லாபத்தில் புதிய உச்சம் தொட்ட இண்டிகோ - அப்படி என்ன மாற்றங்களை செய்தது?

நாட்டின் மிகப்பெரிய விமான நிறுவனமான இண்டிகோவின் தாய் நிறுவனமான இன்டர்குளோப் ஏவியேஷன் தனது நான்காவது காலாண்டில் வரிக்குப் பிறகு அதிகபட்சமாக ரூ.3,067.5 கோடி லாபத்தைப் பதிவு செய்துள்ளது. இதற்கு முக்கிய காரணம் வலுவான விமானப் பயணத் தேவையாகும்.

மார்ச் 2025-ல் முடிவடைந்த மூன்று மாதங்களில் நிறுவனத்தின் வரிக்குப் பிந்தைய லாபம் முந்தைய ஆண்டுடன் ஒப்பிடும்போது ரூ.1,894.8 கோடியிலிருந்து 62% உயர்ந்துள்ளது. இந்தியாவின் மிகப்பெரிய விமான நிறுவனமான இண்டிகோவை நடத்தும் இன்டர்குளோப் ஏவியேஷன், மஹாகும்ப விழாவிற்கான வலுவான தேவையின் காரணமாக, மார்ச் காலாண்டில் இதுவரை இல்லாத அளவுக்கு அதிக லாபத்தை ஈட்டியது. விமான இருக்கைகள் குறைவாக இருந்ததால், பிப்ரவரியில் கட்டணங்கள் உயர்த்தப்பட்டன.

2024-25 நிதியாண்டின், நான்காவது காலாண்டில் இண்டிகோவின் திறன் 21 சதவீதம் அதிகரித்து 42.1 பில்லியனாகவும், சுமந்து செல்லும் பயணிகளின் எண்ணிக்கை 19.6 சதவீதம் அதிகரித்து 31.9 மில்லியனாகவும் உயர்ந்துள்ளதாக அறிக்கையில் தெரிவிக்கப்பட்டுள்ளது.

2024-25 நிதியாண்டின், நான்காவது காலாண்டில் மொத்த வருமானம் ரூ.23,097.5 கோடியாக உயர்ந்துள்ளது. இது ஒரு வருடத்திற்கு முன்பு இதே காலகட்டத்தில் ரூ.18,505.1 கோடியாக இருந்தது.

மார்ச் காலாண்டில், இண்டிகோவின் பயணிகள் டிக்கெட் வருவாய் 25.4 சதவீதம் அதிகரித்து ரூ.1,95,673 மில்லியனாகவும், துணை வருவாய்கள் 25.2 சதவீதம் அதிகரித்து ரூ.21,525 மில்லியனாகவும் ஒரு வருடத்திற்கு முன்பு இதே காலகட்டத்துடன் ஒப்பிடும்போது அதிகரித்துள்ளதாகக் கூறினார்.

இண்டிகோ தலைமை நிர்வாக அதிகாரி பீட்டர் எல்பர்ஸ், 2024-25ம் ஆண்டில் விமான நிறுவனம் 118 மில்லியன் பயணிகளை ஏற்றிச் சென்றதாகக் கூறினார். மேலும் நான்காவது காலாண்டில் தேவை நன்றாக இருந்ததாகவும், வெளிப்படையாக "மகாகும்பமேளா பண்டிகை உதவியது" என்றும் கூறினார்.

பாகிஸ்தான் வான்வெளி மூடப்பட்டதாலும், நடப்பு காலாண்டில் இந்தியாவின் பல விமான நிலையங்கள் மூடப்பட்டதாலும் பாதிக்கப்பட்ட விமான நிறுவனங்களில் இண்டிகோவும் ஒன்று. தாஷ்கண்ட் மற்றும் அல்மாட்டி ஆகிய இரண்டு சர்வதேச வழித்தடத்தில் விமான நிறுவனம் இயக்கும் மொத்த 41 விமானங்கள் இடைநிறுத்தப்பட்டுள்ளன.

பாகிஸ்தான் வான்வெளி மீண்டும் திறக்கப்பட்டதும் தாஷ்கண்ட் மற்றும் அல்மாட்டியை மீண்டும் இயக்குவோம். மூடப்பட்ட 32 விமான நிலையங்களில், 11 விமான நிலையங்கள் இண்டிகோவால் சேவை செய்யப்பட்டன. மொத்தம் ஒரு நாளைக்கு 170 விமானங்கள் ரத்து செய்யப்பட்டன, என்று எல்பர்ஸ் மேலும் கூறினார்.

டிசம்பர் காலாண்டில் 60க்கும் மேற்பட்ட விமானங்கள் நிறுத்தப்பட்ட நிலையில், மார்ச் காலாண்டில் இண்டிகோ இந்த எண்ணிக்கையை 50-59 ஆக உயர்த்தி, நடப்பு காலாண்டில் 40-49 ஆக அதிகரித்துள்ளது.

இண்டிகோ தனது 40 Airbus A321neo விமானங்களில் 'ஸ்ட்ரெட்ச்' வணிக வகுப்பு தயாரிப்பை அறிமுகப்படுத்துகிறது. இந்த 16 விமானங்கள் ஏற்கனவே பயன்பாட்டில் உள்ளன. டெல்லி-பெங்களூரு, டெல்லி-சென்னை மற்றும் டெல்லி-ஹைதராபாத் வழித்தடங்களில் வணிக வகுப்பை விமான நிறுவனம் வழங்குகிறது.

விமான நிறுவனம் 400க்கும் மேற்பட்ட விமானங்களைக் கொண்டுள்ளது. உள்நாட்டு மற்றும் சர்வதேச இடங்களை இணைக்கும் வகையில் 2,200க்கும் மேற்பட்ட தினசரி விமானங்களை இயக்குகிறது.

"இண்டிகோவின் மொத்த ரொக்க இருப்பு ரூ.4,81,705 மில்லியனாக இருந்தது. இதில் ரூ.3,31,531 மில்லியன் இலவச ரொக்கம் மற்றும் ரூ.1,50,174 மில்லியன் கட்டுப்படுத்தப்பட்ட ரொக்கம் ஆகியவை அடங்கும்" என்று அந்த வெளியீடு தெரிவித்துள்ளது.