உங்கள் ஸ்மார்ட்போன் தனிப்பட்ட உரையாடல்களைக் கேட்கிறதா? ஜாக்கிரதை மக்களே!

இன்றைய நவீன உலகில் ஸ்மார்ட்போன்களை தகவல் பரிமாற்றம் முதல் வங்கிச் சேவைகள் வரை அனைத்திற்கும் நம்பி இருக்கிறோம். ஆனால், இந்த சாதனங்கள் நம் தனிப்பட்ட உரையாடல்களை கவனிக்கக்கூடும்  என்பது உங்களுக்குத் தெரியுமா.

இது ஆச்சரியமாக இருந்தாலும், சில சமயங்களில் நாம் அறியாமலேயே இதற்கு அனுமதி அளித்து விடுகிறோம். இது நமது தனிப்பட்ட தரவுகளின் பாதுகாப்புக்கு அச்சுறுத்தலாக மாறக்கூடும். இந்தச் சூழலில், நம்முடைய பேச்சுக்கள் பிறரின் கைகளில் சிக்காமல் பாதுகாக்க, நமது ஸ்மார்ட்போனில் சில முக்கியமான மாற்றங்களைச் செய்வது அவசியம்.

ஸ்மார்ட்போன்கள் நம்மை ஒட்டுக் கேட்பதற்கு பல வழிகள் உள்ளன. நாம் செயலிகளை நிறுவும்போது மைக்ரோஃபோன் போன்ற அம்சங்களைப் பயன்படுத்த அனுமதி கோரப்படும். இதை யோசிக்காமல் அனுமதிக்கும்போது, அந்தச் செயலிகள் பின்னணியில் நம் பேச்சுகளைக் கேட்க வாய்ப்புள்ளது. 

கூகிள் அசிஸ்டென்ட் போன்ற குரல் உதவி அம்சங்களும் 'Hey Google' போன்ற கட்டளைகளுக்காக எப்போதும் காத்திருக்கும். இதைத் தவிர்க்க, போனின் செட்டிங்ஸில் உள்ள கூகிள் அசிஸ்டென்ட் விருப்பத்தை அணைத்து வைக்கலாம். இதன் மூலம் தேவையின்றி மைக் இயங்குவதை நிறுத்தலாம்.

பல செயலிகள் தங்களின் செயல்பாட்டிற்குத் தேவையே இல்லாதபோதும் மைக்ரோஃபோன் அனுமதியைக் கேட்கின்றன. இந்த அனுமதி இருந்தால், அந்தச் செயலிகள் நம் பேச்சுகளை கேட்க முடியும். இதைச் சரிபார்க்க, போனின் செட்டிங்ஸில் உள்ள 'Apps' அல்லது 'Permissions' பகுதிக்குச் சென்று, மைக்ரோஃபோன் அணுகல் வழங்கப்பட்டுள்ள செயலிகளின் பட்டியலைப் பார்க்கலாம். 

அவசியமற்ற செயலிகளுக்கு வழங்கப்பட்டுள்ள மைக் அனுமதியை நீக்குவதே புத்திசாலித்தனம். சில போன்களில், குரல் கட்டளைகளுக்காக எப்போதும் காத்திருக்கும் 'ஆல்வேஸ் லிசனிங்' போன்ற அம்சங்கள் இயக்கப்பட்டிருக்கலாம். இது நமது தனிப்பட்ட பாதுகாப்பிற்கு அச்சுறுத்தல். இதை செட்டிங்ஸில், பொதுவாக 'அணுகல்தன்மை' (Accessibility) அல்லது 'தனியுரிமை' (Privacy) பிரிவுகளில் தேடி, அந்த அம்சத்தை முடக்க வேண்டும்.

எனவே, உங்கள் ஸ்மார்ட்போனில் உள்ள செட்டிங்ஸ்களைப் புரிந்துகொண்டு, தேவையற்ற அனுமதிகளை நீக்குவது அவசியம். இந்த எளிய படிகள் உங்கள் தனிப்பட்ட உரையாடல்களின் பாதுகாப்பை உறுதி செய்து, உங்கள் டிஜிட்டல் தனியுரிமையைப் பேண உதவும். நீங்கள் விழிப்புடன் இருப்பதே பாதுகாப்பிற்கு சிறந்த வழி.