GPS எப்படி வேலை செய்கிறது? உங்கள் போனுக்குள் இருக்கும் விண்வெளி அதிசயம்!

GPS என்பது பூமியைச் சுற்றி சுமார் 20,000 கிலோமீட்டர் உயரத்தில் சுற்றி வரும் செயற்கை கோள்களின் வலையமைப்பு. குறைந்தது 24 செயற்கைக்கோள்கள் எப்போதும் பூமியைச் சுற்றிக்கொண்டே இருக்கும்.

ஒவ்வொரு செயற்கைக்கோளும் தனது இருப்பிடத்தையும் நேரத்தையும் தொடர்ந்து வானொலி அலைகள் மூலம் பூமிக்கு அனுப்புகிறது.

நம் கைப்பேசியில் உள்ள GPS பெறுநி அருகிலுள்ள செயற்கை கோள்களிடமிருந்து இந்த சிக்னல்களைப் பெறுகிறது. அந்தச் சிக்னல் எவ்வளவு நேரத்தில் கைப்பேசியை அடைகிறது என்பதைக் கணக்கிட்டு செயற்கை கோளுக்கும் நமக்கும் இடையேயான தூரத்தை கண்டறிகிறது. குறைந்தது நான்கு செயற்கைக் கோள்களிடம் இருந்து கிடைக்கும் தகவல்களை ஒப்பிட்டு " டிரைலாட்டரேஷன்" (Trilateration) என்ற கணித முறையின் மூலம் நம் இருப்பிடத்தை துல்லியமாகக் கணக்கிடுகிறது.

GPS சிக்னல்கள் ஒளியின் வேகத்தில் பயணிப்பதால் செயற்கைக் கோள்களில் பொருத்தப்பட்டுள்ள அணுக் கடிகாரங்கள் (Atomic clocks) மிகத் துல்லியமான நேரத்தை அளவிடுகின்றன. ஒரு விநாடியில் ஏற்படும் மிகச் சிறிய நேர வேறுபாடு கூட பல மீட்டர் இடப்பிழையை ஏற்படுத்திவிடும். எனவே நேரத்தின் துல்லியம்,GPS தொழில்நுட்பத்தின் உயிர்நாடியாகக் கருதப்படுகிறது.

நாம் பயன்படுத்தும் Google maps, வாகன வழிகாட்டி, உணவு மற்றும் பார்சல் விநியோகம், ஆன்லைன் டாக்ஸி சேவைகள், அவசர மீட்புப் பணிகள், விமானங்கள், கப்பல்கள், விவசாய இயந்திரங்கள், சரக்கு போக்குவரத்து உள்ளிட்ட எண்ணற்ற சேவைகள் அனைத்தும் GPS தொழில்நுட்பத்தையே பெரிதும் நம்பி உள்ளன.

பேரிடர் காலங்களில் மீட்புக்குழுக்கள் சிக்கியவர்களின் இருப்பிடத்தை விரைவாக கண்டறியவும் இது உதவுகிறது. அடர்ந்த கட்டிடங்கள் நிறைந்த நகரங்கள், சுரங்க பாதைகள் குகைகள் அல்லது அடர்ந்த காடுகளில் GPS சிக்னல்கள் பலவீனமடையலாம். இதனால் சில நேரங்களில் நம் இருப்பிடத்தில் சிறிய பிழைகள் தோன்றலாம். இதைச் சரி செய்ய இன்று பல ஸ்மார்ட் போன்கள் GPS உடன் Wi fi, மொபைல் கோபுரங்கள் மற்றும் பிற உலகளாவிய வழிகாட்டி அமைப்புகளின் தகவல்களையும் இணைத்து இன்னும் துல்லியமான இருப்பிடத்தை வழங்குகின்றன.

GPS தொழில்நுட்பம் வழங்கும் அன்றாட வாழ்க்கைப் பயன்கள்:

நம் கையில் இருக்கும் இந்த ஸ்மார்ட் போனுக்கு பின்னால் விண்வெளியில் இடைவிடாமல் இயங்கும் செயற்கைக் கோள்களின் பிரம்மாண்டமான வலையமைப்பும், அதிநவீன கணிதக் கணக்கீடுகளும் நேரத்துல்லியமும் இணைந்திருப்பதால்தான் உலகின் எந்த இடத்திலும் நம்மை சில நொடிகளில் கண்டுபிடிக்க GPSஆல் முடிகிறது.

அறிவியல் மனித வாழ்க்கையை எவ்வளவு எளிமையாக்கி உள்ளது என்பதற்கு GPs தொழில்நுட்பம் ஒரு மிகச்சிறந்த எடுத்துக்காட்டு ஆகும். GPS என்பது வழிகாட்டுவதற்கு மட்டும் அல்ல அறிவியல் ஆய்வுகள் மற்றும் சுற்றுச்சூழல் கண்காணிப்பிலும் முக்கிய பங்கு வகிக்கிறது.

நிலநடுக்கத்தால் பூமியின் மேற்பரப்பில் ஏற்படும் மிகச்சிறிய மாற்றங்களைக் கூட விஞ்ஞானிகள் GPS கருவிகள் மூலம் கண்காணிக்கின்றனர். கடல் மட்ட உயர்வு, பனிப்பாறைகள் உருகும் வேகம், மலைகளின் நகர்வு போன்ற இயற்கை மாற்றங்களையும் இந்த தொழில்நுட்பம் துல்லியமாக பதிவு செய்கிறது.

இன்று விவசாயத்துறையிலும் GPS பெரும் மாற்றத்தை ஏற்படுத்தி உள்ளது. டிராக்டர்கள் மற்றும் பிற நவீன விவசாய இயந்திரங்கள் GPS உதவியுடன் நேர்கோட்டில் விதைப்பு,உரமிடுதல், மற்றும் அறுவடைப் பணிகளை மேற்கொள்வதால் நேரமும் செலவும் மிச்சமாகிறது. அதேபோல மீனவர்கள் கடலில் பாதுகாப்பாகச் சென்று மீன் பிடி பகுதிகளைக் கண்டறிந்து மீண்டும் கரைக்குத் திரும்பவும் GPS உதவுகிறது.

மலையேற்றம், நீண்ட தூர சைக்கிள் பயணம், நடைப் பயணம் போன்ற சாகசப்பயணங்களிலும் இந்த தொழில்நுட்பம் நம்பகமான வழிகாட்டியாக விளங்குகிறது. தினசரி வாழ்க்கையில் நாம் கவனிக்காமல் பயன்படுத்தும் GPS உண்மையில் விண்வெளி அறிவியலின் அற்புதமான பரிசாகும்.

இந்த வாசிப்பின் மூலம் உங்கள் ஸ்மார்ட்போனின் இருப்பிட சேவைக்கு பின்னால் இருக்கும் விண்வெளி அறிவியலையும், அது எவ்வாறு உங்கள் நேரத்தையும் பயணத்தையும் எளிதாக்குகிறது என்பதையும் மிகத் தெளிவாகப் புரிந்துகொள்ள முடியும்.