பழைய பாட்டியும் புதிய பேத்தியும்: யாருடைய உலகம் மிகவும் சிறந்தது?

ஒரு காலத்தில் பாட்டி சொன்னால் அதுவே வேதவாக்கு! இன்று கூகுள் சொன்னால்தான் சில குழந்தைகளுக்கு நம்பிக்கை வருகிறது! அன்று பாட்டியின் மடியில் அமர்ந்து கதை கேட்ட தலைமுறை; இன்று கைப்பேசியில் கதைகளைப் பார்த்து வளரும் தலைமுறை! காலம் மாறிவிட்டது. வாழ்க்கை முறைகள் மாறிவிட்டன. ஆனால் பாட்டிகளுக்கும் பேரன், பேத்திகளுக்கும் இடையே இருக்கும் அன்பு மட்டும் என்றும் மாறுவதில்லை! அதை ஒத்துக் கொள்ள தான் வேண்டும்..

பாட்டிகளின் குழந்தைப் பருவம் என்பது விளையாட்டுகளும் உறவுகளும் நிறைந்த உலகம். பள்ளிக்குச் செல்வது, தோழிகளுடன் விளையாடுவது, வீட்டிற்கு வந்ததும் அம்மாவுக்கு உதவுவது என்று அவர்களுடைய நாட்கள் நகர்ந்தன.

கோலி, பல்லாங்குழி, தாயம், பம்பரம், கண்ணாமூச்சி போன்ற விளையாட்டுகள் அவர்களுடைய பொழுதுபோக்கு. தொலைக்காட்சியும் கைப்பேசியும் இல்லாத காலத்திலும் மகிழ்ச்சிக்குப் பஞ்சமில்லை!

இன்றைய தலைமுறையின் உலகம் முற்றிலும் வேறுபட்டது. ஆன்லைன் வகுப்புகள், ஸ்மார்ட்போன்கள், வீடியோ கேம்கள், சமூக வலைத்தளங்கள் என்று தொழில்நுட்பம் அவர்களுடைய வாழ்க்கையில் முக்கிய இடத்தைப் பிடித்திருக்கிறது. வீட்டில் இருந்தபடியே உலகின் மறுபக்கத்தில் இருப்பவர்களுடனும் பேச முடிகிறது. ஒரு தகவலைத் தெரிந்துகொள்ளப் பாட்டி பழைய புத்தகங்களைத் தேடிய காலம் மாறி, இன்று சில நொடிகளில் இணையத்தில் பதில் கிடைக்கிறது.

ஆனால், எல்லா விஷயங்களிலும் இன்றைய தலைமுறையைக் குறை கூற முடியாது. பெண்கள் கல்வி, வேலைவாய்ப்பு, அறிவியல், விளையாட்டு எனப் பல துறைகளில் முன்னேறுவதற்கான வாய்ப்புகள் அதிகரித்துள்ளன. மனதில் தோன்றும் கேள்விகளைக் கேட்கவும், தங்களுடைய கருத்துகளை வெளிப்படுத்தவும் இன்றைய குழந்தைகள் விரும்புகிறார்கள். அதே நேரத்தில், பாட்டிகளின் வாழ்க்கை அனுபவம், பொறுமை, சிக்கனமாக வாழும் பழக்கம், உறவுகளை மதிக்கும் பண்பு ஆகியவை இன்றும் கற்றுக்கொள்ள வேண்டிய பாடங்களாக இருக்கின்றன.

உணவும் மனநலனும்:

பாட்டிகள் சாப்பிட்ட உணவுக்கும் இன்றைய பேத்திகள் சாப்பிடும் உணவுக்கும் நிறைய வேறுபாடுகள் உள்ளன..

பாட்டிகளின் காலத்தில் வீட்டிலேயே விளைவித்த காய்கறிகள், கீரைகள், சிறுதானியங்கள், பருப்பு வகைகள், கம்பங்கூழ், கேழ்வரகுக் களி எனச் சத்தான உணவுகள் அன்றாட உணவில் இடம் பெற்றன..

