வாகன ஓட்டிகளே உஷார்: கடுமையாகும் போக்குவரத்து விதிமீறல் சட்டங்கள்..!

மத்திய அரசு மோட்டார் வாகனச் சட்டத்தில் (Motor Vehicles Act) விரிவான திருத்தங்களைக் கொண்டுவரத் தயாராகி வருகிறது. அதாவது மத்திய சாலைப் போக்குவரத்து மற்றும் நெடுஞ்சாலை அமைச்சகம், மோட்டார் வாகனச் சட்டத்தில் பல புதிய திருத்தங்களைச் செய்து, வரவிருக்கும் நாடாளுமன்றத்தின் மழைக்காலக் கூட்டத்தொடரில் (ஜூலை 20 முதல் ஆகஸ்ட் 13, 2026 வரை) தாக்கல் செய்யப்பட உள்ளதாக அறிவித்துள்ளது.

சாலைப் போக்குவரத்து மற்றும் நெடுஞ்சாலைத் துறை அமைச்சகத்தால் (MoRTH) தயாரிக்கப்பட்டுள்ள இந்தச் சட்டப்பூர்வ நடவடிக்கையானது, வழக்கமாகப் போக்குவரத்து விதிகளை மீறுபவர்கள், காப்பீடு (insurance) இல்லாத வாகனங்களைப் பயன்படுத்துபவர்கள் ஆகியோரைக் குறிவைப்பதுடன், ஓட்டுநர்களின் பொறுப்புணர்வை அதிகரிப்பதற்கான கடுமையான வழிகாட்டுதல்களையும் அறிமுகப்படுத்துகிறது.

வழக்கமாக விதிமீறல்களில் ஈடுபடுபவர்கள் தங்களது ஓட்டுநர் உரிமத்தைப் (licence) புதுப்பிப்பதற்கு முன்பு, புதிய ஓட்டுநர் தேர்வில் தேர்ச்சி பெறுவதைக் கட்டாயமாக்கும் திட்டத்தை சாலைப் போக்குவரத்து அமைச்சகம் தயாரித்துள்ளது.

அதேபோல் அடிக்கடி போக்குவரத்து விதிகளை மீறுபவர்கள் மீண்டும் ஓட்டுநர் தேர்வு எழுத வேண்டும் மற்றும் பல முறை விதிமீறலில் ஈடுபட்டால் ஓட்டுநர் உரிமம் (licence) ரத்து செய்யப்படும் என்பது போன்ற கடுமையான கட்டுப்பாடுகள் இதில் இடம்பெற்றுள்ளன.

மாநிலங்கள் மற்றும் பல்வேறு அமைச்சகங்களுடன் ஏறக்குறைய இரண்டு ஆண்டுகாலக் கலந்தாலோசனைகளுக்குப் பிறகு, இந்தத் திருத்த வரைவு கடந்த வாரம் பாதுகாப்புத் துறை அமைச்சர் ராஜ்நாத் சிங் தலைமையிலான அமைச்சர்களின் குழுவிடம் சமர்ப்பிக்கப்பட்டது. இக்குழு இதற்கு ஒப்புதல் அளித்துள்ளதால், மசோதாவை இறுதி செய்து சட்டமியற்றுபவர்களிடம் சமர்ப்பிப்பதற்கான வழிவகை ஏற்பட்டுள்ளது. பொறுப்பற்ற முறையில் வாகனம் ஓட்டுபவர்கள் மற்றும் காப்பீடு இல்லாமல் இயக்கப்படும் வாகனங்கள் மீது கடுமையான நடவடிக்கைகளை மேற்கொள்வதன் மூலம் சாலைப் பாதுகாப்பை உறுதி செய்வதே இந்த மாற்றங்களின் முக்கிய நோக்கமாகும்.

