மழைக்காலத்தில் செய்ய வேண்டியவை..? செய்ய கூடாதவை..? பாதுகாப்பா இருக்க இதையெல்லாம் செய்யுங்க!

சென்னை உள்ளிட்ட தமிழகத்தின் பல மாவட்டங்களில் கனமழை கொட்டி தீர்க்கிறது. மழைக்காலங்களில் அனைவரும் எப்படியெல்லாம் பாதுகாப்பாக இருப்பது, எவற்றையெல்லாம் தவிர்க்க வேண்டும் என்பன உள்ளிட்ட விபரங்களை காணலாம்.

செய்ய வேண்டியவை (Do's):

1. வீட்டிற்குள் பாதுகாப்பாக இருத்தல்: இடி, மின்னல் மற்றும் கனமழை பெய்யும்போது தேவையற்ற பயணங்களை தவிர்த்து வீட்டிற்குள்ளேயே இருக்கவும். கதவு மற்றும் ஜன்னல்களை நன்றாக மூடி வைக்கவும்.

2. குடிநீரை காய்ச்சி அருந்துதல்: குடிநீரை நன்கு காய்ச்சி, வடிகட்டி ஆற வைத்த பிறகே அருந்த வேண்டும். சுடச்சுட சமைத்த உணவுகள், சூப், ரசம் மற்றும் கஞ்சி போன்றவற்றை உட்கொள்வது உடல் ஆரோக்கியத்திற்கு நல்லது.

3. முன்னெச்சரிக்கை பொருட்கள் & மருந்துகள்: சாதாரண காய்ச்சல், சளி, இருமலுக்கான மாத்திரைகள், டெட்டால், தைலம், கொசுவத்தி சுருள் மற்றும் அத்தியாவசிய மளிகைபொருட்களை முன்கூட்டியே வாங்கி வைக்கவும்.

4. அவசர விளக்குகள் & பவர் பேங்க்: மின்தடை ஏற்பட வாய்ப்புள்ளதால் எமர்ஜென்சி விளக்குகள், மெழுகுவர்த்தி, பேட்டரி செல்கள் மற்றும் மொபைல் போன் / பவர் பேங்குகளை முழுமையாக சார்ஜ் செய்து தயாராக வைத்திருக்கவும்.

5. முக்கிய ஆவணங்கள் பாதுகாப்பு: குடும்ப அட்டை, ஆதார், சொத்து ஆவணங்கள் மற்றும் வங்கிப் புத்தகங்களை பிளாஸ்டிக் கவர்களில் சுற்றி உயரமாக உள்ள அலமாரிகளில் பத்திரப்படுத்தவும்.

6. அவசர உதவி எண்கள் சேமிப்பு: மாநில/மாவட்ட பேரிடர் மேலாண்மை எண்கள் மற்றும் மின்வாரிய உதவி எண் ஆகியவற்றை மொபைலில் சேமித்து வைத்துக்கொள்ளவும்.

7.வீட்டு பராமரிப்பு: ஓட்டு வீடுகளின் மீது பிளாஸ்டிக் ஷீட் விரித்தல், பாத்ரூம் மரக்கதவுகளின் கீழ் அலுமினிய தகடு பொருத்துதல் மற்றும் கான்கிரீட் தளங்களில் தண்ணீர் கசிவை லீக்கேஜ் புரூப் மூலம் அடைப்பது அவசியம்.

8.பாதுகாப்பான பயணம் & ஹோம் செப்பல்: தவிர்க்க முடியாத சூழலில் வெளியே செல்லும்போது சாலையின் நடுவே கவனமாக செல்லவும் (பள்ளங்கள், மேன்ஹோல்களை தவிர்க்க). வீட்டிற்குள் ரப்பர் செருப்பு (Home Slipper) அணிவது ஈரப்பதம் மற்றும் மின்கசிவு அதிர்ச்சியிலிருந்து காக்கும்.

9.செல்லப்பிராணிகள் பாதுகாப்பு: வளர்ப்புப் பிராணிகளை மழை நீரில் நனையாதவாறு பாதுகாப்பான கூரைக்கு அடியில் கட்டி வைக்கவும்.

செய்யக் கூடாதவை (Don'ts):

1. மின்கம்பங்கள் அருகே செல்லக்கூடாது: ஈரமான கைகளால் சுவிட்சுகளை இயக்கக் கூடாது. மின்கம்பங்கள், மின்மாற்றிகள் (Transformers) மற்றும் மின் பகிர்வுப் பெட்டிகள் அருகே செல்லவோ, கால்நடைகளைக் கட்டவோ கூடாது.

2. மின் சாதனங்களைப் பயன்படுத்துதல்: இடி, மின்னலின் போது மெயின் பவர் சப்ளையில் திடீர் மின் ஏற்ற இறக்கம் ஏற்படும் என்பதால் டிவி, கணினி, மிக்ஸி, செல்போன் சார்ஜர்களின் பிளக்குகளை துண்டித்து விட வேண்டும்.

3. மரங்களின் கீழ் நிற்பதைத் தவிர்க்கவும்: பச்சை மரங்கள் மின்சாரத்தை கடத்தும் என்பதால், மின்கம்பிகளுக்கு அருகில் உள்ள மரங்களின் கீழ் நிற்பதையோ அல்லது வாகனங்களை நிறுத்துவதையோ தவிர்க்க வேண்டும்.

4. மழை நேரத்தில் குளிக்கக் கூடாது: இடி, மின்னலின் போது உலோக பைப்புகள் வழியாக மின்சாரம் பாய வாய்ப்புள்ளதால் ஓடும் தண்ணீரில் குளிப்பதை தவிர்க்க வேண்டும்.

5. அறுந்து கிடக்கும் கம்பிகளைத் தொடக்கூடாது: சாலையில் அறுந்து கிடக்கும் மின்கம்பிகளை தொடக் கூடாது; உடனடியாக மின்வாரியத்திற்கு தகவல் தெரிவிக்க வேண்டும்.

6. குளிர்ச்சியான & திறந்தவெளி உணவுகள்: தயிர், வெண்ணெய், நெய் போன்ற குளிர்ச்சியான உணவுகளையும், திறந்தவெளியில் விற்கப்படும் பழச்சாறுகளையும் அருந்த கூடாது. செரிமானத்திற்கு சிரமமான அசைவ உணவுகளை குறைத்து கொள்ளவும்.

7. தண்ணீர் தேங்க விடுதல்: மொட்டை மாடி, பால்கனி மற்றும் வீட்டின் வெளிப்புறங்களில் தேவையற்ற பொருட்களைப் போட்டு வைக்கக் கூடாது. தேங்கும் நீரில் கொசுக்கள் உற்பத்தியாகி டெங்கு போன்ற நோய்களைப் பரப்பும்.

8. கட்டுமானப் பணிகளை தொடரக் கூடாது: மழைக்காலத்தில் கான்கிரீட் தளம் போடுவதைத் தவிர்க்க வேண்டும். உயரமான இடங்களில் பணிபுரிபவர்கள் மின்னல் நேரத்தில் உலோகப் பொருட்களைக் கையாள்வதையோ, டவர் கிரேன்களை இயக்குவதையோ தவிர்க்க வேண்டும்.