575 நாட்கள்; 400 அடி உயரம்: செல்போன் கோபுரத்தில் போராடிய நபருக்கு கிடைத்த வெற்றி..!

பஞ்சாப் மாநிலம் சமானா மாவட்டத்தை சேர்ந்தவர் ராணுவ வீரரும் பால் பண்ணையாளருமான குர்ஜீத் சிங் கல்சா (வயது 43)(Gurjeet Singh Khalsa). சமூக ஆர்வலரான இவர் ஜலந்தரில் ஒரு புனித நூலை அவமதிக்கும் சம்பவம் நிகழ்ந்த சில நாட்களுக்குப் பிறகு, கடந்த 2024-ம் ஆண்டு அக்டோபர் 12-ந்தேதி அங்குள்ள BSNL செல்போன் கோபுரத்தில் ஏறி போராட்டத்தை தொடங்கினார். சட்ட ரீதியான நடவடிக்கை முழுமையடையும் வரை அங்கேயே தங்கியிருப்பதாக அவர் அப்போது சபதம் செய்தார்.

தங்கள் மதம் தொடர்பான புனித நூல்களை அவமதிப்பதற்கு எதிரான சம்பவங்களுக்கு எதிராக கடுமையான தண்டனை விதிக்கும் சட்டங்கள் அறிவிக்கப்படும் வரை கீழே இறங்க மறுத்து, கல்சா கடந்த 18 மாதங்களுக்கும் மேலாகத் தரையிலிருந்து சுமார் 400 அடி உயரத்தில் அமர்ந்திருந்துள்ளார். அவரது போராட்டம் 575-வது நாளை எட்டி உள்ளது.

உணவு உள்ளிட்ட அத்தியாவசிய பொருட்களை கயிறு மூலம் பெற்றுக்கொண்டு அவர் எந்த விஷயத்துக்காகவும் கீழே இறங்காமல் போராடி வருகிறார்.

ஒரு தார்பாயின் கீழ் தங்கியிருந்து, தினமும் ஒரு வேளை மட்டும் உணவருந்தி வாழ்ந்து வந்த கல்சா, இந்தப் நீண்டகாலப் போராட்டம் தனது உடல்நலத்தைப் severely பாதித்ததாகவும், இதன் விளைவாக தனக்கு நீரிழிவு, உயர் இரத்த அழுத்தம் மற்றும் இதயக் கோளாறுகள் ஏற்பட்டதாகவும் தெரிவித்தார். அசைவின்மை, கடுமையான வானிலை மாற்றங்களுக்கு ஆளாதல் மற்றும் மின்சார வசதியின்மை ஆகியவை தனது உடல்நிலையை மேலும் மோசமாக்கியதாகவும் அவர் கூறினார்.

தனது குடும்பத்தில் உள்ளவர்களுக்கு கடுமையான உடல்நலக்குறைவு ஏற்பட்டபோதும், அதிகாரிகள் பலமுறை வேண்டுகோள் விடுத்தபோதும், கல்சா தனது போராட்டத்தை கைவிடாமல் தொடர்ந்தார். சமீப மாதங்களில் கல்சாவின் இந்தப் போராட்டத்திற்கான ஆதரவு பெருகியது; சமனா பகுதியில் சாலை மறியல்கள் மற்றும் தர்ணா போராட்டங்களும் நடைபெற்றன.

இந்த நிலையில் அவரது கோரிக்கை தொடர்பான சட்டம் சட்டசபையில் நிறைவேற்றி உள்ளது. ‘பஞ்சாப் அரசு, குரு கிரந்த் சாஹிப்பிற்கு எதிரான எந்தவொரு அவமதிப்பும் செயலுக்கும் ஆயுள் தண்டனை மற்றும் 25 லட்சம் ரூபாய் வரையிலான அபராதம் உள்ளிட்ட கடுமையான தண்டனைகளை பரிந்துரைக்கும் திருத்தப்பட்ட 'ஜாகத் ஜோத் ஸ்ரீ குரு கிரந்த் சாஹிப் சத்கார் (திருத்தச்) சட்டம், 2026' அவமதிப்பு எதிர்ப்பு சட்டத்தை கடந்த 13-ந்தேதி சட்டசபையில் நிறைவேற்றியது.

இந்த மசோதாவுக்கு பஞ்சாப் ஆளுநர் குலாப் சந்த் கட்டாரியாவும் ஒப்புதல் அளித்துவிட்டார். அந்த அறிவிப்பு வெளியானதை தொடர்ந்து, கல்சாவின் 575 நாட்கள் நீடித்த போராட்டம் முடிவுக்கு வருகிறது. எனவே குர்ஜீத் சிங் இன்று (24-ம்தேதி) கீழே இறங்குவார் என்று எதிர்பார்க்கப்படுகிறது.

இதற்கிடையே அவரை பத்திரமாக கீழே இறக்க ராணுவத்தின் உதவி கோரப்பட்டு உள்ளது.

இது தொடர்பாக அதிகாரி ஒருவர் கூறும் போது, தீயணைப்பு துறை உள்ளிட்ட உள்ளூர் முகமைகளில் செயல்பாட்டு வரம்பை விட செல்போன் கோபுரம் மிக உயரமாக இருப்பதால், மிக நுட்பமாக செயல்பாட்டுக்கான ராணுவத்தின் உதவி கோரப்பட்டு உள்ளதாக தெரிவித்தார். இதுபற்றிய தகவல்கள் சமூக வலைத்தளத்தில் பரபரப்பாக பகிரப்பட்டுகிறது.