News 5 – (24.10.2024) 'ஜெயிலர் 2' திரைப்படத்தில் ரஜினியுடன் தனுஷ் நடிக்கிறாரா?

தீபாவளி பண்டிகை நெருங்கிவரும் நிலையில், தமிழகம் முழுவதும் அரசு அலுவலகங்களில் லஞ்ச ஒழிப்புப் போலீசார் தீவிர சோதனையில் ஈடுபட்டுள்ளனர். அந்த வகையில், ஊழியர்களிடம் இருந்து கணக்கில் வராத 33 லட்சத்து 50 ஆயிரம் ரூபாய் ரொக்கப் பணம் மற்றும் பரிசுப் பொருட்கள் பறிமுதல் செய்யப்பட்டுள்ளன.

ரேஷன் கடைகளின் வாயிலாக வங்கி சேவைகளைத் தொடங்க தமிழ்நாடு அரசு முடிவு செய்துள்ளது. கூட்டுறவு சங்கத்தால் செயல்படுத்தப்படும் ரேஷன் கடைகளில் மத்திய கூட்டுறவு வங்கிகளில் வழங்கும் சேவைகள் வழங்கப்பட உள்ளன. அதாவது ரேஷன் கடைகள் மூலமாக மத்திய கூட்டுறவு வங்கிகளில் சேமிப்பு கணக்குகளை தொடங்கலாம். ஒரு கணக்குக்கு 5 ரூபாய் ஊக்கத்தொகையாக வழங்கவும் உத்தரவிடப்பட்டுள்ளது.

பொது இடங்களில் குப்பை கொட்டும் நபர்களைக் கண்காணிக்க AI தொழில்நுட்பத்துடன் கூடிய சிசிடிவி கேமராக்களைப் பொருத்த சென்னை மாநகராட்சி முடிவு செய்துள்ளதாக தகவல் வெளியாகியுள்ளது. விதிகளை மீறி பொது இடங்களில் குப்பை கொட்டியவர்களிடம், இதுவரை 18 லட்ச ரூபாய் அபராதம் வசூலிக்கப்பட்டதாகவும் கூறப்படுகிறது.

'கூலி' படத்தைத் தொடர்ந்து நடிகர் ரஜினிகாந்த் நெல்சனின் இயக்கத்தில் 'ஜெயிலர் 2' படத்தில் நடிக்கவுள்ளார். இன்னும் ஓரிரு மாதங்களுக்குள் இப்படத்தின் அதிகாரபூர்வ அறிவிப்பு வெளியாகும் என எதிர்பார்க்கப்படுகிறது. கடந்த சில நாட்களாக 'ஜெயிலர் 2' திரைப்படத்தில் ரஜினியுடன் இணைந்து தனுஷ் நடிக்க இருப்பதாக ஒரு தகவல் பரவி வந்தது. இந்நிலையில், தற்போது அது வதந்தி என கூறப்படுகிறது.

இந்தியா - நியூசிலாந்து அணிகளுக்கு இடையேயான 2வது டெஸ்ட் போட்டி புனேவில் இன்று காலை 9.30க்கு தொடங்கியது. முதல் போட்டியில் அடைந்த தோல்விக்கு இந்தியா பதிலடி தருமா என ரசிகர்கள் எதிர்பார்த்து இருக்க, இந்திய அணியோ சிக்கலில் உள்ளது. அதாவது நியூசிலாந்துக்கு எதிரான 2வது டெஸ்டில் இந்தியா தோல்வி அடைந்தால் அடுத்ததாக விளையாட உள்ள 6 டெஸ்ட் போட்டிகளில், 4ல் வென்றால் மட்டுமே டெஸ்ட் சாம்பியன்ஷிப் இறுதிப்போட்டிக்கு தகுதி பெற முடியும்.