விரைவில் விண்வெளிக்கு செல்கிறது ஏஐ பெண் ரோபோ..!

இந்திய விண்வெளி ஆராய்ச்சி நிறுவனம் (இஸ்ரோ) தனது லட்சியமிக்க ககன்யான் திட்டத்தில் மனிதர்களை விண்வெளிக்கு அனுப்புவதற்கு முன்னதாக, `வியோமித்ரா' என்ற பெண் ரோபோவை விண்வெளிக்கு அனுப்ப தயாராகி வருகிறது. இந்த முன்னோடிப் பயணம், மனித விண்வெளிப் பயணத்தின் பாதுகாப்பு மற்றும் வெற்றிக்கு வழி வகுக்கும் ஒரு முக்கியமான படியாகும்.

`வியோமித்ரா' என்பது "வியோம்" (விண்வெளி) மற்றும் "மித்ரா" (நண்பர்) என்ற சமஸ்கிருதச் சொற்களின் கலவையாகும். இந்த ஹியூமனாய்டு ரோபோ, இஸ்ரோவின் திருவனந்தபுரம் விண்வெளிப் பயன்பாட்டு மையத்தில் (VSSC) உருவாக்கப்பட்டுள்ளது. இது ஒரு பெண் போன்ற தோற்றத்தைக் கொண்டிருந்தாலும், அதன் கால்கள் இருக்காது. விண்வெளி ஓடத்தில் உள்ள சூழ்நிலைகளை ஆய்வு செய்வதே இதன் முக்கியப் பணி. இந்த பெண் ரோபோட் கடந்த 2021 ஆம் ஆண்டு உருவாக்கப்பட்டது. இஸ்ரோ திட்டமிட்டுள்ள மனிதர்களை விண்வெளிக்கு அனுப்பும் திட்டத்தில் ஏதேனும் எதிர்பாராத இடர்கள் ஏற்பட்டால், அதை எச்சரிக்கும்.

இந்த ரோபோவின் விண்வெளிப் பயணம் விஞ்ஞானிகளுக்கு, விண்வெளியில் சுவாசிப்பது, பகல் மற்றும் இரவு நேரங்களில் விண்வெளியில் ஏற்படும் மாறுபாடுகள், மற்றும் எதிர்பாராத நிகழ்வுகளின்போது எடுக்கப்பட வேண்டிய முன்னெச்சரிக்கை நடவடிக்கைகள் போன்ற முக்கியமான விஷயங்களைப் புரிந்துகொள்ள பெரிதும் உதவும்.

மேலும் வியோமித்ராவின் முக்கியப் பணிகள்:

விண்வெளிச் சூழல் ஆய்வு: விண்வெளியில் உள்ள நுண் ஈர்ப்பு விசை, கதிர்வீச்சு அளவு, வெப்பநிலை மற்றும் காற்றழுத்தம் போன்ற பல்வேறு காரணிகளை `வியோமித்ரா' பதிவு செய்யும். இந்தத் தரவுகள், மனிதர்கள் விண்வெளியில் எவ்வாறு செயல்படுவார்கள் என்பதைப் புரிந்துகொள்ள உதவும்.

விண்வெளி ஓடத்தின் செயல்பாடுகளைக் கண்காணித்தல்: விண்வெளி ஓடத்தில் உள்ள அமைப்புகள் எவ்வாறு செயல்படுகின்றன என்பதையும், ஏதேனும் அசாதாரண மாற்றங்கள் ஏற்படுகின்றனவா என்பதையும் `வியோமித்ரா' தொடர்ந்து கண்காணிக்கும்.

விண்வெளி வீரர்களின் செயல்பாடுகளைப் பின்பற்றுதல்: விண்வெளி வீரர்கள் மேற்கொள்ளும் சுவாச வீதம், இதயத் துடிப்பு, ஆக்ஸிஜன் பயன்பாடு போன்ற உடல் செயல்பாடுகளைப் `வியோமித்ரா' உருவகப்படுத்தி, விண்வெளிப் பயணத்தால் மனித உடலில் ஏற்படும் மாற்றங்களை மதிப்பிடும்.

அவசர காலங்களில் எச்சரிக்கை: விண்வெளி ஓடத்தில் ஏதேனும் கோளாறுகள் அல்லது அவசர நிலைகள் ஏற்பட்டால், `வியோமித்ரா' உடனடியாக கட்டுப்பாட்டு மையத்திற்குத் தெரிவிக்கும் திறன் கொண்டது.

பேசும் திறன்: இந்த ரோபோ, இந்தி மற்றும் ஆங்கிலம் ஆகிய இரு மொழிகளிலும் பேசும் திறன் கொண்டது. இது கட்டுப்பாட்டு மையத்துடன் தொடர்புகொள்வதற்கும், தகவல்களைப் பரிமாறிக்கொள்வதற்கும் உதவும்.

ககன்யான் திட்டத்தின் ஒரு பகுதியாக, மனிதர்களை விண்வெளிக்கு அனுப்புவதற்கு முன்னர், இரண்டு ஆளில்லாப் பயணங்களை இஸ்ரோ மேற்கொள்ள திட்டமிட்டுள்ளது. இந்த முதல் ஆளில்லாப் பயணத்தில் `வியோமித்ரா' விண்வெளிக்குச் செல்லும். இந்த சோதனைப் பயணம், மனித விண்வெளிப் பயணத்திற்குத் தேவையான அனைத்து அமைப்புகளும் சரியாக செயல்படுகின்றன என்பதை உறுதிப்படுத்தும்.

`வியோமித்ராவின்' வெற்றிகரமான பயணம், இந்தியாவின் விண்வெளி ஆராய்ச்சித் துறையில் ஒரு முக்கிய மைல்கல்லாக அமையும். இது எதிர்கால மனித விண்வெளிப் பயணங்களுக்கு நம்பிக்கையான ஒரு அடித்தளத்தை அமைக்கும் என்பதில் சந்தேகமில்லை.