந்தைய தலைமுறையில் பிரசவித்த பெண்ணை பாட்டி, பெரியம்மா, சித்தி, அத்தை போன்றவர்கள் கவனித்துக் கொள்வார்கள். அதன் காரணமாக குழந்தைக்கு பாலூட்டி விட்டு, குழந்தை உறங்கும்போது தாயும் உறங்கி ஓய்வெடுத்துக்கொள்வாள்.

மேலும் தாய்க்கு அவசியமான பத்திய சாப்பாடு, துணிகளை துவைப்பது உள்ளிட்ட பல உதவிகளை வீட்டில் இருக்கும் மற்ற பெண்கள் செய்தார்கள். அதன் மூலம் பிரசவித்த பெண்கள் மன ரீதியாகவும், உடல் ரீதியாகவும் அமைதியான சூழலைப் பெற்றிருந்தார்கள். இன்றைய தனிக்குடித்தன வாழ்வில் உறவுகளின் உதவிகள் முழுமையாக கிடைப்பதில்லை. பிரசவித்த தாயே தனக்கான வேலைகளை கவனித்துக்கொள்வதால் மன அழுத்தம் ஏற்படுகிறது.

மேலும், பிரசவத்தில் ஏற்பட்ட சிக்கல்கள், கர்ப்ப காலத்தில் சந்தித்த அதிர்ச்சிகள், பிரசவம் குறித்த மன தெளிவின்மை, உடல் ரீதியான காரணங்கள், பொருளாதார மற்றும் சமூக ரீதியான காரணங்களால் பிரசவத்துக்கு பின்னர் மன அழுத்தம் உருவாகிறது. அது மட்டுமில்லாமல் இப்போதைய சூழ்நிலையில் முக்கால் வாசி பெண்களும் வேலைக்கு செல்கிறார்கள். வேலை டென்ஷனும் சேர்ந்து கொள்வதால் இந்த மனச் சோர்வு இன்னும் அதிகமாகிறது. பிரசவித்த பெண்களில் சுமார் 7 பேரில் ஒருவருக்கு இது ஏற்படுவதாக ஆய்வுகள் தெரிவிக்கின்றன.

இந்த மன அழுத்தத்தை கையாள்வது பலருக்கும் கடினமாக இருக்கலாம். அந்த வரிசையில் கர்ப்பத்திற்குப் பிறகு ஏற்படும் மன அழுத்தம் மற்றும் மனச்சோர்வை சமாளிக்க உதவும் 5 டிப்ஸ்களை பார்க்கலாம்:

பிறர் ஆதரவை பெறுங்கள்:

கர்ப்பத்திற்குப் பிறகு நீங்கள் மனச்சோர்வுடன் போராடுகிறீர்கள் என்றால் நீங்கள் செய்யக்கூடிய மிக முக்கியமான விஷயங்களில் ஒன்று பிறரின் ஆதரவைப் பெறுவதாகும். நீங்கள் எப்படி உணர்கிறீர்கள் என்பதைப் பற்றி உங்கள் துணையிடமோ அல்லது மற்ற குடும்ப உறுப்பினரடமோ அல்லது நண்பர்களிடமோ பேசுங்கள். பிரசவத்திற்குப் பிறகு ஏற்படும் மனச்சோர்வில் நிபுணத்துவம் பெற்ற ஒரு சிகிச்சையாளர் அல்லது ஆலோசகரையும் நீங்கள் அணுகலாம். இந்த விஷயத்தில் பிறரிடம் உதவியோ அல்லது ஆலோசனையோ கேட்க கொஞ்சம் கூட தயங்காதீர்கள்.

உங்களை நீங்களே கவனித்துக் கொள்ளுங்கள்:

பிறந்த குழந்தையை கவனித்துக்கொள்வது உடல் ரீதியாகவும் உணர்ச்சி ரீதியாகவும் சோர்வாக இருக்கும். இந்த நேரத்தில் சுய கவனிப்புக்கு முன்னுரிமை அளிப்பது முக்கியம். நன்கு சாப்பிடுவதை உறுதிசெய்து கொள்ளுங்கள், நிறைய ஓய்வு பெறுங்கள், அதிக தண்ணீர் குடியுங்கள், தவறாமல் உடற்பயிற்சி செய்யுங்கள். உங்களை நீங்களே கவனித்துக்கொள்வது, புதிய தாய்மையின் சவால்களைச் சமாளிக்கவும் மேலும் ஆரோக்கியமாக இருக்க உதவும்.

தொடர்பில் இருங்கள்:

நீங்கள் மனச்சோர்வைக் கையாளும் போது தனிமைப்படுத்தப்பட்டதாக உணருவது எளிது. ஆகவே, மற்றவர்களுடன் தொடர்பில் இருப்பது முக்கியம். ஒரு புதிய தாய்மார்களின் குழுவில் சேருங்கள், பிரசவத்திற்குப் பிந்தைய மனச்சோர்வுக்கான ஆதரவு குழுவில் சேருங்கள் அல்லது அரட்டையடிக்க நண்பர்களை அணுகவும். மற்றவர்களுடன் தொடர்பு கொள்வது நீங்கள் தனிமையை குறைவாக உணரவும் அதிக ஆதரவைப் பெறவும் உதவும்.

தியானப் பயிற்சி செய்யுங்கள்:

ஆழ்ந்த சுவாச பயிற்சிகள் மற்றும் தியானம் போன்ற நினைவாற்றல் நுட்பங்கள் உங்கள் மனதை அமைதிப்படுத்தவும், கவலை மற்றும் மனச்சோர்வு உணர்வுகளைக் குறைக்கவும் உதவும். ஒவ்வொரு நாளும் உங்களுக்கு ஒய்வு எடுக்க ஒரு சில நிமிடங்கள் மட்டுமே இருந்தாலும், உங்கள் அன்றாட வழக்கத்தில் சிறிது நேரத்திற்கு இந்த பயிற்சியை செய்ய முயற்சிக்கவும்.

யதார்த்தமான எதிர்பார்ப்புகளை அமைக்கவும்:

ஒரு புதிய தாயாக, நீங்கள் உங்கள் மீது வைத்திருக்கும் எதிர்பார்ப்புகளால் அதிகமாக உணருவது எளிது. உதவி கேட்பது மற்றும் உங்களுக்காக யதார்த்தமான எதிர்பார்ப்புகளை அமைப்பது பரவாயில்லை. ஆனால் எல்லாவற்றையும் நீங்கள் தனியாகவே செய்ய வேண்டிய அவசியமில்லை. பணிகளை கணவருக்கும் மற்றவர்களுக்கும் பிரித்து கொடுங்கள். உங்களின் தனிப்பட்ட பணிகளுக்கு முன்னுரிமை கொடுங்கள். எல்லாவற்றிற்கும் மேலாக நீங்கள் உங்களுக்காக மென்மையாக இருங்கள்.

இந்த ஐந்து குறிப்புகளை கடைபிடித்து மனதையும் உடலையும் ஆரோக்கியமாக வைத்திருங்கள். நீங்கள் மனதளவிலும் சரீரத்தாலும் ஆரோக்கியத்தோடு இருந்தால் தான் குழந்தையை ஆரோக்கியமாக வளர்க்க முடியும்.