இனி சிப்ஸ் பாக்கெட்டில் இந்த 'சிவப்பு லேபிள்' கட்டாயம்! வருகிறது புதிய கட்டுப்பாடுகள்!

பாக்கெட் உணவுகளில் எச்சரிக்கை வாசகத்தை இடம்பெறச் செய்யும் புதிய திட்டத்தை உச்ச நீதிமன்றத்தில் தாக்கல் செய்தது இந்திய உணவு பாதுகாப்பு தர நிர்ணய ஆணையம்.

குழந்தைகளிடையே வேகமாக அதிகரித்து வரும் உடல் பருமன் மற்றும் உடல்நலப் பாதிப்புகளைத் தடுக்கும் நோக்கில், சிப்ஸ் உள்ளிட்ட அதிக சர்க்கரை, உப்பு அல்லது கொழுப்பு உள்ள பாக்கெட் உணவுகளின் முன்பக்கத்தில் அதன் தன்மை குறித்த எச்சரிக்கை வாசகம் இடம்பெறும் வகையில் ‘சிவப்பு நிற அறுகோண’ (Red Hexagon) வடிவிலான எச்சரிக்கை லேபிள் கட்டாயமாக்கப்படும் என்று இந்திய உணவுப் பாதுகாப்பு மற்றும் தர நிர்ணய ஆணையம் (FSSAI) உச்ச நீதிமன்றத்தில் தாக்கல் செய்துள்ள பிரமாணப் பத்திரத்தில் தெரிவித்துள்ளது.

மேலும் குறிப்பிட்ட ஊட்டச்சத்துக்கள் அதிகளவில் உள்ள உணவுப் பொருட்கள் குறித்து நுகர்வோருக்கு எளிமையான, கண்ணில் படும் வகையிலான மற்றும் எளிதில் புரிந்துகொள்ளக்கூடிய எச்சரிக்கையை வழங்குவதே இந்த முன்மொழிவின் நோக்கமாகும் என்று FSSAI உச்ச நீதிமன்றத்தில் தாக்கல் செய்த உறுதிமொழிப் பத்திரத்தில் குறிப்பிடப்பட்டுள்ளது.

அதாவது அதில் அதிகளவு சர்க்கரை, உப்பு அல்லது செறிவூட்டப்பட்ட கொழுப்பு உள்ள பாக்கெட் உணவுகளின் முன்பக்கத்தில் கட்டாயமாக சிவப்பு நிற அறுகோண எச்சரிக்கை லேபிள் இடம்பெற வேண்டும் என இந்திய உணவு பாதுகாப்பு மற்றும் தர நிர்ணய ஆணையம் (FSSAI) முன்மொழிந்துள்ளது.

பாக்கெட்டுகளின் மீது "அதிக சர்க்கரை" (HIGH SUGAR), "அதிக உப்பு" (HIGH SALT) அல்லது "அதிக கொழுப்பு" (HIGH FAT) ஆகிய வாசகங்களைத் தெளிவாகவும் பெரிய எழுத்துகளில் இடம்பெறும் வகையில் இந்த திட்டம் செயல்படுத்தப்பட உள்ளது.

இந்த நடவடிக்கை, ஏற்படக்கூடிய உடல்நல அபாயங்களை நுகர்வோருக்கு மேலும் தெளிவாகக் காண்பிப்பதையும், அவர்கள் நன்கு அறிந்து, ஆரோக்கியமான பொருட்களை தேர்வுகளைச் செய்ய உதவுவதையும் நோக்கமாகக் கொண்டுள்ளது.

நீதிபதி ஜே.பி. பர்திவாலா தலைமையிலான உச்ச நீதிமன்ற அமர்வு, இந்த விவகாரம் தொடர்பாக FSSAI மற்றும் அரசாங்கத்தைக் கடுமையாகக் கண்டித்த சில நாட்களுக்குப் பிறகு இந்த நடவடிக்கை எடுக்கப்பட்டுள்ளது.

மாறிவரும் இன்றைய உணவுப் பழக்கவழக்கங்களால் குழந்தைகளிடையே அதிகரித்து வரும் உடல் பருமன் மற்றும் ஆரோக்கியக் குறைபாடுகள் குறித்து சமீபத்தில் உச்சநீதிமன்றம் கடுமையான கவலையை எழுப்பியது.

