News 5 – (06-09-2024) 'THE GOAT' வசூல் சாதனை!

அமெரிக்க அதிபரானால், முதல்முறை வீடு வாங்குவோருக்கு 20 லட்ச ரூபாய் கடன் தள்ளுபடி என வாக்குறுதி அளித்திருந்த கமலா ஹாரிஸ்க்கு போட்டியாக, அரசு நிலங்களில் புதிய குடியிருப்புகள் உருவாக்கப்பட்டு மலிவு விலையில் விற்கப்படும் என டிரம்ப் வாக்குறுதி அறிவித்துள்ளார்.

குரங்கம்மை பரவலின் ஆரம்பப்புள்ளியாக கருதப்படும் ஆப்ரிக்க நாடான காங்கோவுக்கு, முதல் தவணையாக 99 ஆயிரம் தடுப்பூசிகளை ஐரோப்பிய ஒன்றியம் நன்கொடையாக வழங்கியுள்ளது.

இந்தாண்டு காங்கோவில், குரங்கம்மையால் சுமார் 5,000 பேர் பாதிக்கப்பட்டு, அவர்களில் 655 பேர் உயிரிழந்தனர். இந்நிலையில், காங்கோவுக்கு 2 லட்சம் தடுப்பூசிகளை வழங்கப்போவதாக ஐரோப்பிய ஒன்றியம் அறிவித்துள்ளது.

மக்கள் மத்தியில் தடுப்பூசிகள் குறித்து அச்சம் நிலவுவதால், அடுத்த ஒரு மாதத்துக்கு விழிப்புணர்வு பிரச்சாரம் மேற்கொள்ள இருப்பதாகவும், அதன் பிறகு தடுப்பூசி செலுத்த உள்ளதாகவும் அந்நாட்டு அரசு தெரிவித்துள்ளது.

திருச்செந்தூர் - திருநெல்வேலி இடையிலான பயணிகள் ரயில் சேவை செப்டம்பர் 9 முதல், அக்டோபர் 3 வரை, 25 நாட்களுக்கு ரத்து செய்யப்படுவதாக அறிவிக்கப்பட்டுள்ளது.

திருநெல்வேலி சந்திப்பு ரயில் நிலையத்தில் பிட் லைன் பராமரிப்பு பணிகள் நடைபெற உள்ளதன் காரணமாக காலை 8.15 மணிக்கு திருச்செந்தூரில் இருந்து திருநெல்வேலி நோக்கி புறப்படும் ரயிலும், மாலை 4.30 மணிக்கு திருநெல்வேலியில் இருந்து திருச்செந்தூர் நோக்கி புறப்படும் ரயிலும் ரத்து செய்யப்படுவதாக அறிவிக்கப்பட்டுள்ளது.

தளபதி விஜய் நடிப்பில் இயக்குனர் வெங்கட் பிரபு இயக்கத்தில் உருவாகி நேற்று வெளிவந்த திரைப்படம் 'THE GOAT'. இப்படத்தை ஏஜிஎஸ் நிறுவனம் தயாரிக்க யுவன் ஷங்கர் ராஜா இசையமைத்திருந்தார்.

இந்த திரைப்படம் முதல் நாளே ரூ.95 லிருந்து ரூ.100 கோடி வரை வசூல் செய்துள்ள நிலையில், இனி வரும் நாட்களிலும் இப்படத்தின் வசூல் பல சாதனைகளை படைக்கும் என கூறப்படுகிறது.

மங்கோலியா - சிங்கப்பூர் அணிகள் மோதிய உலகக் கோப்பை டி20 - 2026 தொடருக்கான தகுதி சுற்று போட்டியில், சிங்கப்பூர் அணி வெறும் 5 பந்துகளில் ஆட்டத்தை வென்று சாதனை படைத்துள்ளது.

2026-ஆம் ஆண்டுக்கான டி20 தகுதிச் சுற்று போட்டிகள், தற்போது நடைபெற்று வருகின்றன. இதில் மங்கோலியா - சிங்கப்பூர் அணிகள் நேற்று மோதின. முதலில் பேட்டிங் செய்த மங்கோலிய அணி 10 ரன்களுக்கு அனைத்து விக்கெட்டுகளையும் இழந்தது. பின்னர் ஆடிய சிங்கப்பூர் அணி, வெறும் 5 பந்துகளில் 13 ரன்கள் எடுத்து போட்டியை வென்றது.