கண்களை மூடினால் கருப்பு நிறம் தெரியாதா? அறிவியலின் விசித்திரமான ரகசியம்!

கண் இமையின் உட்புறம் கருப்பாக இல்லை. பின் ஏன் நாம் கண்களை மூடினால் கருப்பாக தெரிகிறது தெரியுமா? கண்களை மூடும்போது நமக்கு கருப்பு நிறம் தெரிவதுபோல் தோன்றினாலும் அது உண்மையான கருப்பு நிறம் அல்ல; அது ஒரு அடர்ந்த சாம்பல் (dark grey) நிறமாகும். அறிவியலில் இதனை visual noise அல்லது background adaptation எனக் கூறுவார்கள்.

நாம் கண்களை மூடினாலும் ஏன் இந்த நிறம் தெரிகிறது என்பதற்கான ஐஜென்கிராவ் அறிவியல் காரணங்கள்: அறிவியல் ரீதியாக இதற்கு ஐஜென்கிராவ் (Eigengrau) என்று பெயர்.

ஐஜென்கிராவ் என்றால் என்ன?

ஜெர்மன் மொழியில் 'ஐஜென்' என்றால் 'தனிப்பட்ட அல்லது சொந்தமான' என்றும், 'கிராவ்' என்றால் 'சாம்பல்' என்றும் பொருள். கண்களை மூடி வெளிச்சம் வராத நிலையிலும் நம் கண்களில் உள்ள விழித்திரை (Retina) மற்றும் நரம்புகள் முழுமையாக ஓய்வெடுப்பதில்லை.

ஒளியில்லாத போதும் விழித்திரையில் உள்ள செல்கள் சீரற்ற சிறிய மின் சமிக்ஞைகளை மூளைக்கு அனுப்பிக்கொண்டே இருக்கும். இந்த சீரற்ற சமிக்ஞைகளால்தான் மூளை தூய கருப்பு நிறத்திற்கு பதிலாக ஒரு மங்கலான அடர்ந்த சாம்பல் நிறத்தை உருவாக்குகிறது. இதுவே நாம் பார்க்கும் இருட்டிற்கான பின்புல நரம்புச் செயல்பாடாகும்.

ஓய்வெடுக்காத மூளையும் விழித்திரையும்:

நாம் கண்களை மூடி ஒளியை தடுத்தாலும் நமது கண்ணில் உள்ள ஒளிச்சேர்க்கை செல்கள் (Photoreceptors) மற்றும் மூளை முற்றிலும் செயலிழந்து விடுவதில்லை. வெளிச்சம் இல்லாத நிலையிலும் விழித்திரையில் உள்ள செல்கள் தொடர்ந்து சிறிய அளவிலான மின் சிக்னல்களை மூளைக்கு அனுப்பிக் கொண்டே இருக்கின்றன. இந்த தொடர் செயல்பாட்டை மூளை ஒரு மங்கலான சாம்பல் நிறமாகவே பார்க்கிறது.

கண்களில் உள்ள செல்கள் மற்றும் நரம்புகள் வெளிச்சம் இல்லாமலேயே சிறிய அளவிலான உயிர் ஒளி அலைகளை (Biophotons) உருவாக்குவதே இதற்கு முக்கியக் காரணமாகும்.

எனவே நாம் பார்ப்பது இருளின் கருமை அல்ல, மாறாக நமது கண்கள் மற்றும் மூளையின் தொடர்ச்சியான நரம்பு மண்டல செயல்பாட்டின் வெளிப்பாடே ஆகும்.

பாஸ்பீன்ஸ் (Phosphenes):

சில நேரங்களில் கண்களை மூடி லேசாக தேய்க்கும் பொழுது அல்லது அழுத்தும் பொழுது வண்ண வண்ணப் புள்ளிகள், ஒளிக்கீற்றுகள் மற்றும் வடிவங்கள் தோன்றும். இதனை மருத்துவரீதியாக ஃபாஸ்பீன்கள் என்று அழைக்கப்படுகின்றன. இது கண் செல்களின் மீது ஏற்படும் அழுத்தத்தால் ஏற்படும் தற்காலிக ஒளிர்தல் ஆகும். வெளிப்புற ஒளி எதுவும் கண்ணுக்குள் நுழையாத நிலையிலும், நம் மூளை ஒளியைப் பார்ப்பது போன்ற ஒரு மாயையை இது உருவாக்குகிறது.

கண்களின் பின்புறத்தில் விழித்திரை என்ற ஒளி உணர்திறன் அடுக்கு உள்ளது. சாதாரணமாக இது ஒளியை உணர்ந்து மூளைக்கு அனுப்பும். ஆனால் நாம் கண்களை அழுத்தும்போது ஏற்படும் இயந்திர அழுத்தம் அங்குள்ள நரம்பு செல்களை (Photoreceptors) நேரடியாகத் தூண்டுகிறது.

இந்த அழுத்தத்தால் விழித்திரை செல்கள் மின் சமிக்ஞைகளை உருவாக்கி மூளைக்கு அனுப்புகின்றன. அந்த நரம்புகளுக்கு ஒளியை மட்டுமே உணர்த்த முடியும் என்பதால் அழுத்தத்தையும் ஒளியாகவே மாற்றி, வண்ணக் கீற்றுகளாகவோ, நட்சத்திரங்களாகவோ அல்லது சுழல் வடிவங்களாகவோ மூளை நமக்கு காட்டுகிறது.

கண்களை பலமாக அழுத்தும்போது விழித்திரைக்கு செல்லும் நுண் ரத்த நாளங்களில் ரத்த ஓட்டமும், ஆக்ஸிஜன் விநியோகமும் ஒரு நொடி தடைபடுகிறது. இதுவும் இத்தகைய ஒளிரும் புள்ளிகளைத் தூண்டலாம்.

இது ஒரு இயல்பான உடல் இயக்கம் என்றாலும், கண்களைத் தொடர்ந்து பலமாகத் தேய்ப்பதோ அல்லது அழுத்துவதோ நல்லதல்ல‌. இது கண்ணின் கருவிழி மற்றும் லென்ஸை பாதிக்கலாம்.

இந்தத் தகவலைப் படிப்பதன் மூலம் உங்கள் கண்கள் மற்றும் மூளையின் இயல்பான நரம்பியல் செயல் பாடுகளைத் துல்லியமாகப் புரிந்துகொண்டு, தேவையில்லாத பயத்தைப் போக்கி, கண் ஆரோக்கியத்தை பாதுகாப்பாகப் பராமரிக்கும் தெளிவைப் பெறுவீர்கள்.