ரேஷன் கார்டு e-KYC கட்டாயம்: செய்யத் தவறினால் அட்டை ரத்து - மத்திய அரசு எச்சரிக்கை..!

குறைந்த விலையில் உணவுப் பொருட்கள் (PDS), மாநில அரசுகள் தரும் இலவச மற்றும் மானிய உணவுப் பொருட்கள், அரசு உதவித் திட்டங்களில் முன்னுரிமை, வங்கி பள்ளி அலுவலகம் போன்ற பல முக்கிய இடங்களில் அடையாளம் மற்றும் முகவரி சான்று, ONE NATION ONE RATION CARD (ONORC).

இந்தியா முழுவதும் எந்த மாநிலத்திலும் ரேஷன் வாங்கலாம் என்ற சலுகை, பெண்கள் & குழந்தைகளுக்கான நலன் காக்கும் கர்ப்பிணி பெண்களுக்கு ஊட்டச்சத்து மாவு , குழந்தைகளுக்கு கூடுதல் உணவு என வாழ்வின் அத்தனை நிலைகளிலும் பயன்படுகிறது ரேஷன் அட்டை (Ration Card ) எனப்படும் ஒரேயொரு அட்டை.

மேலும் குடும்ப அட்டை பெண் பெயரில் இருப்பதால் அதிகாரத்துடன் அரசு தரும் தற்போதைய சலுகைகள் பெற ஏதுவாக பெண்களை மகிழ்விக்கிறது.

நாடு முழுவதும் உள்ள அனைத்து ரேஷன் அட்டைதாரர்களும் தங்களின் e-KYC (மின்னணு வாடிக்கையாளர் சரிபார்ப்பு) செயல்முறையை முடிக்க வேண்டும் என மத்திய அரசு தற்போது கட்டாயமாக்கியுள்ளது. ரேஷன் அட்டைதாரர்கள் தங்களுக்கு வழங்கப்பட்டுள்ள காலக்கெடுவிற்குள் இந்தச் சரிபார்ப்பை முடிக்காவிட்டால், அவர்களது ரேஷன் அட்டைகள் செயலிழக்கச் செய்யப்படும். இதன் விளைவாக, அரசு வழங்கும் இலவச உணவு தானியங்கள் மற்றும் இதர சலுகைகளைப் பெற முடியாத நிலை ஏற்படும்.

e-KYC என்பது ஒரு பயனர் உண்மையானவர் தானா என்பதை ஆதார் எண், மொபைல் போன் ஓடிபி (OTP) அல்லது கைரேகை (Biometric) மூலம் இணையவழியில் உறுதி செய்யும் நடைமுறையாகும். ரேஷன் அட்டைதாரர்கள் தங்கள் அட்டையை ஆதாருடன் இணைத்து, இந்த மின்னணு சரிபார்ப்பின் மூலம் தகவல்களைப் புதுப்பிக்க வேண்டும். இத்திட்டத்திற்கான காலக்கெடு ஒவ்வொரு மாநிலத்திற்கும் மாறுபடுவதால், பொதுமக்கள் தங்கள் மாநில அரசின் அறிவிப்பைக் கவனித்துச் செயல்படுவது அவசியமாகும்.

இந்தச் செயல்முறையை மேற்கொள்வதற்கு அட்டைதாரர்கள் சில முக்கியமான ஆவணங்களைக் கைவசம் வைத்திருக்க வேண்டும். ரேஷன் கார்டு, ஆதார் அட்டை, வங்கி கணக்குப் புத்தகம், மற்றும் பயன்பாட்டில் உள்ள மொபைல் எண் ஆகியவை இதில் மிக முக்கியமானவை. இவற்றுடன் மாநில அரசுகள் கோரும் இதர ஆவணங்களும் சரியாக இருந்தால் மட்டுமே, தொழில்நுட்பச் சிக்கல்கள் ஏதுமின்றி e-KYC செயல்முறையை வெற்றிகரமாக முடிக்க முடியும்.

அரசாங்கம் இத்தகைய கடுமையான நடவடிக்கையை எடுப்பதற்குக் கல்வி மற்றும் சமூக நலத் திட்டங்கள் தகுதியான குடும்பங்களைச் சென்றடைவதை உறுதி செய்வதே முதன்மைக் காரணமாகும். ஒரே குடும்பத்தில் பலர் வெவ்வேறு அட்டைகளைப் பயன்படுத்திச் சலுகை பெறுவது மற்றும் இறந்தவர்களின் பெயர்களை நீக்காமல் இருப்பது போன்ற முறைகேடுகளைத் தடுக்கவும், போலியான ரேஷன் அட்டைகளைக் கண்டறிந்து நீக்கவும் இந்தச் சரிபார்ப்பு முறை அவசியமாகிறது.

ஒருவேளை KYC சரிபார்ப்பு செய்யத் தவறினால், ரேஷன் பொருட்கள் விநியோகம் நிறுத்தப்படுவதுடன், அரசின் பல்வேறு நிதி உதவித் திட்டங்களும் கிடைக்காமல் போகலாம். எனவே, அரசு வழங்கும் உதவிகள் தடையின்றி கிடைக்கவும், பொது விநியோகத் திட்டத்தில் வெளிப்படைத்தன்மையை உறுதி செய்யவும் இந்த ஆன்லைன் சரிபார்ப்பு முறை பாதுகாப்பான மற்றும் முக்கியமான வழிமுறையாகக் கருதப்படுகிறது.

தற்போதுள்ள நவீனத் தொழில்நுட்ப வளர்ச்சியால், பொதுமக்கள் ரேஷன் கடைக்குச் செல்லாமல் வீட்டிலிருந்தே மொபைல் போன் மூலம் e-KYC-ஐ முடிக்கலாம். 'மேரா KYC' (Mera KYC) மற்றும் 'ஃபேஸ் RD' (Face RD) போன்ற அதிகாரப்பூர்வ செயலிகளைப் பயன்படுத்தி, ஆதார் எண் மற்றும் முகத்தை ஸ்கேன் (Face Scan) செய்வதன் மூலம் இந்தச் சரிபார்ப்பைச் சுலபமாகச் செய்து முடிக்கலாம். அங்கீகரிக்கப்பட்ட பின் அதற்கான டிஜிட்டல் ரசீதையும் உடனடியாகப் பதிவிறக்கம் செய்துகொள்ள முடியும்.