விதவை மருமகளுக்கு மாமனாரின் சொத்தில் உரிமை உண்டா? சுப்ரீம் கோர்ட்டு சொல்வதென்ன..?

1956-ம் ஆண்டு இந்து தத்தெடுப்புகள் மற்றும் பராமரிப்புச் சட்டத்தின்படி, தனது மாமனார் இறந்த பிறகு விதவையாகும் மருமகள், தனது மாமனார் சொத்திலிருந்து பராமரிப்பு கோரலாம் என்று உச்ச நீதிமன்றம் தீர்ப்பளித்தது.

கீதா சர்மா என்ற பெண் குடும்பநல கோர்ட்டு ஒன்றில் தாக்கல் செய்த மனுவில், ‘எனது கணவரும், மாமனாரும் இறந்து போன நிலையில் மாமனாரின் சொத்தில் இருந்து பராமரிப்பு தொகை வழங்க உத்தரவிட வேண்டும்’ என கூறியிருந்தார். 2021-ம் ஆண்டு காலமான டாக்டர் பிரசாத்தின் சட்டப்பூர்வ வாரிசுகளுக்கு இடையே ஏற்பட்ட சட்ட தகராறின் பின்னணியில் இந்த தீர்ப்பு வழங்கப்பட்டது.

டாக்டர் பிரசாத்துக்கு ரஞ்சித் சர்மா, ராஜீவ் சர்மா, தேவிந்தர் ராய் என்ற மூன்று மகன்கள் இருந்தனர். அவர்களில் ஒருவர் கடந்த 2023-ம் ஆண்டு மார்ச் 2-ம்தேதி காலமானார்.

இருப்பினும், அவரது மருமகளும் அவரது மகன்களில் ஒருவரான மறைந்த ரஞ்சித் சர்மாவின் விதவை மனைவி ஸ்ரீமதி கீதா சர்மா, தனது கணவரின் மரணத்தைத் தொடர்ந்து டாக்டர் பிரசாத்தின் சொத்திலிருந்து பராமரிப்புத் தொகையை கோரினார்.

மேலும், மறைந்த டாக்டர் பிரசாத் 2011-ம் ஆண்டு ஜூலை 18-ம்தேதி பதிவு செய்யப்பட்ட உயிலை நிறைவேற்றியதாகவும், அவரது மற்றொரு மகனான தேவிந்தர் ராயின் (முன்பே இறந்துவிட்ட) மனைவியான திருமதி காஞ்சனா ராயை நிறைவேற்றுபவராக நியமித்து, டாக்டர் பிரசாத்தின் சொத்துக்களை காஞ்சனா ராயின் இரண்டு மகன்களிடம் பொறுப்பை விட்டுச் சென்றதாகவும் குடும்பத்தினர் கூறினர். ஆனால் சொத்து விஷயத்தில் ரஞ்சித் சர்மா மற்றும் ராஜீவ் சர்மா என்ற அவரது இரண்டு மகன்களை முழுமையாகப் புறக்கணித்ததாக குற்றம் சாட்டப்பட்டது.

ரஞ்சித் சர்மாவின் விதவையான ஸ்ரீமதி கீதா சர்மா, தனது மாமனார் (டாக்டர் பிரசாத்) இடமிருந்து ஜீவனாம்சம் கேட்டு, 1956-ம் ஆண்டு இந்து தத்தெடுப்பு மற்றும் பராமரிப்புச் சட்டத்தின் கீழ் குடும்ப நீதிமன்றத்தில் மனு தாக்கல் செய்திருந்த நிலையில், இந்த மனுவை விசாரித்த குடும்ப நல கோர்ட்டு, அந்த பெண்ணின் மாமனார் இறந்த போது அவர் விதவையாக இல்லை என்பதால் மாமனாரை சார்ந்து அவர் இருக்கவில்லை எனக்கூறி மனுவை தள்ளுபடி செய்தது.

டாக்டர் பிரசாத் இறக்கும் போது ஸ்ரீமதி கீதா சர்மா விதவையாக இல்லாததால், அதாவது அவரது கணவர் ரஞ்சித் சர்மா, அவரது தந்தை (டாக்டர் பிரசாத்) இறந்தபோது உயிருடன் இருந்ததால், இந்த வழக்கு பராமரிக்கப்பட முடியாது என்று குடும்ப நீதிமன்றம் கூறியது. குடும்ப நீதிமன்ற உத்தரவால் மனமுடைந்த ஸ்ரீமதி கீதா சர்மா உயர் நீதிமன்றத்தில் மேல்முறையீடு செய்தார்.

இந்த மேல்முறையீட்டு மனுவை விசாரித்த உயர் நீதிமன்றம், ஸ்ரீமதி கீதா சர்மா, மறைந்த டாக்டர் பிரசாத்தின் மகன்களில் ஒருவரின் விதவை என்பதால், அவரைச் சார்ந்திருப்பவராகக் கருதியதால், இந்த மனு பராமரிக்கத்தக்கது என்ற திட்டவட்டமான முடிவைப் பதிவு செய்து, குடும்பநல கோர்ட்டு உத்தரவை ரத்து செய்து விட்டு மாமனாரின் சொத்தில் இருந்து கீதா சர்மாவுக்கு பராமரிப்பு தொகை வழங்க உத்தரவிட்டது.

இதை ஏற்க மறுத்த கணவரின் குடும்பத்தினர் சுப்ரீம் கோர்ட்டில் மேல்முறையீடு செய்தனர்.

இந்த மேல்முறையீட்டு மனுவை விசாரித்த சுப்ரீம் கோர்ட்டு, ‘மாமனார் இறந்த பிறகு விதவையாகும் ஒரு பெண், இந்து சட்டத்தின் கீழ் மாமனாரின் சொத்தில் இருந்து பராமரிப்பு தொகை கோருவதற்கு உரிமை உண்டு. மாமனாரின் சொத்துக்களிலிருந்து பராமரிப்பு தொகை மறுப்பது அவளை வறுமை மற்றும் சமூக ஓரங்கட்டலுக்கு ஆளாக்கும், இதன் மூலம் கண்ணியத்துடன் வாழும் அவரது அடிப்படை உரிமையை பறிப்பதாகும். எனவே, கீதா சர்மாவுக்கு மாமனாரின் சொத்தில் இருந்து பராமரிப்பு தொகை வழங்க வேண்டும்’ என உத்தரவிட்டது.