நாடாளுமன்ற மழைக்கால கூட்டத்தொடரில் அறிமுகமாகவுள்ள இந்த சட்டத்திருத்தத்தின் முக்கிய அம்சங்கள்:

* தற்போது வரை சாலை விபத்துகளில் பாதிக்கப்பட்டவர்களின் குடும்பங்கள் இழப்பீட்டைப் பெற பல ஆண்டுகள் வரை காத்திருக்க வேண்டிய நிலை உள்ளது. அதை மாற்றும் வகையில், மிகவும் தொலைநோக்கு பார்வை கொண்ட முன்மொழிவுகளில் ஒன்று இதில் சேர்க்கப்பட்டுள்ளது. ஒரு வழக்கு முழுமையாக முடிவடையும் வரை பாதிக்கப்பட்டவர்கள் காத்திருக்க வேண்டிய கட்டாயத்தைத் தவிர்த்து, இடைக்கால இழப்பீட்டை (interim compensation) வழங்கும் அதிகாரத்தை 'மோட்டார் வாகன விபத்து இழப்பீட்டுத் தீர்ப்பாயங்களுக்கு' (MACTs) வழங்க அமைச்சகம் விரும்புகிறது. இந்தத் திட்டத்தின்படி, தீர்ப்பாயம் "தனக்குச் சரி என்று தோன்றும் இடைக்கால நிவாரணத்தை வழங்கலாம்". இந்த மாற்றம், துயரத்தில் இருக்கும் அல்லது காயமடைந்த குடும்பங்களுக்கு விரைவான நிவாரணத்தை அளிக்கக்கூடும்.

தீர்ப்பாயத்தின் உத்தரவை எதிர்த்து மேல்முறையீடு செய்பவர்களுக்கான நிதிச் சுமையையும் இந்த வரைவு கடுமையாக்குகிறது.

தற்போது, ஒரு காப்பீட்டு நிறுவனமோ அல்லது தவறு செய்த தரப்போ தீர்ப்பாயத்தின் தீர்ப்பை எதிர்த்துப் போட்டியிட விரும்பினால், 25,000 ரூபாய் அல்லது வழங்கப்பட்ட இழப்பீட்டுத் தொகையில் பாதி (எது குறைவோ அது) மட்டுமே முன்கூட்டியே வைப்புத்தொகையாக (pre-deposit) செலுத்த வேண்டும்.

இனி இத்தொகை ரூ. 10 லட்சம் அல்லது வழங்கப்பட்ட இழப்பீட்டுத் தொகையில் 50 சதவீதம் - இதில் எது குறைவோ - அந்த அளவுக்கு உயர்த்தப்படும். அதேபோல, ஒரு வழக்கை உயர் நீதிமன்றத்திற்கு எடுத்துச் செல்வதற்கான குறைந்தபட்ச இழப்பீட்டுத் தொகை வரம்பு ரூ. 1 லட்சத்திலிருந்து ரூ. 5 லட்சமாக உயர்த்தப்படும்; இதனால் சட்டப் போராட்டங்களை நீட்டிக்கச் செய்வது அதிக செலவு பிடிக்கும் விஷயமாக மாறும்.

* ஒரு வாகன ஓட்டுநர் ஒரு வருடத்தில் 5 முறைக்கு மேல் போக்குவரத்து விதிகளை மீறினால், அவரது ஓட்டுநர் உரிமம் தற்காலிகமாகவோ அல்லது முழுமையாகவோ ரத்து செய்யப்படும்.

* ஓட்டுநர் உரிமம் ரத்து செய்யப்படும் எவரும், புதிய உரிமத்திற்கு விண்ணப்பிப்பதற்கு முன்பு முழுமையாக மூன்று ஆண்டுகள் காத்திருக்க வேண்டும் என்று அமைச்சகம் முன்மொழிந்துள்ளது. இந்த விதி குறிப்பாகத் தொடர் விதிமீறல்களில் ஈடுபடுபவர்களைக் குறிவைத்துக் கொண்டுவரப்படுகிறது.

* தற்போது, 40 வயதிற்கு மேற்பட்ட ஓட்டுநர்கள் புதிய உரிமம் பெறவோ அல்லது இருக்கும் உரிமத்தைப் புதுப்பிக்கவோ மருத்துவச் சான்றிதழ் (medical certificate) சமர்ப்பிக்க வேண்டும். அந்த வயது வரம்பு இப்போது 60 ஆக உயர்த்தப்பட உள்ளது.

இதன் மூலம் இளைஞர்கள் மற்றும் நடுத்தர வயதுடைய ஓட்டுநர்கள் தங்கள் உரிமத்தைப் புதுப்பிக்கும்போது ஒரு கூடுதல் நடைமுறைச் சுமை குறையும்.

