உடனே செக் பண்ணுங்க..! வங்கி கணக்கில் 1 ரூபாய் வந்துடுச்சா? அப்போ உங்களுக்கு 1000 ரூபாய் கன்பார்ம்..!

கலைஞர் மகளிர் உரிமைத்தொகை திட்டத்தில் புதிதாக இணைந்தவர்களுக்கு வரும் டிசம்பர் 15-ம் தேதியில் இருந்து அவர்களது வங்கிக் கணக்குகளில் ரூ.1000 வரவு வைக்கப்படும் என்று முதலமைச்சர் மு.க.ஸ்டாலின் அறிவித்துள்ளார். இதனால், மகளிர் உரிமைத்தொகை வேண்டி புதிதாக விண்ணப்பித்த பெண்கள் மகிழ்ச்சி அடைந்துள்ளனர்.

சட்டமன்ற தேர்தலில் திமுக அரசு கொடுத்த வாக்குறுதியின் படி தமிழகத்தில் 2023-ம் ஆண்டு முதல் மகளிர் உரிமை தொகையாக தகுதியான பெண்களுக்கு மாதந்தோறும் ரூ.1,000 வழங்கப்பட்டு வருகிறது. இந்த திட்டத்தில் தற்போது ஒரு கோடியே 14 லட்சம் பெண்கள் பயனாளிகளாக உள்ளனர்.

அதேசமயம் தகுதி வாய்ந்த பலருக்கும் மகளிர் உரிமைத்தொகை கிடைக்காத நிலையில், அரசுக்கு வேண்டுகோள் வைத்தனர். இதனால் உரிமைத்தொகை இதுவரை கிடைக்காத தகுதி வாய்ந்த மகளிர் அனைவருக்கும் வழங்க அரசு முயற்சி எடுத்தது.

இதற்காக மகளிர் உரிமைத் தொகை திட்டத்தில் விடுப்பட்டவர்களுக்கு உங்களுடன் ஸ்டாலின் முகாம் மூலம் மாநிலம் முழுவதும் விண்ணப்பங்கள் பெறப்பட்டு, அனைத்தும் சரிபார்க்கப்பட்டு விண்ணப்பித்தவர்களில் தகுதியானவர்கள் தேர்வு செய்யப்பட்டு விட்டதாகவும் வரும் டிசம்பர் 15-ம்தேதியில் இருந்து தகுதி வாய்ந்த அனைவருக்கும் ரூ. 1000 வழங்கப்படும் என்ற அரசு அறிவித்துள்ளது.

இந்நிலையில் தகுதியுள்ள விண்ணப்பதாரர்களின் வங்கிக்கணக்குகளை சரிபார்க்கும் பணிகள் நடைபெற்று வருகின்றன. அந்த வகையில் மகளிர் உரிமைத் தொகை திட்டத்தின் கீழ் தேர்வானவர்களின் வங்கிக் கணக்குகளுக்கு ஆயிரம் ரூபாய் அனுப்புவதற்கு முன்பாக ஒரு ரூபாயை அனுப்பி பரிசோதிக்கும் பணிகள் தொடங்க உள்ளதாக கூறப்படுகிறது.

ஒரு ரூபாய் அனுப்பியவுடன் விண்ணப்பதாரர்களின் செல்போனுக்கு குறுஞ்செய்தி வழியாக தகவல் தெரிவிக்கப்படும். தவறான வங்கிக் கணக்குகளுக்கு உரிமைத் தொகை சென்று விடக்கூடாது என்ற எண்ணத்தில் சோதனை அடிப்படையில் ஒரு ரூபாய் அனுப்பப்படும் என தமிழக அரசு வட்டாரங்கள் தெரிவித்தன. மேலும் செல்போன் வழியாக விண்ணப்பதாரர்களை தொடர்பு கொண்டு வங்கிக் கணக்கு விவரங்கள் உறுதி செய்யப்பட்டு வருகின்றன.

அந்த வகையில் உரிமைத்தொகை திட்டத்திற்கு விண்ணப்பித்த உங்களுக்கு வங்கி கணக்கில் 1 ரூபாய் வந்தால் உங்களுக்கு இனி மாதந்தோறும் ரூ.1000 கிடைக்கும் என்பது நிச்சயம்.