ஊறுகாய், வடகம், அப்பளம் போன்றவற்றைக் கூட வீட்டிலேயே தயாரித்தார்கள்.. இன்று அவசர வாழ்க்கையில் பாக்கெட்டுகளில் அடைக்கப்பட்ட உணவுகள், துரித உணவுகள், அதிக சர்க்கரை மற்றும் உப்பு கொண்ட தின்பண்டங்கள் அதிகம் பயன்படுத்தப்படுகின்றன..

சில உணவுகளில் கலப்படம் குறித்த கவலைகளும் உள்ளன.. இருப்பினும் எல்லா நவீன உணவுகளும் ஆரோக்கியமற்றவை என்றோ பழைய உணவுகள் அனைத்தும் கலப்படமற்றவை என்றோ பொதுவாக கூற முடியாது..

மன அழுத்தத்தைப் பொறுத்தவரையிலும் தலைமுறைகளிடையே வேறுபாடுகள் காணப்படுகின்றன.. கூட்டுக் குடும்பத்தில் பலருடன் ஒன்றாக வாழ்ந்த பாட்டிகள் பொருளாதாரச் சிரமங்கள், குடும்பப் பொறுப்புகள், குழந்தை வளர்ப்பு எனப் பல சவால்களை சந்தித்தார்கள்..

வீட்டு வேலைகளைப் பகிர்ந்து கொள்வதும், உறவினர்களுடன் மனம் விட்டுப் பேசுவதும் அவர்களுக்குத் துணையாக இருந்திருக்கலாம்.. ஆனால் அவர்களுக்கு கவலையும் மன அழுத்தமும் இல்லை என்று சொல்ல முடியாது..

இன்றைய பேத்திகள் தனிக்குடித்தனக் குடும்பங்களில் வாழ்ந்தாலும், வேலைப் பளு, குழந்தைகளின் கல்வி, பொருளாதார நெருக்கடி, சமூக வலைத் தள ஒப்பீடுகள், தனிமை போன்ற காரணங்களால் மன அழுத்தத்தை சந்திக்கிறார்கள்..

மன அழுத்தமும் மனச் சோர்வும் எந்த தலைமுறையினரையும் பாதிக்கலாம்.. தேவையான ஓய்வு, உடற்பயிற்சி, குடும்ப ஆதரவு, மனம் விட்டு பேசுதல் ஆகியவை அனைவருக்கும் அவசியம்.. பாட்டிகளின் வாழ்க்கை அனுபவத்தையும் இன்றைய தலைமுறையின் மனநல விழிப்புணர்வையும் இணைத்துக் கொண்டால் ஆரோக்கியமான வாழ்க்கையை அமைத்துக் கொள்ளலாம்..

பாட்டி காலத்து வாழ்க்கை vs பேத்தி காலத்து வாழ்க்கை!!!

பாட்டி காலத்து பெண்களின் வாழ்க்கை முறைக்கும் இன்றைய பேத்திகளின் வாழ்க்கை முறைக்கும் இடையே நிறைய வேறுபாடுகள் உள்ளன.. அன்று குடும்பம், உறவுகள், பாரம்பரியம் ஆகியவற்றுக்கு முக்கியத்துவம் கொடுக்கப்பட்டது.. இன்று தனிமனித சுதந்திரம், சுயமரியாதை, சம உரிமை ஆகியவற்றுக்கும் முக்கியத்துவம் அளிக்கப்படுகிறது.. பாட்டிகளின் காலத்தில் திருமணத்திற்குப் பிறகு கணவரின் விருப்பங்கள், குடும்பத்தின் தேவைகள், மாமியார் மாமனாரின் எதிர்பார்ப்புகள் ஆகியவற்றுக்கு ஏற்ப தங்களை மாற்றிக் கொள்வது பல பெண்களின் வாழ்க்கை முறையாக இருந்தது..