இதனைத் தொடர்ந்து, இந்திய உணவு பாதுகாப்பு மற்றும் தர நிர்ணய ஆணையம் இந்த எச்சரிக்கை லேபிள் திட்டத்தை மிகத் தீவிரமாக ஆலோசித்து, தற்போது நடைமுறைப்படுத்தப் பெரிய நடவடிக்கைகளை மேற்கொண்டு வருகிறது.

'3S அண்ட் அவர் ஹெல்த் சொசைட்டி' (3S and Our Health Society) என்ற தன்னார்வத் தொண்டு நிறுவனம் தாக்கல் செய்த பொதுநலன் சார்ந்த மனுவை விசாரித்த நீதிமன்றம், குழந்தைகளிடையே உடல் பருமன் அதிகரிப்பதற்குச் சில உணவுப் பொருட்களே காரணம் என்று குறிப்பிட்டது;

இவ்வகை உணவுப் பொருட்களில் கொழுப்பு, சர்க்கரை மற்றும் உப்பு ஆகியவை அதிகளவில் உள்ளன, இருப்பினும் நிறுவனங்கள் இந்த விவரங்களை அவற்றின் உறைகளின் மீது தெளிவாகக் குறிப்பிடுவதில்லை என்று கவலை தெரிவித்தது.

நீதிமன்றத்தின் தலையீட்டைத் தொடர்ந்து, அரசு தனது பிரமாணப் பத்திரம் மூலம் இந்தச் சீர்திருத்தங்களை முன்மொழிந்தது.

பாக்கெட் உணவுகளில் சர்க்கரை, உப்பு அல்லது நிறைவுற்ற கொழுப்பு (saturated fat) ஆகியவை அனுமதிக்கப்பட்ட அளவை விட அதிகமாக இருந்தால், பொதுமக்கள் எளிதாக பார்த்து உடனடியாகத் தெரிந்துகொள்ளும் வகையில், பாக்கெட்டின் முன்பக்கத்தில் 'நில்' (stop sign) குறியீடு போன்ற பெரிய எழுத்துக்களுடனான சிவப்பு நிற அறுகோண வடிவ எச்சரிக்கை முத்திரை கட்டாயமாக அச்சிடப்பட வேண்டும்.

இந்த புதிய திட்டத்தின் படி, இந்த எச்சரிக்கை வாசகங்களுக்குப் பயன்படுத்தப்படும் எழுத்துக்களின் அளவு, பொட்டலத்தின் பின்புறம் உள்ள ஊட்டச்சத்து விவர அட்டவணையில் பயன்படுத்தப்பட்டுள்ள எழுத்துக்களின் அளவை விடக் குறைந்தது ஒரு 'பாயிண்ட்' (point) அளவாவது பெரியதாக இருக்க வேண்டும்; இதன் மூலம் நுகர்வோர் அவற்றை எளிதாகக் கண்டறிந்து படிக்க முடியும்.

இத்திட்டத்தை இரண்டு கட்டங்களாகச் செயல்படுத்தத் திட்டமிடப்பட்டுள்ளது.

முதலாம் கட்டமாக (Phase I) கூடுதல் சர்க்கரை, உப்பு அல்லது கொழுப்பு ஆகியவற்றில் இரண்டு அல்லது அதற்கு மேற்பட்ட பொருட்கள் அதிக அளவில் உள்ள பாக்கெட்டுகள் மற்றும் குளிர்பானங்கள் மீது இந்த லேபிள் அச்சிடப்படும்.

இரண்டாம் கட்டமாக (Phase II)இந்தப் பொருட்களில் ஏதேனும் ஒன்று மட்டும் அதிக அளவில் இருந்தாலும் அந்த உணவுப் பொருட்களுக்கும் இந்த விதிமுறை விரிவுபடுத்தப்படும்.

சில உணவுப் பொருட்களுக்கு இதிலிருந்து விலக்கு அளிக்கப்படும்; அதாவது, நெய், சமையல் எண்ணெய், தேன், வெல்லம் போன்ற இயற்கையாகவே கொழுப்பு அல்லது சர்க்கரை கொண்ட ஒற்றைப் பொருள் உணவுகளுக்கு இந்த லேபிளில் இருந்து விலக்கு அளிக்கப்பட உள்ளது.

மாறிவரும் இன்றைய உணவுப் பழக்கவழக்கங்களால் சிறுவர்கள் மத்தியில் உடல் பருமன் ஆபத்தான அளவில் உயர்ந்து வருகிறது. நுகர்வோர்களிடம் இதுகுறித்த விழிப்புணர்வை ஏற்படுத்த இந்த அதிரடி நடவடிக்கை எடுக்கப்பட்டுள்ளது.