நரகத்தின் கதவு திறக்கப்பட்டதா... பூமிக்கு அடியில் கேட்ட அலறல் சத்தம்!

விண்வெளியில் என்ன இருக்கிறது என்பதை அறிய மனிதன் நிலவு வரை சென்றுவிட்டான். ஆனால் நாம் வாழும் இந்த பூமிப்பந்துக்கு அடியில் என்ன இருக்கிறது என்பது இன்றும் முழுமையாக விடுவிக்கப்படாத ஒரு புதிராகவே இருக்கிறது. 1970களில் விண்வெளிப் போட்டியைப் போலவே, பூமிக்கு அடியில் யார் அதிக தூரம் துளையிடுவது என்ற போட்டி வல்லரசு நாடுகளுக்கு இடையே நடந்தது. 

அதன் விளைவாக ரஷ்யாவில் உருவானதுதான் 'கோலா சூப்பர் டீப் போர்ஹோல்' எனப்படும் உலகின் மிக ஆழமான துளை. ஒரு கட்டத்தில் 'நரகத்திற்கான வாசல்' என்று மக்களால் பயத்துடன் அழைக்கப்பட்ட இந்த இடம், திடீரென மூடப்பட்டது. அறிவியலின் உச்சகட்ட சாதனையாகக் கருதப்பட்ட இந்தத் திட்டம் ஏன் பாதியிலேயே கைவிடப்பட்டது?

போட்டி!

பனி படர்ந்த ஆர்க்டிக் வட்டத்திற்கு அருகில் உள்ள ரஷ்யாவின் கோலா தீபகற்பத்தில் இந்தத் திட்டம் தொடங்கப்பட்டது. அமெரிக்கா விண்வெளியில் சாதனை படைத்துக் கொண்டிருந்த நேரத்தில், சோவியத் யூனியன் பூமியின் ஆழத்தை நோக்கிப் பயணிக்கத் தொடங்கியது. பூமியின் மேலடுக்கு 'க்ரஸ்ட்' என்று சொல்லப்படும் பகுதியைக் கடந்து உள்ளே செல்வதே அவர்களின் லட்சியமாக இருந்தது. சுமார் 24 வருடங்களாக நடந்த இந்தத் தொடர் முயற்சியில், அவர்கள் 12 கிலோமீட்டர் ஆழம் வரை பூமியைத் துளைத்துச் சாதனை படைத்தனர். இது எவரெஸ்ட் சிகரத்தின் உயரத்தை விட அதிகமான ஆழமாகும்.

தடுத்த வெப்பம்!

ஆரம்பத்தில் எல்லாம் சரியாகச் சென்றாலும், ஆழம் அதிகரிக்க அதிகரிக்கச் சூழல் மிகவும் மோசமடைந்தது. பூமிக்கு அடியில் வெப்பம் இருக்கும் என்பது விஞ்ஞானிகளுக்குத் தெரியும். ஆனால் அவர்கள் எதிர்பார்த்ததை விடப் பல மடங்கு அதிகமான வெப்பம் அங்கே காத்திருந்தது. சுமார் 12 கிலோமீட்டர் ஆழத்தில் வெப்பநிலையானது 180 டிகிரி செல்சியஸைத் தொட்டது. இது இயந்திரங்கள் தாங்கக்கூடிய வெப்பத்தை விட மிக அதிகம். பிளாஸ்டிக் உருகுவதைப்போல, துளையிடும் கருவிகள் அந்த வெப்பத்தில் செயலிழக்கத் தொடங்கின. இதனால் மேற்கொண்டு ஒரு அடி கூட முன்னேற முடியாத சூழல் உருவானது.

அதிர்ச்சிகரமான கண்டுபிடிப்பு!

இந்தத் திட்டத்தில் பல விசித்திரமான விஷயங்கள் கண்டுபிடிக்கப்பட்டன. மேற்கத்திய விஞ்ஞானிகள் பூமிக்கு அடியில் பாறைகள் மிகவும் இறுக்கமாக இருப்பதால் அங்குத் தண்ணீர் இருக்க வாய்ப்பே இல்லை என்று நம்பினர். ஆனால் ரஷ்ய விஞ்ஞானிகள் அந்த ஆழத்தில் பாறைகளுக்கு இடையே தண்ணீர் இருப்பதைக் கண்டுபிடித்தனர். பாறைகளில் உள்ள தாதுக்களிலிருந்து ஹைட்ரஜன் மற்றும் ஆக்சிஜன் அணுக்கள் பிரிந்து நீராக மாறியிருந்தது உலகத்தையே வியப்பில் ஆழ்த்தியது. இது புவியியல் வரலாற்றில் ஒரு முக்கியமான மாற்றத்தை ஏற்படுத்தியது.

வதந்திகள், உண்மைகள்!

இந்தக் கிணறு தோண்டப்பட்ட சமயத்தில் பல திகிலூட்டும் வதந்திகள் பரவின. பூமிக்கு அடியில் துளைக்கும்போது, அங்கிருந்து மனிதர்களின் அலறல் சத்தம் கேட்டதாகவும், அது நரகத்தில் வதைக்கப்படும் ஆன்மாக்களின் சத்தம் என்றும் உள்ளூர் மக்கள் பேசிக்கொண்டனர். ஆனால் உண்மையில் அது இயந்திரங்கள் பாறைகளை உடைக்கும்போது ஏற்பட்ட விசித்திரமான ஒலிகள் மட்டுமே என்று பின்னர் விளக்கப்பட்டது. ஆனாலும் அந்த இடம் குறித்த மர்மக் கதைகள் இன்றும் உலாவருகின்றன.

தொழில்நுட்பச் சிக்கல்கள் ஒருபுறம் இருக்க, சோவியத் யூனியனின் வீழ்ச்சிக்குப் பிறகு நிதிப் பற்றாக்குறை ஏற்பட்டது. அதீத வெப்பத்தைச் சமாளிக்கும் தொழில்நுட்பம் இல்லாததாலும், பணத் தட்டுப்பாட்டாலும் 1992 ஆம் ஆண்டு இந்தத் திட்டம் நிறுத்தப்பட்டது. பின்னர் 2005 ஆம் ஆண்டு இந்த இடம் நிரந்தரமாக மூடப்பட்டது. இன்று அந்தப் பகுதி முழுவதும் பாழடைந்து, துருப்பிடித்த ஒரு இரும்பு மூடியால் அந்தத் துளை மூடப்பட்டுள்ளது.

இன்று அந்த இடம் ஒரு சுற்றுலாத் தலமாக மாறிவிட்டாலும், பூமிக்கு அடியில் 12 கிலோமீட்டர் தூரத்தில் மனிதன் விட்டுச் சென்ற தடயங்கள் இன்றும் உறங்கிக்கொண்டிருக்கின்றன.