அடுப்பு பக்கத்துல இந்த அழுக்கு இருக்கா? பூச்சி தொல்லை முதல் தீ அபாயம் வரை எச்சரிக்கை!

அடுப்புக்கும் சமையலறை மேடைக்கும் இடையே படியும் அழுக்கை எளிய முறையில் அகற்றுவது எப்படி? என்பதைப் பற்றி இந்தப் பதிவில் பார்ப்போம்.

சமையலறை சுத்தம் செய்தல்:

“சுத்தம் சோறு போடும்” என்பது மிகவும் சிறந்த பழமொழியாகும். நாம் சமைக்கும் உணவு சுத்தமான இடத்தில் தயாரிக்கப்பட வேண்டும். எனவே, சமையலறையை தினமும் சுத்தமாக வைத்திருக்க வேண்டும். சமையல் பாத்திரங்கள், அடுப்பு, மேசை மற்றும் தரையை நன்றாகச் சுத்தம் செய்ய வேண்டும்.

குப்பைகளை உடனுக்குடன் அகற்றி, உணவுப் பொருட்களை மூடி வைக்க வேண்டும். சமையலறையைச் சுத்தமாக வைத்தால் நோய்கள் பரவாமல் தடுக்கலாம்; குடும்பத்தினரின் ஆரோக்கியத்தையும் பாதுகாக்கலாம்.

சமையலறை சுத்தம் செய்வதில் உள்ள சவால்கள்:

சமையலறையைச் சுத்தம் செய்வது எளிதான பணியாகத் தோன்றினாலும், அடுப்புக்கும் மேடைக்கும் இடையே உள்ள குறுகிய இடைவெளி, சிம்னியின் மூலைகள், குளிர்சாதனப் பெட்டியின் பின்புறம் போன்ற எளிதில் எட்ட முடியாத பகுதிகளைச் சுத்தம் செய்வது சவாலாக இருக்கும்.

எண்ணெய், உணவுத் துகள்கள் மற்றும் காய்ந்த அழுக்கு போன்றவை தொடர்ந்து படிவதால், அவற்றை அகற்ற கூடுதல் நேரமும் கவனமும் தேவைப்படுகிறது. எனவே, அழுக்கு அதிகமாகச் சேரும் முன்பே சிறிது சிறிதாகச் சுத்தம் செய்வது சிறந்த வழியாகும்.

இடைவெளியை எப்படி சுத்தம் செய்வது?

முதலில், வாக்யூம் கிளீனரின் கிரீவிஸ் அட்டாச்மென்ட் பயன்படுத்தி அந்த இடத்தில் இருக்கும் தூசி, உணவுத் துகள்கள் மற்றும் குப்பைகளை அகற்றுங்கள்.

அதன் பிறகு, மீதமுள்ள அழுக்கை அகற்ற மெல்லிய மைக்ரோஃபைபர் துணியைப் பயன்படுத்தலாம்.

வெதுவெதுப்பான நீரில் சில துளிகள் பாத்திரம் கழுவும் திரவத்தைச் சேர்த்து, துணியை லேசாக ஈரப்படுத்தி இடைவெளிக்குள் செலுத்தி நன்றாகத் துடைக்கலாம்.

இறுதியாக, சுத்தமான உலர்ந்த துணியால் அந்தப் பகுதியைத் துடைக்க வேண்டும். இதனால் நீர்த்துளிகள் தேங்குவதையும் ஈரப்பதம் நீண்ட நேரம் இருப்பதையும் தவிர்க்கலாம்.

இடைவெளி மிகவும் குறுகலாக இருந்தால், மைக்ரோஃபைபர் துணியை ஒரு பட்டர் கத்தி அல்லது நீளமான ஸ்கேல் போன்ற மெல்லிய பொருளின் மீது மடித்து பயன்படுத்தலாம். இதன் மூலம் எளிதில் எட்ட முடியாத பகுதிகளையும் சுத்தம் செய்ய முடியும்.

மற்றொரு எளிய வழியாக, பிளாட் மைக்ரோஃபைபர் மாப் பயன்படுத்தலாம்.

கடினமான அழுக்கை எப்படி அகற்றுவது?

மைக்ரோஃபைபர் துணியால் அகற்ற முடியாத அளவுக்கு அழுக்கு காய்ந்து படிந்திருந்தால், பேக்கிங் சோடா மற்றும் தண்ணீர் கலந்து பேஸ்ட் தயாரிக்கலாம்.

இந்த பேஸ்ட்டை ஒரு மரக்குச்சி, காட்டன் பேட் அல்லது மெல்லிய கிளீனிங் வாண்டில் வைத்து இடைவெளிக்குள் பயன்படுத்தி அழுக்கை மெதுவாக அகற்றலாம்.

சுத்தம் செய்வதற்கு முன் அடுப்பு முழுமையாக குளிர்ந்திருக்க வேண்டும். சுத்தம் செய்த பகுதியும் முழுமையாக காய்ந்த பிறகே அடுப்பு அல்லது ஓவனை மீண்டும் பயன்படுத்த வேண்டும்.

இந்த இடைவெளியை சுத்தம் செய்வது ஏன் முக்கியம்?

அடுப்புக்கும் மேடைக்கும் இடையே உள்ள பகுதியில் எண்ணெய், உணவுத் துகள்கள் மற்றும் சிறு குப்பைகள் எளிதில் சேரும். இவை நீண்ட நாட்கள் அங்கே இருந்தால் எறும்புகள், ஈக்கள் போன்ற பூச்சிகளை ஈர்க்கக்கூடும்.

