திமிங்கலங்களின் ரகசிய உலகை 'கேட்டறியும்' அறிவியல்! Simply Wow!

கடலில் திமிங்கலங்களின் இருப்பிடத்தைக் கண்டறிய விஞ்ஞானிகள் மற்றும் கடற்படை ஆராய்ச்சியாளர்கள் பொதுவாக சில கருவிகளைப் பயன்படுத்துகின்றனர். அவை,

1.சோனார் (Active SONAR)

ஒலி அலைகளை கடலுக்குள் அனுப்பி, அவை திமிங்கலங்கள் அல்லது பிற பெரிய கடல் உயிரிகள் மீது மோதிய பிறகு திரும்ப வரும் நேரத்தை அளந்து, இருப்பிடத்தை கண்டறிகிறது. பெரும்பாலும் கப்பல்கள் மற்றும் நீர்மூழ்கிக் கப்பல்களில் பொருத்தப்பட்டிருக்கும்.

2. பேசிவ் சோனார் (Passive SONAR)

ஒலி அலைகளை அனுப்பாது, திமிங்கலங்கள் தாமாக உண்டாக்கும் ஒலிகளை மட்டும் பதிவு செய்து இருப்பிடத்தை கணக்கிடும் முறை.

3. சாட்டலைட் டேக் (Satellite Tagging)

சில திமிங்கலங்களுக்கு சிறிய GPS சாதனங்கள் பொருத்தப்பட்டு, செயற்கைக் கோள் மூலமாக அவற்றின் நகர்வை கண்காணிக்கின்றனர்.

4.ஹைட்ரோபோன் (Hydrophone)

ஹைட்ரோபோன் என்பது நீருக்குள் ஒலிகளைப் பதிவு செய்யும் ஒரு சிறப்பு வகை மைக்ரோஃபோன். இது நீருக்குள் பயணம் செய்யும் ஒலி அலைகளை மின் சிக்னல்களாக மாற்றும் திறன் கொண்டது. திமிங்கலங்கள் வெளிப்படுத்தும் குரல்கள், பாடல்கள் மற்றும் ஒலிகள் ஆகியவற்றைக் கேட்டு அவற்றின் இருப்பிடத்தை அறிய உதவுகிறது.

நீருக்குள் பல கிலோ மீட்டர் தூரத்திலிருந்து கூட ஒலிகளைப் பதிவு செய்ய முடியும் பொதுவாக கடலியல் (Marine Biology), நீருக்கடிச் சோதனை, கடற்படை ஆராய்ச்சி போன்றவற்றில் பயன்படுத்தப்படுகிறது.

திமிங்கலங்களை கண்டறிய ஹைட்ரோபோன் பயன்பாடு: திமிங்கலங்கள் பல வகையான குரல்கள், பாடல்கள், கிளிக்குகள் போன்ற ஒலிகளை உண்டாக்குகின்றன. இந்த ஒலிகள் நீரில் 100 கிலோ மீட்டர் (சில சமயம் அதைவிட அதிகம்) தூரம் செல்லும். ஹைட்ரோபோன் மூலம் அந்த ஒலிகளைப் பிடித்து, அவற்றின் இருப்பிடத்தைக் கணக்கிடலாம்.

வேலை செய்வது எப்படி?

1. ஒலி அலைகள் நீரில் பரவுதல்: திமிங்கலம் ஒரு ஒலி (உதாரணம்: பாடல்) உண்டாக்கும்போது, அது நீரில் அலை வடிவில் பரவும். நீரில் ஒலி வேகம் சுமார் 1500 மீட்டர்/வினாடி (காற்றை விட சுமார் 4 மடங்கு வேகம்) ஆகும்.

2. ஹைட்ரோபோன் ஒலி அலைகளைப் பெறுதல்: ஹைட்ரோபோன் என்பது Piezoelectric transducer எனப்படும் உபகரணத்தைக் கொண்டுள்ளது. Piezoelectric crystal மீது ஒலி அலைகள் அழுத்தத்தை ஏற்படுத்தும் போது, அது சிறிய மின்சாரச் சிக்னலாக மாறும்.

3. மின்சிக்னலாக மாற்றம்: கிடைத்த மின் சிக்னல்கள் மிகச் சிறியவை. அவை amplifier மூலம் பெரிதாக்கப்பட்டு, கம்ப்யூட்டர் அல்லது பதிவு சாதனம் மூலம் சேமிக்கப்படுகின்றன.

4. சிக்னல் பகுப்பாய்வு: பதிவான ஒலியின் அலைவரிசை (frequency) மற்றும் வருகை நேரம் (time of arrival) மூலம் திமிங்கலத்தின் வகையை அறிதல். அதன் தூரம் மற்றும் திசையை கணக்கிடுதல் (பல ஹைட்ரோபோன்கள் ஒரே நேரத்தில் பயன்படுத்தினால்).

ஹைட்ரோபோன் அமைக்கும் இடங்கள்:

கப்பல்களில் இழுக்கும் வகை (Towed array): ஹைட்ரோபோன் கம்பிகளை கப்பலின் பின் இழுத்துச் சென்று, நீரில் உள்ள ஒலிகளைச் சேகரிக்கும்.

நிலையான கடலடி நிலையங்கள் (Fixed seabed stations): கடலடியில் நிரந்தரமாக பொருத்தப்பட்ட ஹைட்ரோபோன்கள்.

தன்னாட்சி நீர்மூழ்கி வாகனங்கள் (AUVs): ரோபோட் வடிவிலான நீர்மூழ்கிகள், ஹைட்ரோபோன்கள் பொருத்தப்பட்டிருக்கும்.

திமிங்கல ஆய்வில் ஹைட்ரோபோன் வழங்கும் நன்மைகள்: இரவு அல்லது புயல் நேரத்திலும் வேலை செய்யும். திமிங்கலத்தைப் பார்க்காமலே அதன் இருப்பிடத்தை கண்டறிய முடியும். பெரிய கடல் பகுதிகளை ஒரே நேரத்தில் கண்காணிக்க உதவும். திமிங்கலங்களின் இடமாற்ற பாதைகள் (Migration routes) மற்றும் வாழ்வியல் பழக்கங்கள் பற்றி அறிய உதவுகிறது.