10 லட்சம் பேரிடம் நடத்திய ரகசிய ஆய்வு... இந்தியாவுக்கு காத்திருக்கும் பெரிய சவால் இதுதான்!

செயற்கை நுண்ணறிவு எனப்படும் AI Technology இன்று உலகையே தலைகீழாகப் புரட்டிப் போட்டுக்கொண்டிருக்கிறது. சாட்ஜிபிடிக்கு போட்டியாகக் களத்தில் குதித்துள்ள 'கிளாட் (Claude)' என்னும் சாட்போட்டை உருவாக்கிய ஆந்த்ரோபிக் நிறுவனம், தற்போது தனது பார்வையை இந்தியாவின் பக்கம் திருப்பியுள்ளது. அமேசான் மற்றும் கூகுள் போன்ற பெரும் நிறுவனங்களின் ஆசி பெற்ற இந்த நிறுவனம், இந்தியாவின் சிலிக்கான் வேலியான பெங்களூருவில் தனது முதல் அலுவலகத்தைத் திறக்கவுள்ளது மகிழ்ச்சியான செய்திதான். 

ஆனால் வந்த வேகத்தில் அந்த நிறுவனம் வெளியிட்டுள்ள ஒரு ஆய்வறிக்கை, இந்தியப் பொருளாதார வல்லுநர்களைச் சற்று யோசிக்க வைத்துள்ளது. தொழில்நுட்பம் வளர வளர, அது ஏழைகளுக்கும் பணக்காரர்களுக்கும் இடையிலான இடைவெளியை இன்னும் அதிகமாக்கும் என்று அவர்கள் அடித்துச் சொல்கிறார்கள்.

இந்தியச் சந்தை!

உலக அளவில் இந்த 'கிளாட்' ஏஐயை அதிகம் பயன்படுத்துபவர்களின் பட்டியலில் இந்தியா இரண்டாவது இடத்தில் உள்ளது. இதனாலேயே அந்த நிறுவனம் தனது கூடாரத்தைப் பெங்களூருவில் அமைத்துள்ளது. மைக்ரோசாப்ட் நிறுவனத்தில் பணிபுரிந்த இரினா கோஷ் என்பவரைத் தலைவராக நியமித்து, இந்தியச் சந்தையைப் பிடிக்கத் திட்டமிட்டுள்ளனர். ஆனால் இங்கேதான் ஒரு பெரிய முரண் உள்ளது. இந்தியர்கள் ஏஐ தொழில்நுட்பத்தை அதிகம் பயன்படுத்தினாலும், அதை எப்படிப் பயன்படுத்துகிறார்கள் என்பதில்தான் சிக்கல் இருக்கிறது.

பணக்கார நாடுகள் vs வளரும் நாடுகள்!

ஆந்த்ரோபிக் நிறுவனம் சுமார் பத்து லட்சம் பயனர்களிடம் ஒரு விரிவான ஆய்வை நடத்தியது. அந்த ஆய்வின் முடிவுகள் அதிர்ச்சி அளிக்கும் வகையில் உள்ளன. அமெரிக்கா போன்ற வளர்ந்த மற்றும் பணக்கார நாடுகளில் உள்ள மக்கள், இந்த ஏஐ தொழில்நுட்பத்தைத் தங்கள் வேலைகளை எளிதாக்கவும், மென்பொருள் குறியீடுகளை எழுதவும், புதிய கண்டுபிடிப்புகளை உருவாக்கவும் பயன்படுத்துகிறார்கள். சுருக்கமாகச் சொன்னால், அவர்கள் இதைப் பணம் சம்பாதிக்கும் ஒரு கருவியாக மாற்றியுள்ளனர்.

ஆனால், இந்தியா போன்ற வளரும் நாடுகளில் நிலைமை தலைகீழாக உள்ளது. இங்குள்ள பெரும்பாலான மக்கள் ஏஐயின் இலவசப் பதிப்புகளை மட்டுமே பயன்படுத்துகின்றனர். அதுவும் முக்கியமாகப் பள்ளிக் பாடங்கள், கட்டுரைகள் எழுதுதல் மற்றும் அடிப்படைத் தகவல்களைத் தேடுதல் போன்ற கல்வி சார்ந்த விஷயங்களுக்கு மட்டுமே இதைப் பயன்படுத்துகிறார்கள். இது தவறில்லை என்றாலும், பொருளாதார ரீதியாக இது பெரிய தாக்கத்தை ஏற்படுத்தாது.

பொருளாதார இடைவெளி!

பணக்கார நாடுகள் ஏஐயைப் பயன்படுத்தித் தங்கள் உற்பத்தித் திறனைப் பல மடங்கு பெருக்கிக் கொள்கின்றன. அடுத்த பத்து ஆண்டுகளில் அவர்களின் உற்பத்தித் திறன் இரண்டு சதவீதம் வரை அதிகரிக்கும் என்று கணிக்கப்பட்டுள்ளது. ஆனால் வளரும் நாடுகள் இதைப் பொழுதுபோக்கிற்காகவும், சாதாரணத் தேவைகளுக்காகவும் மட்டுமே பயன்படுத்தினால், ஏற்கனவே இருக்கும் பொருளாதாரப் பள்ளம் இன்னும் ஆழமாகும். 

சிக்கலான மென்பொருள் வேலைகளை ஏஐ உதவியுடன் நொடியில் முடிக்கும் மேலை நாட்டவர்களோடு, சாதாரண முறையில் வேலை செய்யும் நம் மக்களால் போட்டி போட முடியாத சூழல் உருவாகும். இது எதிர்காலத்தில் வேலைவாய்ப்புகளைப் பறிக்கும் அபாயத்தையும் கொண்டுள்ளது.

ஆந்த்ரோபிக் நிறுவனம் பெங்களூருவில் கால் பதிப்பது வரவேற்கத்தக்கது என்றாலும், அவர்கள் சொல்லும் எச்சரிக்கையை நாம் உதாசீனப்படுத்த முடியாது. ஏஐ என்பது வெறும் வீட்டுப்பாடம் செய்வதற்கான இயந்திரம் மட்டுமல்ல, அது நாளைய பொருளாதாரத்தைத் தீர்மானிக்கப்போகும் சக்தி என்பதை நாம் உணர வேண்டும்.