கணவரின் வேலை, குழந்தைகளின் படிப்பு, வீட்டுப் பொறுப்புகள் எனத் தங்களுடைய விருப்பங்களைக் கூட ஒதுக்கி விட்டு குடும்பத்திற்காக உழைத்த பெண்கள் ஏராளம்.. கணவருடன் கருத்து வேறுபாடுகள் ஏற்பட்டாலும் குடும்ப ஒற்றுமையைக் காப்பதற்காகப் பொறுமையாகப் பேசித் தீர்த்துக் கொள்ள முயன்றார்கள்..

ஆனால் இந்த பொறுமையின் பின்னால் சில பெண்களின் நிறைவேறாத கனவுகளும் சொல்லப்படாத வேதனைகளும் இருந்திருக்கலாம் என்பதையும் மறந்து விடக் கூடாது.இன்றைய தலைமுறை பேத்திகள் படித்து வேலைக்குச் சென்று பொருளாதாரச் சுதந்திரத்துடன் வாழ விரும்புகிறார்கள்.. திருமண வாழ்க்கையில் கணவனும் மனைவியும் சமமாக பொறுப்புகளைப் பகிர்ந்து கொள்ள வேண்டும் என்று எதிர்பார்க்கிறார்கள்..

சமையல், குழந்தை வளர்ப்பு, வீட்டு நிர்வாகம் ஆகியவை பெண்களின் கடமை மட்டும் அல்ல.. இருவரும் இணைந்து செய்ய வேண்டிய பொறுப்புகள் என்ற புரிதல் அதிகரித்துள்ளது.. அப்படியானால் இன்றைய பேத்திகள் கணவரை அனுசரித்து போவதில்லையா? அனுசரித்து செல்வது என்பது ஒருவருடைய விருப்பங்களை முழுமையாக தியாகம் செய்வதல்ல..

இருவரும் ஒருவருடைய கருத்துக்களை மற்றவர் மதித்து விட்டுக் கொடுத்துப் புரிந்து கொண்டு வாழ்வதே ஆரோக்கியமான குடும்ப வாழ்க்கை..

சில சமயங்களில் கணவர் மனைவிக்காகவும் மனைவி கணவருக்காகவும் விட்டுக் கொடுக்க வேண்டியிருக்கும்.. பாட்டிகளின் பொறுமையையும் குடும்பத்தை ஒன்றிணைக்கும் திறனும் இன்றைய தலைமுறைக்குத் தேவையானவை.. அதே நேரத்தில் பேத்திகளின் தன்னம்பிக்கையும் சுய மரியாதையும் பாட்டிகளின் தலைமுறையினருக்கும் கிடைத்திருக்க வேண்டிய உரிமைகள் தான்..

எந்த காலமாக இருந்தாலும் அன்பு, மரியாதை, நம்பிக்கை, பரஸ்பரப் புரிதல் ஆகியவையே மகிழ்ச்சியான இல்லறத்தின் அடித்தளங்கள்‌‌. பாட்டிகளும் பேத்திகளும் இரு வேறு காலகட்டங்களைச் சேர்ந்தவர்களாக இருந்தாலும், ஒருவரிடமிருந்து மற்றவர் கற்றுக்கொள்ள ஏராளமான விஷயங்கள் உள்ளன. பாட்டிகள் தொழில்நுட்பத்தைக் கற்றுக்கொள்ளலாம்; பேத்திகள் பாரம்பரியத்தையும் வாழ்க்கை அனுபவத்தையும் கற்றுக்கொள்ளலாம். தலைமுறைகளுக்கு இடையிலான இடைவெளியை அன்பு, உரையாடல், புரிதல் ஆகியவற்றால் குறைக்க முடியும். பாட்டிகளின் அனுபவமும் இந்தத் தலைமுறையின் வேகமும் ஒன்றிணைந்தால், குடும்பம் இன்னும் அழகாகும்! 

இந்தக் கட்டுரையை வாசிப்பதன் மூலம், பழைய தலைமுறையின் அனுபவமும் இன்றைய தலைமுறையின் நவீன சிந்தனையும் இணையும்போது, குடும்ப உறவுகளில் புதிய புரிதலும் நிம்மதியான மகிழ்ச்சியான சூழலும் உருவாகிறது என்பதை புரிந்து கொள்ளலாம்.