UPI பயனர்கள் ஜாக்கிரதை... அரங்கேறும் புதுவித மோசடி! 

தொழில்நுட்பம் வளர்ந்து விட்ட காலத்தில் தற்போது பரவி வரும் ஒரு புதிய மோசடி முறைதான் 'ஜம்ப்ட் டெபாசிட் மோசடி (Jumped Deposit Scam)'. இது UPI பயனர்களைக் குறிவைத்து நடத்தப்படுகிறது. இந்த மோசடியின் நுணுக்கங்களையும், அதிலிருந்து நம்மை பாதுகாக்கும் வழிகளையும் இந்தப் பதிவில் பார்க்கலாம்.

'ஜம்ப்ட் டெபாசிட்' மோசடி எவ்வாறு செயல்படுகிறது?

இந்த மோசடியில், மோசடி செய்பவர் முதலில் உங்களை நம்ப வைக்க உங்கள் வங்கிக் கணக்கில் சிறிய தொகையை UPI மூலம் அனுப்புவார். உதாரணமாக, ₹100 அல்லது ₹500 போன்ற சிறிய தொகை உங்கள் கணக்கில் வரவு வைக்கப்படும். பின்னர், அவர் உங்களைத் தொடர்புகொண்டு, தவறுதலாக அதிக தொகை அனுப்பிவிட்டதாகவும், அதைத் திருப்பி அனுப்பும்படியும் கேட்பார்.

அவர் கூறுவதை நம்பி, நீங்கள் உங்கள் UPI செயலியைத் திறந்து பணத்தை திருப்பி அனுப்ப முயற்சிக்கும்போதுதான் ஆபத்து நிகழ்கிறது. நீங்கள் உங்கள் UPI பின்னை உள்ளிட்டு பரிவர்த்தனையை உறுதி செய்யும் முன், மோசடி செய்பவர் ஒரு போலியான பணப் பரிவர்த்தனை கோரிக்கையை அனுப்புவார். நீங்கள் அறியாமல் உங்கள் பின்னை உள்ளிடுவதன் மூலம், உங்கள் கணக்கிலிருந்து பணம் மோசடி செய்பவரின் கணக்கிற்கு மாற்றப்படும்.

இந்த 'ஜம்ப்ட் டெபாசிட்' மோசடி குறித்து தமிழ்நாடு காவல்துறை உட்பட பல்வேறு அமைப்புகள் பொதுமக்களுக்கு எச்சரிக்கை விடுத்துள்ளன. தேசிய சைபர் கிரைம் போர்ட்டலில் இது தொடர்பான புகார்கள் தொடர்ந்து பதிவாகி வருகின்றன. எனவே, அடையாளம் தெரியாத நபர்களிடமிருந்து வரும் எந்த பணப் பரிவர்த்தனையிலும் கவனமாக இருக்குமாறு அறிவுறுத்தப்படுகிறது.

நம்மை பாதுகாக்கும் வழிகள்:

• உங்கள் கணக்கில் எதிர்பாராத விதமாக பணம் வரவு வைக்கப்பட்டால், உடனே உங்கள் இருப்பைச் சரிபார்க்க வேண்டாம். குறைந்தபட்சம் 15 முதல் 30 நிமிடங்கள் காத்திருக்கவும். இந்த நேரத்திற்குள் பெரும்பாலான மோசடி கோரிக்கைகள் செயலிழந்துவிடும்.

• உங்கள் இருப்பை உடனடியாகச் சரிபார்க்க வேண்டிய கட்டாயம் ஏற்பட்டால், வழக்கமாகப் பயன்படுத்தும் பின்னுக்கு பதிலாக வேறு ஒரு பின்னை உள்ளிடவும். இதனால், மோசடி செய்பவர் அனுப்பும் போலி கோரிக்கை நிராகரிக்கப்படும்.

• தெரியாத நபர்களிடமிருந்து வரும் அழைப்புகள் அல்லது குறுஞ்செய்திகளுக்குப் பதிலளிக்க வேண்டாம். குறிப்பாக, பணம் தொடர்பான எந்த கோரிக்கையையும் ஏற்க வேண்டாம். உங்கள் UPI பின்னை யாருடனும் பகிர வேண்டாம்.

• உங்கள் வங்கிக் கணக்கில் சந்தேகத்திற்கிடமான பரிவர்த்தனைகள் ஏதேனும் நிகழ்ந்தால், உடனடியாக உங்கள் வங்கி மற்றும் சைபர் கிரைம் அதிகாரிகளிடம் புகார் அளிக்கவும்.

விழிப்புணர்வுடன் இருப்பதன் மூலமும், சில எளிய முன்னெச்சரிக்கை நடவடிக்கைகளைப் பின்பற்றுவதன் மூலமும் இந்த மோசடியில் இருந்து நம்மை பாதுகாத்துக் கொள்ள முடியும்.