வாடிக்கையாளர்களே நோட் பண்ணிக்கோங்க... SBI வங்கியில் டிசம்பர் 1 முதல் இந்த சேவை கிடையாது...!!

இந்தியாவின் மிகப்பெரிய பொதுத்துறை வங்கியான SBI தனது வாடிக்கையாளர்களுக்கு ஒரு முக்கிய அறிவிப்பை வெளியிட்டுள்ளது.அதாவது SBI வங்கி தனது வாடிக்கையாளர்களுக்கு வழங்கி வந்த mCASH எனப்படும் பணப்பரிவர்த்தனை சேவையை டிசம்பர் 1 முதல் நிரந்தரமாக நிறுத்தப் போவதாக அறிவித்துள்ளது.

நவம்பர் 30-ம்தேதிக்கு (இன்று)பிறகு, OnlineSBI, YONO Lite ஆகிய தளங்களில் mCASH மூலம் பணம் அனுப்பும் மற்றும் பணம் பெறும் (Claiming)வசதி செயல்படாது. அதாவது, டிசம்பர் 1 முதல், mCASH இணைப்பு அல்லது செயலி மூலம் வாடிக்கையாளர்கள் பணம் அனுப்பவோ அல்லது பெறவோ முடியாது என்று ஸ்டேட் பேங்க் ஆஃப் இந்தியா தெரிவித்துள்ளது.RBI-யின் புதிய வழிகாட்டுதல்கள் மற்றும் டிஜிட்டல் பரிவர்த்தனைகளின் பாதுகாப்பை மேம்படுத்தும் நோக்கில் இந்த முடிவு எடுக்கப்பட்டுள்ளதாக கூறப்படுகிறது.

mCASH என்பது SBI வாடிக்கையாளர்கள்,பயனாளியின் வங்கிக் கணக்கு விவரங்களைப் பதிவு செய்யாமல்,அவருடைய மொபைல் எண் அல்லது மின்னஞ்சல் முகவரியை மட்டும் பயன்படுத்திப் பணம் அனுப்ப அனுமதிக்கும் எளிய சேவையாகும்.

இதில் பணம் பெறுபவருக்கு ஒரு பாதுகாப்பான இணைப்பு மற்றும் 8 இலக்க கடவுச்சொல் கிடைக்கும், அதைக்கொண்டு அவர்கள் எந்த வங்கியிலும் உள்ள தங்கள் கணக்கில் பணத்தைப் பெற்றுக் கொள்ளலாம்.

அதேசமயம், mCASH சேவை நவம்பர் 30-ம் தேதிக்கு பிறகு நிறுத்தப்பட்டாலும், வாடிக்கையாளர்களின் பணப் பரிவர்த்தனைகள் பாதிக்கப்படாமல் இருக்க, SBI மாற்றாகப் பல பாதுகாப்பான டிஜிட்டல் பரிவர்த்தனை முறைகளைப் பரிந்துரைத்துள்ளது.

அதாவது, SBI வாடிக்கையாளர்கள் பழைய தொழில்நுட்பத்தில் இயங்கிய mCASH சேவைக்கு பதிலாக, தற்போதுள்ள சிறந்த பாதுகாப்பான டிஜிட்டல் கட்டண முறைகளான BHIM SBI Pay (UPI App), NEFT (National Electronic Funds Transfer),RTGS (Real-Time Gross Settlement) மற்றும் IMPS போன்றவற்றை பயன்படுத்த வேண்டும் என்று வங்கி அறிவித்துள்ளது.

‘mCASH வசதி நவம்பர் 30-ம்தேதிக்கு பிறகு கிடைக்காது. மூன்றாம் தரப்பு பயனாளிகளுக்குப் பணம் அனுப்ப (UPI, IMPS, NEFT, RTGS போன்ற) மாற்று வழிகளைப் பயன்படுத்துமாறு கேட்டுக்கொள்கிறோம்’ என்று SBI தனது இணையதளத்தில் தெரிவித்துள்ளது குறிப்பிடத்தக்கது.

எனவே SBI வாடிக்கையாளர்கள் mCASH சேவை நிறுத்தம் குறித்துக் கவலைப்படாமல், பாதுகாப்பான மற்றும் வேகமான UPI போன்ற மாற்று வழிகளுக்கு உடனே மாறுவது நல்லது என்றும் இந்த மாற்றத்தின் மூலம் வாடிக்கையாளர்களின் பணப்பரிவர்த்தனைகள் விரைவாகவும், பாதுகாப்பாகவும் நடக்கும் என்று SBI வங்கி நம்புகிறது.