* தொடர்ச்சியாக விதிகளை மீறும் habitual offenders எனப்படும் வழக்கமான விதிமீறல் குற்றவாளிகள், தங்கள் ஓட்டுநர் உரிமத்தைப் புதுப்பிக்க வேண்டும் என்றால் கட்டாயமாக புதிய ஓட்டுநர் தேர்வில் தேர்ச்சி (Driving Re-tests)பெற வேண்டும். அத்துடன் ஓட்டுநர் உரிமங்களை ரத்து செய்தல் மற்றும் வாகனக் காப்பீடு ஆகியவற்றில் கடுமையான கட்டுப்பாடுகளும் விதிக்கப்படும்.

* இ-சலான் (e-challan) மூலம் விதிக்கப்படும் அபராதத் தொகையை 45 நாட்களுக்குள் செலுத்த வேண்டும். இல்லையெனில், அபராதம் செலுத்தும் வரை ஓட்டுநர் உரிமம் அல்லது வாகனப் பதிவு தொடர்பான சேவைகள் வட்டாரப் போக்குவரத்து அலுவலகத்தில் (RTO) முடக்கப்படும்.

* இருப்பினும், அனைத்து முன்மொழிவுகளுக்கும் வரவேற்பு கிடைத்துவிடவில்லை. ஆறு வயதுக்குட்பட்ட குழந்தையை ஏற்றிச் செல்லும்போது போக்குவரத்து விதிகளை மீறும் ஓட்டுநர்களுக்கு "இரட்டிப்பு அபராதம்" விதிக்கும் திட்டம் பலரையும் யோசிக்க வைத்துள்ளது.

இந்த குறிப்பிட்ட பிரிவு, போக்குவரத்து காவல்துறையினரால் தவறாகப் பயன்படுத்தப்படுவதற்கு வழிவகுக்கும் என்றும், குழந்தைகளின் பாதுகாப்புக்காகக் கொண்டுவரப்படும் ஒரு நடவடிக்கை, சாலையில் வாகன ஓட்டிகளை அலைக்கழிப்பதற்கான ஒரு கருவியாக மாறக்கூடும் என்றும் நிபுணர்கள் அஞ்சுகின்றனர்.

இந்தச் சட்ட முன்மொழிவுகள், இந்த ஆண்டின் தொடக்கத்தில் ஏற்கனவே அறிமுகப்படுத்தப்பட்ட தொழில்நுட்ப அடிப்படையிலான கடுமையான அமலாக்க விதிகள் மற்றும் காலாவதியான ஓட்டுநர் உரிமங்களுக்கான 30 நாட்கள் சலுகைக் காலம் ஆகியவற்றின் அடிப்படையில் உருவாக்கப்பட்டுள்ளன.

மேலும், விபத்துகளைக் குறைக்கும் நோக்கில் தேசிய நெடுஞ்சாலைகளில் உள்ள சுங்கச்சாவடிகளில் (Toll plazas) நிலுவையில் உள்ள கட்டணங்களைச் செலுத்தாத வாகனங்களின் ஓட்டுநர் உரிமம் மற்றும் தேசிய அனுமதி (National Permit) ஆகியவை ரத்து செய்யப்படுவது ஏற்கனவே மத்திய மோட்டார் வாகன (இரண்டாவது) திருத்த விதிகள், 2026 மூலம் நடைமுறைக்கு வந்துள்ளது.

அமைச்சர்களின் முறைசாராக் குழு இதற்கு ஒப்புதல் அளித்துள்ள நிலையில், மசோதாவின் இறுதி வடிவத்தைத் தயாரிக்கும் பொறுப்பு இப்போது சாலைப் போக்குவரத்து அமைச்சகத்தின் கையில் உள்ளது. திட்டமிட்டபடி அனைத்தும் சரியாக நடந்தால், நாடாளுமன்ற மழைக்காலக் கூட்டத்தொடரின் போது இந்த விவகாரத்தை நாடாளுமன்றம் கையில் எடுக்கலாம்.

இதன் பொருள், அடிக்கடி விதிகளை மீறுபவர்கள், காப்பீடு இல்லாத வாகன உரிமையாளர்கள், மற்றும் உரிமம் இடைநீக்கம் செய்யப்பட்ட பிறகு விரைவாகப் புதுப்பிக்கலாம் என்று நம்பியிருப்பவர்களுக்கு விரைவில் முற்றிலும் மாறுபட்ட விதிகளின் கீழ் வாகனம் ஓட்ட நேரிடலாம்.