சமையலறையின் "சூப்பர் ஹீரோ" பிரஷர் குக்கரை கண்டுபிடித்தது யார் தெரியுமா? ஷாக்கிங் வரலாறு!

நமது அன்றாட சமையலறையில் தவிர்க்க முடியாத ஒரு சாதனமாக பிரஷர் குக்கர் (Pressure Cooker) விளங்குகிறது. பருப்பு, அரிசி மற்றும் கடினமான உணவுகளைச் சில நிமிடங்களிலேயே சமைக்க உதவும் இந்தச் சாதனத்தின் வரலாறு, அறிவியல் கண்டுபிடிப்புகள் மற்றும் தொடர் பரிணாம வளர்ச்சியைக் கொண்டது.

பிரஷர் குக்கரின் அடிப்படை வடிவத்தை முதன்முதலில் கண்டுபிடித்தவர் பிரெஞ்சு நாட்டைச் சேர்ந்த இயற்பியலாளரும் கணிதவியலாளருமான டெனிஸ் பாபின் (Denis Papin) என்பவர், 1679 ஆம் ஆண்டு​ 'டிக்ளரர்' அல்லது 'ஸ்டீம் டைஜெஸ்டர்' (Steam Digester) என்பதைக் கண்டுபிடித்தார்.

​அதாவது, மூடி வைக்கப்பட்ட பாத்திரத்தில் நீராவியின் அழுத்தத்தை உயர்த்துவதன் மூலம் நீரின் கொதிநிலையை அதிகரித்து, உணவை விரைவாக வேகவைக்க முடியும் என்பதை இவர் நிரூபித்தார்.

அதிக அழுத்தத்தால் பாத்திரம் வெடிப்பதைத் தவிர்க்க, நீராவியைத் தேவைக்கேற்ப வெளியேற்றும் பாதுகாப்பு வால்வையும் (Safety Valve) இவரே வடிவமைத்தார்.

டெனிஸ் பாபினின் கண்டுபிடிப்பு ஆரம்பத்தில் ஆய்வகங்களிலும் தொழிலகங்களிலுமே பயன்படுத்தப்பட்டது. அது சாதாரண மக்களின் சமையலறைக்கு வர மேலும் சில நூற்றாண்டுகள் ஆயின.

அடுத்து, அமெரிக்காவைச் சேர்ந்த ஆல்ஃபிரட் விஷ்லர் (Alfred Vischer) என்பவர் 1938 ஆம் ஆண்டு 'ஃப்ளெக்ஸ்-சீல் ஸ்பீட் குக்கர்' (Flex-Seal Speed Cooker) என்ற பெயரில், வீடுகளில் எளிதாகப் பயன்படுத்தக்கூடிய முதல் நவீன பிரஷர் குக்கரை அறிமுகப்படுத்தினார்.

பிறகு, 1939 ஆம் ஆண்டு நியூயார்க் உலகக் கண்காட்சியில், 'நேஷனல் பிரஸ்டோ இண்டஸ்ட்ரீஸ்' (National Presto Industries) நிறுவனம் தனது நவீன அலுமினிய பிரஷர் குக்கர்களைக் காட்சிப்படுத்தியது. இதுவே சர்வதேச அளவில் பிரஷர் குக்கர் பெருமளவில் விற்பனையாகத் தொடங்கக் காரணமாக அமைந்தது.

இந்தியாவில் 1950-களின் இறுதியில் பிரஷர் குக்கர் அறிமுகமானது:

​1955ல் 'டிடிகே பிரஸ்டீஜ்' (TTK Prestige) நிறுவனம் பிரஸ்டீஜ் பிராண்ட் குக்கர்களை இந்திய சந்தைக்குக் கொண்டு வந்தது.

1959ல் எச்.டி.சி (Hawkins Cookers Limited) நிறுவனம் 'ஹாகின்ஸ்' பிரஷர் குக்கர்களை அறிமுகம் செய்தது.

​இந்தியச் சமையலில் பருப்பு, அரிசி மற்றும் காய்கறிகளைச் சமைக்க அதிக நேரமும் எரிபொருளும் தேவைப்பட்டதால், பிரஷர் குக்கர் குறுகிய காலத்தில் இந்திய குடும்பங்களில் நீங்கா இடம் பிடித்தது.

சாதாரண பாத்திரத்தில் நீர் 100°C-இல் கொதிக்கும். ஆனால் பிரஷர் குக்கரில் நீராவி வெளியேற முடியாமல் அழுத்தம் அதிகரிப்பதால், நீரின் கொதிநிலை 120°C வரை உயர்கிறது. இதன் காரணமாக உணவு 70% விரைவாகவும், எரிபொருள் சேமிப்புடனும் சமைக்கப்படுகிறது.

300 ஆண்டுகளுக்கு முன்பு ஒரு சிறிய அறிவியல் சோதனையாகத் தொடங்கிய இந்த முயற்சி, இன்று உலகெங்கிலும் உள்ள சமையலறைகளில் நேரத்தையும் சக்தியையும் மிச்சப்படுத்தும் தவிர்க்க முடியாத சாதனமாக மாறியுள்ளது.

பெண்களின் வேலையைக் குறைக்கும், பிரஷர் குக்கரை பாதுகாப்பான வழியில், எப்படி பராமரிப்பது என்பதை, புதியதாக சமையல் அறையில் புகும் பெண்மணிகள் அறிந்து கொள்ளலாமே.

• குக்கரில் எப்போதும் உணவு மற்றும் தண்ணீரை அதன் கொள்ளளவில் 2/3 பங்குக்கு மேல் நிரப்பக் கூடாது. பருப்பு போன்ற பொங்கும் உணவுகளுக்குப் பாதியளவு மட்டுமே பயன்படுத்த வேண்டும்.

• சமைப்பதற்கு முன் விசிலின் துளை (Vent Pipe) அடைப்பு இன்றிச் சுத்தமாக இருக்கிறதா என்பதையும், கேஸ்கட் (Gasket) நெகிழ்வாக விரிசலின்றி இருக்கிறதா என்பதையும் உறுதிசெய்யவும்.

• மூடியைச் சரியாகப் பொருத்தி லாக் செய்த பிறகே அடுப்பில் வைக்க வேண்டும்.

• சமைத்து முடித்ததும், பாத்திரத்தினுள் உள்ள பிரஷர்/நீராவி முழுமையாக அடங்கிய பிறகே மூடியைத் திறக்க வேண்டும். பலவந்தமாக மூடியைத் திறக்க முயலக் கூடாது.

இந்தக் கட்டுரையை வாசிப்பதன் மூலம், சமையல் நேரத்தை பெருமளவு மிச்சப்படுத்தி, எரிபொருளைச் சேமித்து, சமையலறைப் பணிகளை எளிமையாக்கும் முழுமையான வழிகாட்டலைப் பெறுங்கள்.