இந்திய அரசுடன் மோதும் ஆப்பிள் நிறுவனத்திக்கு 3.39 லட்சம் கோடி ரூபாய் அபராதம்..!

உலகிலேயே அதிக மதிப்புள்ள டெக் நிறுவனமான ஆப்பிள், இப்போது இந்திய அரசுடன் ஒரு வரலாறு காணாத சட்டப் போராட்டத்தில் இறங்கியுள்ளது!

இந்தியாவின் புதிய அபராதச் சட்டம் ஆப்பிள் நிறுவனத்தை இதுவரை கண்டிராத மிகப்பெரிய அபராதத்திற்கு, அதாவது சுமார் $38 பில்லியன் டாலர் (தோராயமாக 3,39,340 கோடி இந்திய ரூபாய்கள்) வரை அபராதம் செலுத்த நிர்ப்பந்திக்கலாம். இது உலகின் மிகப்பெரிய கார்ப்பரேட் அபராதங்களில் ஒன்றாக மாறும் அபாயம் உள்ளது.

இந்தியாவின் 2024 போட்டிச் சட்டத்தில் (Competition Act) செய்யப்பட்ட திருத்தத்தை எதிர்த்து, ஆப்பிள் நிறுவனம் நவம்பர் 25 அன்று டெல்லி உயர் நீதிமன்றத்தில் அரசியலமைப்புச் சவாலைத் (Constitutional Challenge) தாக்கல் செய்துள்ளது.

சவாலின் மையப்புள்ளி: புதிய திருத்தத்தின்படி, இந்தியப் போட்டி ஆணையம் (CCI) ஒரு நிறுவனத்தின் மீதான அபராதத்தை, அதன் இந்தியாவுக்குள் ஈட்டிய வருவாய்க்குப் பதிலாக, உலகளாவிய மொத்த வருவாயைக் (Global Turnover) கணக்கில் கொண்டு விதிக்கலாம் என்பதே ஆப்பிளின் மையப் பிரச்சனை.

545 பக்கங்கள் கொண்ட தனது மனுவில், ஆப்பிள் இந்த விதியை "வெளிப்படையாகத் தன்னிச்சையானது, அரசியலமைப்பிற்கு எதிரானது மற்றும் அநீதியானது" என்று கடுமையாகச் சாடியுள்ளது.

ஆப்பிளின் வாதம்: இந்த அபராத விதிமுறையை விளக்கும் விதமாக, ஆப்பிள் ஒரு முக்கியமான ஒப்பீட்டைக் கொடுத்துள்ளது.

நிறுவனத்தின் ஒரு குறிப்பிட்ட வணிகப் பிரிவில் (உதாரணமாக, App Store சேவையில்) தவறு நடந்ததற்காக, ஒட்டுமொத்த உலகளாவிய வருமானத்தின் அடிப்படையில் அபராதம் விதிப்பது என்பது, 'ஒரு பொருளில் தவறு செய்ததற்காக, மொத்த நிறுவனத்தையும் (உதாரணமாக, ஒரு பொம்மை விற்பனையாளரின் அனைத்து வியாபாரத்தையும்) தண்டிப்பதற்கு' சமம் என்று ஆப்பிள் தனது மனுவில் நிதானமாக வாதிட்டுள்ளது.

இவ்வளவு பெரிய அபராதம் வரக் காரணம் என்ன? 2022-ஆம் ஆண்டில் மேட்ச் குரூப் (Match Group) உள்ளிட்ட இந்திய ஸ்டார்ட்அப்கள் அளித்த புகார்தான் இந்தப் போராட்டத்தின் தொடக்கம்.

அந்தப் புகாரை விசாரித்த CCI-யின் புலனாய்வாளர்கள், ஆப்பிள் தனது ஆப் ஸ்டோர் மூலம் தனிச்சிறப்பான ஆதிக்கம் (Monopoly Position) செலுத்துவதாகக் கண்டறிந்தனர்.

iOS பயனர்களுக்கு ஆப்ஸ்களை விநியோகிக்க App Store மட்டுமே ஒரே வழியாக உள்ளதால், டெவலப்பர்கள் தங்கள் ஆப்ஸ்களில் கட்டாயமாக ஆப்பிளின் இன்-ஆப் பர்சேஸ் (IAP) முறையை மட்டுமே பயன்படுத்த வேண்டும் என்றும், இதற்காக ஆப்பிள் வசூலிக்கும் அதிகபட்ச 30% கமிஷனே பிரச்சனைக்கு மையம் என்றும் கண்டறியப்பட்டது.

முடிவு டிசம்பர் 3-ல்! ஆப்பிள் வெற்றி பெறுமா?

ஆப்பிள் விதிக்கும் இந்த விதிகள், போட்டியைக் குறைத்து இந்திய நுகர்வோருக்கு மலிவான கட்டண முறைகள் கிடைப்பதைத் தடுக்கின்றன என்று CCI குற்றம் சாட்டுகிறது.

இந்த வரலாற்றுச் சிறப்புமிக்க வழக்கு, டெல்லி உயர் நீதிமன்றத்தின் தலைமை நீதிபதி தேவேந்திர குமார் உபாத்யாய் தலைமையிலான அமர்வு முன் டிசம்பர் 3-ஆம் தேதி விசாரணைக்கு வருகிறது.

இந்த அபராத விதிகளை எதிர்த்து ஆப்பிள் வெற்றி பெறுவது கடினம் என்று சட்ட வல்லுநர்கள் கருதுகின்றனர். நீதிமன்றத்தின் அடுத்த முடிவை உலகமே எதிர்பார்த்துக் காத்திருக்கிறது.