ஜனநாயகன் சிக்கலுக்கு மத்தியில் அதிரடி காட்டும் விஜய் : தேர்தல் அறிக்கை தயாரிக்க 12 பேர் கொண்ட குழு அமைப்பு..!

ஜனநாயகன் திரைப்படத்தின் தணிக்கை குழு சான்றிதழ் விவகாரம் தொடர்பாக நீதிமன்றத்தில் இன்று சாதகமான தீர்ப்பு வந்தபோதிலும் , சென்சார் போர்டு மேல்முறையீடு செய்ய உள்ளது. சூழ்நிலை இவ்வாறு இருக்க விஜய் அதிரடியாக அரசியல் களத்தில் தனது அறிவிப்பை வெளியிட்டுள்ளார். இதில் தேர்தல் களத்தில் தவெக மற்ற கட்சிகளை முந்திக் கொண்டுள்ளது. ஒரு கட்சியின் வெற்றி வாய்ப்பை அதிகரிப்பது, அந்தக் கட்சியின் தேர்தல் அறிக்கைதான். அதற்காக இன்று (ஜனவரி.9) மதியம் தவெக தலைவர் , நடிகர் விஜய் தேர்தல் அறிக்கை தயாரிக்கும் பணிக்காக 12 பேர் கொண்ட குழுவினை அமைத்து ஒரு அறிக்கை வெளியிட்டுள்ளார்.

அந்த அறிக்கையில் குறிப்பிடப்பட்டுள்ள செய்திகள் பின்வருமாறு :

​அனைவருக்கும் வணக்கம்,

​தமிழ்நாட்டு மக்களின் முன்னேற்றத்தையும் மாநிலத்தின் ஒட்டுமொத்த வளர்ச்சியையும் நோக்கமாகக் கொண்டு, நடைபெற உள்ள சட்டமன்றத் தேர்தலை முன்னிட்டு, தமிழக வெற்றிக் கழகம் சார்பில் தேர்தல் அறிக்கை தயாரிக்கப்பட இருக்கிறது.

​இதற்காகச் சிறப்புக் குழு அமைக்கப்படுகிறது.

இந்தக் குழு, தமிழகம் முழுவதும் பொதுமக்கள், சிறு, குறு தொழில் அமைப்புகள், தொழிலாளர் அமைப்புகள், பொருளாதார & தொழில் வல்லுநர்கள், வர்த்தக சபைகள், பல்வேறு ஊழியர் சங்கங்கள், விவசாயச் சங்கங்கள், கல்வியாளர்கள், மருத்துவர்கள், செவிலியர்கள், மகளிர் அமைப்புகள், இளைஞர் அமைப்புகள் உள்ளிட்ட பல்வேறு தரப்பினரின் கருத்துகளையும் தேவைகளையும் அறிந்து, தரவுகளைப் பெறவுள்ளது.​ அவர்களிடம் இருந்து பெறப்படும் தரவுகளின் அடிப்படையில் தமிழ்நாட்டு மக்களையும் ஒட்டுமொத்த மாநிலத்தையும் வளர்ச்சிப் பாதையில் கொண்டு செல்லும் வகையில் தேர்தல் அறிக்கையினைத் தயார் செய்யவுள்ளது. 

​தேர்தல் அறிக்கை குழு விவரம்:

1.​திரு. Dr. K.G. அருண்ராஜ் MBBS., Ex. IRS.

2.​திரு. J.C.D. பிரபாகர் BA. BL., Ex. MLA.

3.​திரு. A. ராஜ்மோகன் BTech. IT.

4.​திருமதி. T.S.K. மயூரி MA.

5.​பேராசிரியர் திரு. A. சம்பத்குமார் MBA., M.Phil., Ph.D.

6.​திரு. M.அருள் பிரகாசம் M.Com.

7.​திரு. விஜய் R. பரணிபாலாஜி BA.LLB.

8.​திரு. J.முகமது பர்வேஸ் B.A., LLB (HONS).

9.​திரு. Dr.TK.பிரபு BDS., MSD., MSC., ICDL., FICOL.

10.​திரு. K. கிரிஸ்டி பிருத்வி BE. MBA.

11.​திருமதி. M.K. தேன்மொழி பிரசன்னா B.Tech IT.

13.​வழக்கறிஞர்.திரு.M. சத்யகுமார் LLM, ACA, ACMA, ACS, CIMA-ACMA(UK), CGMA(US), CISI-ACSI(UK), MA(Eco), PhD.

​மேற்கண்ட குழுவினருக்குக் கழகத் தோழர்கள் முழு ஒத்துழைப்பு நல்குவதோடு, அந்தந்தப் பகுதிகளில் சம்பந்தப்பட்ட அமைப்புகளைச் சந்திக்கும் பொழுது தேவையான உதவிகளைச் செய்யுமாறு கேட்டுக்கொள்கிறேன்.

​விஜய்,

தலைவர்,

தமிழக வெற்றிக் கழகம்.

இவ்வாறு அந்த அறிக்கை வெளியாகி உள்ளது.

தேர்தல் அறிக்கையில் அறிவிக்கப்படும் சலுகைகள் தான் தேர்தலில் வெற்றி தோல்வியை தீர்மானிக்கிறது. அந்த வகையில் தேர்தலுக்கான அறிக்கையை தயாரிப்பதில் அதிக கவனம் செலுத்த தவெக முயற்சி செய்கிறது. எந்த மாதிரி திட்டங்களை வகுத்தால் , அதற்கு மக்களின் ஆதரவு கிடைக்கும் என்பதையும் ஆராய்ந்து திட்டங்களை தேர்தல் அறிக்கையில் நடைமுறைப்படுத்த வேண்டும். 

தேர்தல் அறிக்கையை பொருத்தவரையில் , வேலைவாய்ப்புக்கு அதிக முக்கியத்துவம் கொடுப்பார்கள், அதைத்தொடர்ந்து தொழில் வாய்ப்பு , கல்வி , மருத்துவம் , பாதுகாப்பு போன்றவை சார்ந்த திட்டங்களும் தேர்தல் அறிக்கையில் முக்கிய இடம் பெறும். சமீப காலமாக இலவச திட்டங்கள் தேர்தல் அறிக்கையில் இடம்பெறுவதால் விஜய் என்ன மாதிரி இலவச திட்டங்களை கொண்டு வருவார் என்பதையும் மக்கள் எதிர்பார்க்கின்றனர்.