ட்ரம்ப் டவர் முன்பு நடந்த பயங்கரம்... வெடித்து சிதறிய Tesla Cybertruck!

அமெரிக்கா 2025ம் புத்தாண்டை துயரத்துடன் தொடங்கியுள்ளது. அடுத்தடுத்து நடந்த இரண்டு துயர சம்பவங்கள் நாட்டை உலுக்கியுள்ளன. நியூ ஆர்லியன்ஸில் புத்தாண்டு கொண்டாட்டத்தின் போது நிகழ்ந்த டிரக் தாக்குதலைத் தொடர்ந்து, லாஸ் வேகாஸில் டிரம்ப் டவர் அருகே, டெஸ்லா சைபர்ட்ரக் கார் ஒன்று வெடித்துச் சிதறிய சம்பவம் பெரும் பரபரப்பை ஏற்படுத்தியுள்ளது. இந்த இரண்டு சம்பவங்களுக்கும் இடையே தொடர்பு இருக்கலாம் என்ற சந்தேகத்தின் பேரில் எஃப்.பி.ஐ அதிகாரிகள் தீவிர விசாரணை மேற்கொண்டு வருகின்றனர்.

லாஸ் வேகாஸ் நகரில், டிரம்ப் டவர் ஹோட்டலுக்கு வெளியே நிறுத்தப்பட்டிருந்த டெஸ்லா சைபர்ட்ரக் கார் ஒன்று திடீரென வெடித்துச் சிதறியது. இந்த கோர விபத்தில் காரின் ஓட்டுநர் சம்பவ இடத்திலேயே உயிரிழந்தார். மேலும், அருகிலிருந்த ஏழு பேர் படுகாயமடைந்தனர். உள்ளூர் நேரப்படி காலை 8:40 மணியளவில் இந்த வெடிப்புச் சம்பவம் நிகழ்ந்துள்ளது. சைபர்ட்ரக் டிரம்ப் டவர் அருகே வந்து நின்ற சில நிமிடங்களிலேயே வெடித்துச் சிதறியுள்ளது சிசிடிவி பதிவுகளில் தெளிவாக பதிவாகியுள்ளது.

விசாரணையில், வாகனத்தின் பின்பகுதியில் பட்டாசுகள் மற்றும் கேம்ப் எரிபொருள் இருந்ததும், இதன் காரணமாகவே கார் வெடித்துச் சிதறியிருக்கலாம் என்றும் அதிகாரிகள் தெரிவித்துள்ளனர். இந்த வெடி விபத்தில் உயிரிழந்த டிரைவரின் அடையாளத்தை எஃப்.பி.ஐ அதிகாரிகள் கண்டுபிடித்துள்ளனர். எனினும், விசாரணை தொடர்ந்து நடைபெற்று வருவதால், அவரது தனிப்பட்ட தகவல்கள் வெளியிடப்படவில்லை. பாதுகாப்பு கருதி, டிரம்ப் டவரில் தங்கியிருந்த விருந்தினர்கள் அனைவரும் உடனடியாக பாதுகாப்பான இடத்திற்கு மாற்றப்பட்டனர்.

இந்த சம்பவத்திற்கு சில மணி நேரத்திற்கு முன்பு, நியூ ஆர்லியன்ஸில் புத்தாண்டு கொண்டாட்டத்தில் ஈடுபட்டிருந்த மக்கள் கூட்டத்திற்குள் ஒரு டிரக் வேண்டுமென்றே செலுத்தப்பட்டதில் 15 பேர் பரிதாபமாக உயிரிழந்தனர். பலர் படுகாயமடைந்தனர். இந்த இரண்டு சம்பவங்களுக்கும் இடையே ஒரு அதிர்ச்சியூட்டும் ஒற்றுமை கண்டறியப்பட்டுள்ளது. அதாவது, நியூ ஆர்லியன்ஸில் தாக்குதலுக்கு பயன்படுத்தப்பட்ட டிரக்கும், லாஸ் வேகாஸில் வெடித்துச் சிதறிய டெஸ்லா சைபர்ட்ரக் காரும் ஒரே நிறுவனத்தில் இருந்து வாடகைக்கு எடுக்கப்பட்டது விசாரணையில் தெரிய வந்துள்ளது. இந்த தகவல், இரண்டு சம்பவங்களுக்கும் இடையே தொடர்பு இருக்கலாம் என்ற சந்தேகத்தை வலுப்படுத்தியுள்ளது.

இதன் விளைவாக, எஃப்.பி.ஐ அமைப்பின் கூட்டுப் பயங்கரவாத டாஸ்க் ஃபோர்ஸ் இந்த இரண்டு சம்பவங்களையும் தீவிரமாக விசாரித்து வருகிறது. டெஸ்லா சைபர்ட்ரக் கார்கள் மேம்பட்ட பாதுகாப்பு அம்சங்களைக் கொண்டவை என்பது குறிப்பிடத்தக்கது. இந்த விபத்தில் கார் முழுவதுமாக தீப்பற்றி எரிந்த போதிலும், அருகிலுள்ள பகுதிகளில் பெரிய சேதம் ஏற்படவில்லை என்று கூறப்படுகிறது. இது சைபர்ட்ரக்கின் பாதுகாப்பு தரத்திற்கு ஒரு சான்றாக அமைகிறது.

இந்த இரண்டு சம்பவங்களும் அமெரிக்காவில் பெரும் அதிர்வலைகளை ஏற்படுத்தியுள்ளன. புத்தாண்டு தினத்தில் நிகழ்ந்த இந்த துயர சம்பவங்கள், நாடு முழுவதும் சோகத்தை ஏற்படுத்தியுள்ளது. எஃப்.பி.ஐ அதிகாரிகள் தீவிர விசாரணை மேற்கொண்டு வருவதால், கூடிய விரைவில் உண்மை வெளிவரும் என்று எதிர்பார்க்கப்படுகிறது.