குறிப்பாக மாமிச உணவுகள் தயாரிக்கும்போது வெளியேறும் சாறு இந்த இடைவெளிக்குள் சென்றால் விரைவாகக் கெட்டு துர்நாற்றம் ஏற்படுத்தலாம். எனவே அத்தகைய திரவம் உள்ளே சென்றால் உடனடியாக சுத்தம் செய்வது நல்லது.

மேலும், எண்ணெய் மற்றும் உணவுக் கழிவுகள் வெப்பமான பகுதிகளுக்கு அருகில் தேங்கினால் தீ அபாயமும் ஏற்படலாம்.

சுத்தம் செய்யும் போது கவனிக்க வேண்டியவை:

அடுப்பின் இடைவெளியைச் சுத்தம் செய்வதற்கு முன், அடுப்பு மற்றும் ஓவன் முழுமையாக அணைக்கப்பட்டு குளிர்ந்துள்ளதா என்பதை உறுதி செய்ய வேண்டும். அதிக அளவு தண்ணீரை இடைவெளிக்குள் ஊற்றுவதைத் தவிர்க்க வேண்டும். ஈரப்பதம் மின்சாரப் பகுதிகளுக்குள் செல்லாமல் கவனமாகச் சுத்தம் செய்ய வேண்டும்.

கடுமையான ரசாயன கிளீனர்களைப் பயன்படுத்துவதற்கு முன் அவற்றின் வழிமுறைகளைப் படிக்க வேண்டும். சாதாரண அழுக்குகளை அகற்ற மைக்ரோஃபைபர் துணி, சிறிதளவு பாத்திரம் கழுவும் திரவம் அல்லது பேக்கிங் சோடா போதுமானது.

கூர்மையான பொருட்களால் இடைவெளியை வலுக்கட்டாயமாகத் தேய்ப்பதைத் தவிர்க்க வேண்டும். உணவு, எண்ணெய் அல்லது குழம்பு இடைவெளிக்குள் சென்றால், உடனடியாகத் துடைத்து சுத்தம் செய்வது நல்லது. இவ்வாறு தொடர்ந்து பராமரித்தால் கடினமான அழுக்கு படிவதைத் தவிர்க்கலாம்.

சுத்தம் செய்ய வேண்டிய மற்ற நான்கு முக்கியமான இடங்கள்:

1. அடுப்பு மற்றும் சமையலறை மேடைக்கு இடையேயான பகுதி மட்டுமல்லாமல், பின்வரும் இடங்களையும் தவறாமல் சுத்தம் செய்ய வேண்டும்.

2. சிம்னி அல்லது எக்ஸாஸ்ட் ஃபேன் சிம்னியை மாதம் ஒரு முறையாவது கழற்றி சிறிதளவு பாத்திரம் கழுவும் திரவம் மற்றும் பேக்கிங் சோடாவால் சுத்தம் செய்தல் வேண்டும்.

3. குளிர்சாதனப் பெட்டியின் மேற்பகுதி மற்றும் குளிர்சாதனப் பெட்டியின் கீழும் பின்புறம்.

4. சமையலறை குழாயின் பின்புறம்.

இந்த இடங்களை அழுக்கு அதிகமாகும் வரை காத்திருக்காமல், ஒரு குறிப்பிட்ட அட்டவணைப்படி சுத்தம் செய்வது நல்லது. மாதத்திற்கு ஒருமுறை சில மணித்துளிகள் செலவிட்டு சுத்தம் செய்தால், பல மாதங்களாக படிந்திருக்கும் எண்ணெய் மற்றும் அழுக்கை பின்னர் கடுமையாக தேய்த்து அகற்ற வேண்டிய அவசியம் இருக்காது.

சுத்தமான சமையலறை – ஆரோக்கியமான குடும்பம்

சமையலறையின் வெளிப்புறப் பகுதிகளை மட்டும் சுத்தம் செய்வது போதாது; எளிதில் கவனிக்கப்படாத இடைவெளிகள் மற்றும் மூலைகளையும் அவ்வப்போது சுத்தம் செய்ய வேண்டும். குறிப்பாக அடுப்புக்கும் சமையலறை மேடைக்கும் இடையே உள்ள இடைவெளியைத் தொடர்ந்து பராமரிப்பது அழுக்கு, துர்நாற்றம் மற்றும் பூச்சித் தொல்லையைத் தவிர்க்க உதவும்.

தினமும் சிறிது நேரம் ஒதுக்கி சமையலறையைச் சுத்தமாகப் பராமரித்தால், அது சுகாதாரமானதாகவும் பாதுகாப்பானதாகவும் இருக்கும். சுத்தமான சமையலறை குடும்பத்தினரின் ஆரோக்கியத்தையும் மகிழ்ச்சியையும் பாதுகாக்க உதவும்.

சமையலறை மேடை இடைவெளியில் மறைந்திருக்கும் பூச்சிகள் மற்றும் தீ அபாயத்தில் இருந்து உங்கள் குடும்பத்தைப் பாதுகாத்து, எந்த சிரமமும் இன்றி எளிதாகச் சுத்தம் செய்யும் முறைகளைக் கற்றுக்கொள்வீர்கள்.