கிறிஸ்துமஸ்: அமைதி மற்றும் மகிழ்ச்சியின் திருவிழா!

கிறிஸ்துமஸ் என்பது உலகெங்கிலும் உள்ள கோடிக்கணக்கான மக்களால் இயேசு கிறிஸ்துவின் பிறப்பைக் கொண்டாடும் ஒரு உன்னதமான திருவிழாவாகும். இது சாதி, மத பேதமின்றி அன்பு, அமைதி மற்றும் மகிழ்ச்சியைப் பகிரும் ஒரு உலகளாவிய விழாவாகத் திகழ்கிறது. 2025-ம் ஆண்டு டிசம்பர் 25, வியாழக்கிழமையன்று இந்த விழா இந்தியா உட்பட உலகம் முழுவதும் உற்சாகமாகக் கொண்டாடப்பட உள்ளது. இந்தியாவில் இது ஒரு தேசிய விடுமுறை தினமாகும்.

வரலாற்றுப் பின்னணி மற்றும் முக்கியத்துவம்:

கிறிஸ்தவ நம்பிக்கையின்படி, மாட்டுத் தொழுவம் ஒன்றில் எளிமையின் உருவமாகப் பிறந்த இயேசுவின் வருகை, இருளில் இருந்த உலகிற்கு ஒளியைக் கொண்டு வந்ததாகக் கருதப்படுகிறது. "கிறிஸ்துமஸ்" என்ற சொல் "கிறிஸ்துவின் திருப்பலி" (Christ's Mass) என்ற சொல்லில் இருந்து உருவானது.

ஆரம்பகால கிறிஸ்தவ சமூகத்தில் இயேசுவின் பிறந்தநாளைக் கொண்டாடும் வழக்கமில்லை. கி.பி 221-ல் செக்ஸ்டஸ் ஜூலியஸ் ஆப்பிரிக்கானஸ் என்பவரால் டிசம்பர் 25 முன்மொழியப்பட்டு, பின்னர் ஏற்றுக் கொள்ளப்பட்டது. இது ரோமானிய குளிர்கால சங்கிராந்தி கொண்டாட்டங்களுடன் தொடர்புடையது என்றும், சூரியனின் மறுபிறப்பை 'கடவுளின் மகனின்' பிறப்புடன் இணைத்து இந்தத் தேதி முடிவு செய்யப்பட்டதாகவும் கருதப்படுகிறது. 9-ம் நூற்றாண்டு முதல் இது முறையான வழிபாட்டு விழாவாக மாறியது.

இந்தியக் கொண்டாட்டங்களின் தனித்துவமான மரபுகள்:

இந்தியாவில் கிறிஸ்துமஸ் பண்டிகை மேற்கத்திய நாடுகளை விட கலாச்சார ரீதியாக மிகவும் மாறுபட்டது. இங்கு மக்கள் தங்களின் உள்ளூர் மரபுகளுடன் இவ்விழாவை இணைத்துக் கொள்கிறார்கள்.

அலங்காரங்கள்: மேற்கத்திய நாடுகளில் ஊசியிலை மரங்கள் பயன்படுத்தப்படும் நிலையில், இந்தியாவில் பல இடங்களில் வாழை அல்லது மா மரங்களை அலங்கரிக்கும் பழக்கம் உள்ளது. வீடுகளின் வாசலில் 'டோரன்' எனப்படும் மா இலை மற்றும் சாமந்திப் பூக்களால் ஆன தோரணங்கள் கட்டப்படுகின்றன.

விளக்குகளின் திருவிழா: தென்னிந்தியாவில், குறிப்பாகத் தமிழகத்திலும் கேரளாவிலும், வீட்டின் கூரைகளில் சிறிய களிமண் விளக்குகளை ஏற்றி வைப்பார்கள். கோவாவில் நட்சத்திர வடிவ காகித விளக்குகள் தெருக்களை அலங்கரிக்கின்றன.

பிறப்புக் காட்சி : மணல், பாறைகள் மற்றும் செங்கற்களைப் பயன்படுத்தி இயேசுவின் பிறப்புச் சம்பவத்தை விளக்கும் அழகிய "தொட்டில்" அல்லது "குடில்" அமைப்பது இந்திய கிறிஸ்தவர்களின் முக்கிய கலைப் பணியாகும்.

வழிபாடு மற்றும் சமூகக் கூடல்கள்:

கிறிஸ்துமஸ் தினத்திற்கு முந்தைய நாள் நள்ளிரவிலும், கிறிஸ்துமஸ் அதிகாலையிலும் தேவாலயங்களில் சிறப்புத் திருப்பலிகள் நடைபெறும். ரோமன் கத்தோலிக்கர்கள் நள்ளிரவுத் திருப்பலியிலும், புராட்டஸ்டன்ட்டுகள் மெழுகுவர்த்தி ஏந்தி கரோல் பாடல்கள் பாடும் வழிபாட்டிலும் பங்கேற்பார்கள்.

உணவுப் பழக்கங்களைப் பொறுத்தவரை, கேரளாவின் புகழ்பெற்ற 'பிளம் கேக்' மற்றும் பிராந்திய வகை காரமான கறி உணவுகள் விருந்தின் சிறப்பம்சமாகும். கிறிஸ்துமஸ் தாத்தா (Santa Claus) இந்தியாவில் பெரும்பாலும் குதிரை வண்டியில் வந்து குழந்தை களுக்குப் பரிசுகளை வழங்குவது ஒரு போற்றத்தக்க மரபாகும்.

மாநில வாரியான கொண்டாட்டங்கள்:

கோவா: கடற்கரை நகரமான கோவாவில் இசை, நடனம் மற்றும் பாரம்பரிய உணவுகளுடன் கொண்டாட்டங்கள் களைகட்டும்.

வடகிழக்கு மாநிலங்கள்: அசாம், அருணாச்சலப் பிரதேசம் போன்ற மாநிலங்களில் தேவாலயங்கள் மெழுகுவர்த்தி ஒளியில் அமைதியாகக் காட்சியளிக்கும்.

மலைப் பிரதேசங்கள்: சிம்லா போன்ற இடங்களில் பனி மூடிய சூழலில் 'பொம்மை ரயில்' பயணம் பயணிகளுக்கு ஒரு குளிர்கால அதிசய அனுபவத்தைத் தருகிறது.

கொச்சி: இங்கு கலைக் கண்காட்சிகள் மற்றும் பாரம்பரிய விளையாட்டுகளுடன் ஆண்டு இறுதி விழாக்கள் கோலாகலமாக நடைபெறும்.

தற்கால சூழலில் கிறிஸ்துமஸ்

இன்றைய காலகட்டத்தில், கிறிஸ்துமஸ் என்பது வெறும் மதரீதியான விழாவாக மட்டும் இல்லாமல், அமைதி மற்றும் மனிதாபிமானத்தை வலியுறுத்தும் ஒரு திருவிழாவாக மாறியுள்ளது. ஏழைகளுக்கு உதவுதல் மற்றும் ஆதரவற்றோருக்குப் பரிசுகள் வழங்குதல் போன்ற நற்செயல்கள் மூலம் இவ்விழா அர்த்தமுள்ளதாக மாற்றப்படுகிறது. டிசம்பர் மாதத்தின் கடும் குளிரிலும் மனதிற்கு இதமான வெப்பத்தைத் தருவது இந்தக் கிறிஸ்துமஸ் பண்டிகை, கொண்டாட்டங்களே.