நீங்கள் போடும் பணம் அப்படியே டபுள் ஆகும்..! 100% மத்திய அரசு உத்தரவாதத்துடன்..!

நீண்ட கால முதலீடு மற்றும் பாதுகாப்பான சேமிப்பு என்றாலே நம் நினைவுக்கு வருவது மத்திய அரசின் சிறிய சேமிப்பு திட்டங்கள் தான். குறிப்பாக, வங்கி ஃபிக்சட் டெபாசிட்டுகளை காட்டிலும் கூடுதல் பாதுகாப்பு மற்றும் கவர்ச்சிகரமான வட்டி லாபத்தைத் தரும் மத்திய அரசின் பிபிஎஃப் (PPF) மற்றும் கிசான் விகாஸ் பத்ரா (KVP) திட்டங்கள் குறித்துப் பலரும் அறிந்திருப்போம். ஓய்வுக் காலத்திலோ அல்லது எதிர்கால தேவைகளுக்காகவோ பணத்தை சேமிக்க திட்டமிடுபவர்களுக்கு இந்த இரண்டு திட்டங்களும் மிக சிறந்த தேர்வாக உள்ளன. அவை குறித்த முழுமையான தகவல்களை பார்ப்போம்.

பொது வருங்கால வைப்பு நிதி (PPF - Public Provident Fund):

நீண்ட கால திட்டங்களில் மிக விசுவாசமான முதலீட்டாளர்களை கொண்ட திட்டம் என்றால் அது பிபிஎஃப் எனப்படும் பொது வருங்கால வைப்பு நிதிதான். இதன் சிறப்பம்சங்கள் என்னவென்று விரிவாக பார்ப்போம்:

• முதலீட்டு வரம்பு மற்றும் காலம்: இத்திட்டத்தின் அடிப்படை முதிர்வுக் காலம் 15 ஆண்டுகள் ஆகும். எனினும், முதலீட்டாளர்களின் விருப்பத்திற்கேற்ப இதனை மேலும் 5 ஆண்டுகள் வரை நீட்டித்துக் கொள்ளும் வசதியும் உண்டு. ஒரு நிதியாண்டில் குறைந்தபட்சம் ரூ. 500 முதல் அதிகபட்சமாக ரூ. 1,50,000 வரை இதில் முதலீடு செய்யலாம். இந்த தொகையை ஒரே தவணையாகவோ அல்லது ஆண்டுக்கு அதிகபட்சம் 12 தவணைகளாகவோ பிரித்துச் செலுத்தலாம்.

• வரிச் சலுகை (Tax Benefits): வருமான வரி சட்டம் பிரிவு 80C-ன் கீழ் இத்திட்டத்தில் செய்யப்படும் முதலீடுகளுக்கு முழுமையான வரி விலக்கு பெற முடியும் என்பது இதன் மிகப்பெரிய பலமாகும்.

• வட்டி விகிதம் மற்றும் கடன் வசதி: தற்போது இத்திட்டத்திற்கு ஆண்டுக்கு 7.1% வட்டி வழங்கப்பட்டு வருகிறது. அவசர தேவைகளுக்காக கணக்குத் தொடங்கி 3 முதல் 6 ஆண்டுகளுக்குள் நாம் செலுத்திய தொகையில் இருந்து 25% வரை கடன் பெறும் வசதியும் இதில் உள்ளது. மேலும், 5 ஆண்டுகளுக்கு பிறகு குறிப்பிட்ட நிபந்தனைகளின் அடிப்படையில் கணக்கிலிருந்து பணத்தை முன்பணமாக பெற்று கொள்ளவும் முடியும்.

கிசான் விகாஸ் பத்ரா (KVP - Kisan Vikas Patra):

விவசாயிகளுக்காக 1988-ஆம் ஆண்டு தொடங்கப்பட்ட கிசான் விகாஸ் பத்ரா திட்டம், தற்போது நாட்டின் அனைத்து குடிமக்களும் சேமிக்கும் வகையில் அஞ்சல் அலுவலகங்கள் மூலம் வெற்றிகரமாக செயல்படுத்தப்பட்டு வருகிறது.

• முதலீட்டு முறை: இத்திட்டத்தில் குறைந்தபட்சம் ரூ. 1,000 முதலீடு செய்ய வேண்டும். அதிகபட்ச முதலீட்டிற்கு எத்தகைய வரம்பும் கிடையாது. ரூ. 100-ன் மடங்குகளில் எவ்வளவு தொகையை வேண்டுமானாலும் முதலீடு செய்யலாம்.

• பணம் இரட்டிப்பாகும் திட்டம்: கிசான் விகாஸ் பத்ரா திட்டத்தின் முதிர்வுக் காலம் 9 ஆண்டுகள் 7 மாதங்கள் (115 மாதங்கள்) ஆகும். தற்போது இத்திட்டத்திற்கு 7.5% வட்டி வழங்கப்படுகிறது. இந்த வட்டி விகிதம் ஆண்டுதோறும் கூட்டு முறையில் கணக்கிடப்படுவதால், திட்டத்தின் முதிர்வு காலத்தில் நாம் முதலீடு செய்த அசல் தொகை அப்படியே இரட்டிப்பாக கைக்கு கிடைக்கும்.

• வரி விதிப்பு: இத்திட்டத்திலிருந்து கிடைக்கும் லாபம் வருமான வரி விதிப்புக்கு உட்பட்டது என்றாலும், முதிர்வு காலத்தில் தொகையைத் திரும்பப் பெறும் போது டிடிஎஸ் (TDS) எனப்படும் வரிப் பிடித்தம் எதுவும் செய்யப்படுவதில்லை.

எங்கு தொடங்கலாம்? எப்படிச் செலுத்துவது?

• PPF கணக்கு: பொது வருங்கால வைப்பு நிதி கணக்கை அங்கீகரிக்கப்பட்ட தேசிய மற்றும் தனியார் வங்கிகள் மூலமாகவோ அல்லது அருகில் உள்ள தபால் நிலையங்கள் வழியாகவோ எளிதாகத் தொடங்கலாம்.

• KVP திட்டம்: கிசான் விகாஸ் பத்ரா சான்றிதழ்களை அஞ்சல் நிலையங்கள் (Post Offices) மற்றும் குறிப்பிட்ட சில வங்கிகள் மூலம் பெற்றுக் கொள்ளலாம்.

• செலுத்தும் முறை: தற்போது டிஜிட்டல் மயமாகிவிட்ட சூழலில், மேற்கண்ட இரண்டு திட்டங்களுக்கும் தவணைத் தொகையை நேரடியாகவோ அல்லது யுபிஐ (UPI), நெட் பேங்கிங் உள்ளிட்ட டிஜிட்டல் முறைகள் மூலமாகவோ மிக எளிதாகச் செலுத்த முடியும்.

நீண்ட கால அடிப்படையில் ரிஸ்க் இல்லாமல், மத்திய அரசின் முழுப் பாதுகாப்போடு பணத்தைப் பெருக்குவதற்கு இந்த இரண்டு திட்டங்களும் சரியான வழிகாட்டியாக அமையும்.