புதனை விட பெரிய நிலவா? கனிமீடு குறித்த சுவாரசிய தகவல்கள்!

அண்டவெளியின் அதிசயம் நிறைந்த சூரிய மண்டலத்தில், கோள்களுக்கு இணையாக வியப்பை ஏற்படுத்தும் பல துணைக் கோள்கள் உள்ளன. அவற்றில் தனித்துவமான அடையாளத்துடன் விளங்குவது வியாழன் கோளின் துணைக்கோளான ‘கனிமீடு’ஆகும். புதன் கோளை விட அளவில் பெரியதாகவும், ஒரு கோளுக்குரிய பண்புகளைக் கொண்டதாகவும் திகழும் கனிமீடு, வானியல் ஆய்வாளர்களுக்கு ஒரு தீராத தேடலாக இருந்து வருகிறது. 1610-ல் கலிலியோவால் கண்டறியப்பட்ட இந்த பனி உலகம், தனது பிரம்மாண்டத்தாலும் மர்மங்களாலும் விண்வெளி ஆராய்ச்சியில் மிக முக்கிய இடத்தைப் பிடித்துள்ளது.

பூமியைச் சுற்ற ஒரு நிலவு இருப்பதுபோல, மற்ற பெரிய கோள்களைச் சுற்றிப் பல நிலவுகள் உள்ளன. அளவு அடிப்படையில், சூரிய மண்டலத்தை சுற்றி வரும் கோள்களில் மிகப்பெரிய நிலவு கனிமீடு (Ganymede): இது வியாழன் (Jupiter) கோளின் நிலவு. நமது பூமியின் நிலவை விடப்பெரியது மட்டுமல்ல, புதன் (Mercury) என்ற கோளை விடவும் இது அளவில் பெரியது.

டைட்டன் (Titan): இது சனி (Saturn) கோளின் நிலவு. கனிமீடுக்கு அடுத்தபடியாக இதுதான் இரண்டாவது பெரிய நிலவு.

காலிஸ்டோ (Callisto): இதுவும் வியாழன் (Jupiter) கோளின் நிலவுதான். இது அளவில் மூன்றாவது பெரிய நிலவு.

சூரிய மண்டலத்தின் மாபெரும் துணைக்கோளான கனிமீடு பற்றிய சுவாரசியமான தகவல்கள் இங்கே:

அளவும் அமைப்பும்: கனிமீடு மிகப்பெரியது என்று சொல்வதற்குக் காரணம், இதன் விட்டம் சுமார் 5,268 கிலோமீட்டர்கள். இது புதன் கோளை (Mercury) விடச் சற்று பெரியது, ஆனால் எடையில் புதனை விடக் குறைவு. நமது நிலவை விட இது சுமார் 1.5 மடங்கு பெரியது.

காந்தப்புலம் (Magnetic Field): சூரிய மண்டலத்தில் உள்ள மற்ற எந்தத் துணைக்கோளுக்கும் இல்லாத ஒரு சிறப்பு கனிமீடுக்கு உண்டு. அதுதான் அதன் சொந்தக் காந்தப்புலம். இரும்பு திரவ நிலையில் உள்ள அதன் மையப்பகுதி (Metallic Core) சுழல்வதால் இந்த காந்தப்புலம் உருவாகிறது. இது கனிமீடைச் சுற்றி ஒரு பாதுகாப்பு கவசமாகச் செயல்படுகிறது.

உட்புறக் கடல் (Subsurface Ocean): விஞ்ஞானிகளின் ஆய்வின்படி, கனிமீடின் பனிக்கட்டி மேற்பரப்பிற்கு அடியில் சுமார் 200 கி.மீ ஆழத்தில் ஒரு மிகப்பெரிய உப்பு நீர் கடல் இருக்கலாம் என்று நம்பப்படுகிறது. பூமியில் உள்ள அனைத்து கடல்களையும் விட இதில் அதிக நீர் இருக்க வாய்ப்புள்ளது.

வளிமண்டலம்: இதற்கு மிகவும் மெல்லிய வளிமண்டலம் உள்ளது. இதில் பெரும்பாலும் ஆக்சிஜன் காணப்படுகிறது. இருப்பினும், இது மனிதர்கள் சுவாசிக்கும் அளவுக்கு அடர்த்தியானது அல்ல.

மேற்பரப்புத் தோற்றம்: கனிமீடின் மேற்பரப்பில் இரண்டு வகையான பகுதிகள் உள்ளன:

பழைய இருண்ட பகுதிகள்: இவை எரிமலைக் குழிகள் (Craters) நிறைந்த பழமையான பகுதிகள்.

புதிய வெளிச்சமான பகுதிகள்: இவை பனிப் பாறைகளால் ஆன பள்ளங்கள் மற்றும் வரிகளைக் கொண்ட பகுதிகள்.

கனிமீடு என்பது வெறும் பாறையும் பனியும் கொண்ட ஒரு நிலவு மட்டுமல்ல; அது உயிரினங்கள் வாழ்வதற்கான சாத்தியக்கூறுகளைத் தன்னுள் ஒளித்து வைத்திருக்கும் ஒரு பிரபஞ்சப் பெட்டகம்.

அதன் காந்தப்புலமும், நிலப்பரப்பிற்கு அடியில் மறைந்திருக்கும் ஆழமான உப்புநீர் கடலும் வருங்கால விண்வெளிப் பயணங்களுக்குப் புதிய வாசல்களைத் திறந்துவிடும் என எதிர்பார்க்கப்படுகிறது. ஐரோப்பிய விண்வெளி ஆய்வு நிறுவனம் (ESA) போன்ற அமைப்புகளின் தொடர் முயற்சிகள் மூலம், வரும் காலங்களில் இந்த‘மர்ம உலகம்' பற்றிய இன்னும் பல வியக்கத்தக்க உண்மைகள் நமக்குத் தெரியவரும்.