17 வயதில் இரட்டை சாதனை! இந்திய டேபிள் டென்னிஸின் புதிய நம்பிக்கை சிண்ட்ரெலா தாஸ்!

இந்திய விளையாட்டுத்துறையில் இளம் வீரர்கள் தொடர்ந்து புதிய சாதனைகளை படைத்து வருகின்றனர். அந்த வரிசையில் தற்போது அனைவரது கவனத்தையும் ஈர்த்திருப்பவர் மேற்கு வங்கத்தைச் சேர்ந்த டேபிள் டென்னிஸ் வீராங்கனை சிண்ட்ரெலா தாஸ். தனது 17வது பிறந்தநாளை கொண்டாடிய நாளில், ஒரே போட்டியில் இரண்டு பட்டங்களை வென்று அவர் சாதனை படைத்துள்ளார்.

வரவிருக்கும் ஆசிய விளையாட்டுப் போட்டியில் இந்தியாவின் இளம் வீராங்கனையாக களமிறங்க உள்ளதால், அவரது பயணம் பலரது எதிர்பார்ப்பையும் அதிகரித்துள்ளது.

கொல்கத்தாவைச் சேர்ந்த சிண்ட்ரெலா தாஸ் சிறு வயதிலேயே டேபிள் டென்னிஸில் ஆர்வம் காட்டத் தொடங்கினார். 2018ஆம் ஆண்டு, தனது எட்டு வயதில் Ultimate Table Tennis போட்டியை நேரில் பார்த்தபோது, இந்தியாவின் முன்னணி வீராங்கனைகளை பார்த்து உற்சாகமடைந்தார். குறிப்பாக மணிகா பத்ராவை தனது முன்மாதிரியாகக் கருதி வந்தார். பின்னர் அவரையே எதிர்த்து விளையாடும் அளவுக்கு சிண்ட்ரெலா உயர்ந்தது அவரது திறமைக்கும் கடின உழைப்புக்கும் சான்றாக அமைந்தது.

2023ஆம் ஆண்டு, U15, U17, U19 பிரிவுகளில் தேசிய தரவரிசைப் போட்டிகளில் பட்டங்களை வென்று தனது திறமையை வெளிப்படுத்தினார்.

இளையோர் பிரிவிலிருந்து சீனியர் பிரிவுக்கு மாறிய பிறகும் அவரது முன்னேற்றம் தொடர்ந்தது. 2025ஆம் ஆண்டு தேசிய தரவரிசைப் போட்டியில் பெண்கள் ஒற்றையர் அரையிறுதிக்கு முன்னேறிய அவர், 2026ஆம் ஆண்டு அதே பிரிவில் இறுதிப்போட்டிக்கு சென்றார். Ultimate Table Tennis போட்டியில் தனது அறிமுக ஆட்டத்திலேயே மணிகா பத்ராவை 3-0 என்ற கணக்கில் வீழ்த்தியது அவரது பயணத்தில் குறிப்பிடத்தக்க தருணமாக அமைந்தது.

சமீபத்தில் நடைபெற்ற ஆசிய இளையோர் டேபிள் டென்னிஸ் சாம்பியன்ஷிப்பில் சிண்ட்ரெலா இரட்டையர் பிரிவில் வெள்ளிப் பதக்கமும், ஒற்றையர் பிரிவில் வெண்கலப் பதக்கமும் வென்றார். இதன் மூலம் சர்வதேச அளவிலும் தனது திறனை நிரூபித்தார். 2026 ஆசிய விளையாட்டுப் போட்டிக்கான இந்திய பெண்கள் அணியில் இடம்பிடித்துள்ள அவர், அந்த அணியின் இளம் உறுப்பினராக உள்ளார்.

கான்பூரில் நடைபெற்ற UTT National Ranking Table Tennis Championships போட்டியில் அவர் சமீபத்தில் இரட்டை வெற்றியை பதிவு செய்தார். U19 பெண்கள் ஒற்றையர் மற்றும் சீனியர் பெண்கள் ஒற்றையர் ஆகிய இரண்டு பிரிவுகளிலும் பட்டம் வென்றார்.

தனது 17வது பிறந்த நாளை வீட்டைவிட்டு தொலைவில் கொண்டாடிய அவர், இந்த இரண்டு வெற்றிகளையும் பிறந்தநாள் பரிசாக பெற்றுள்ளார். தொடர்ச்சியான போட்டிகள், பயணம், பயிற்சி ஆகியவற்றுக்கு இடையிலும் தனது படிப்பையும் அவர் கவனித்து வருகிறார்.

ஆசிய விளையாட்டுப் போட்டி அவருக்கு மிகப்பெரிய சவாலாக இருக்கும். உலகின் முன்னணி வீராங்கனைகளை எதிர்கொள்ளும் வாய்ப்பு, அவரது திறனை மேலும் வளர்க்க உதவும். பதக்கம் வெல்வதே தனது முக்கிய இலக்கு என்று அவர் ஏற்கனவே தெரிவித்துள்ளார்.

ஒவ்வொரு புள்ளியையும் முக்கியமாக கருதி விளையாட வேண்டும் என்பதையும் அவர் உணர்ந்துள்ளார்.அவரது வெற்றியில் பயிற்சியாளர்களின் பங்களிப்பும் முக்கியமானது. இளம் வயதிலேயே உயர்மட்ட போட்டிகளில் விளையாடுவதால், ஒவ்வொரு போட்டியும் அவருக்கு புதிய அனுபவத்தை வழங்குகிறது.

வெளிநாட்டு வீராங்கனைகளின் மாறுபட்ட ஆட்ட முறைகளை கற்றுக்கொள்வதும், அழுத்தமான தருணங்களில் நிதானத்தை கடைப்பிடிப்பதும் அவரது அடுத்தகட்ட வளர்ச்சிக்கு உதவும். மேலும், தேசிய அணியில் மூத்த வீராங்கனைகளுடன் இணைந்து செயல்படுவது அவருக்கு சர்வதேச போட்டிகளின் சூழலை புரிந்துகொள்ளவும் தன்னம்பிக்கையை வளர்த்துக் கொள்ளவும் சிறந்த வாய்ப்பாக அமையும்.

இந்த அனுபவங்கள் அனைத்தும் எதிர்காலத்தில் பெரிய வெற்றிகளை நோக்கி நகர அவருக்கு உறுதியான அடித்தளமாக அமையும் என்பதில் சந்தேகமில்லை.

சிண்ட்ரெலாவின் விளையாட்டு பாணியிலும் அவரது வயதைக் கடந்து காணப்படும் முதிர்ச்சி கவனிக்கத்தக்கது. போட்டியின் தொடக்கத்தில் எதிராளியின் ஆட்டத்தைப் புரிந்துகொண்டு அதற்கேற்ப தனது யுக்தியை மாற்றிக்கொள்வது அவரது பலமாக பார்க்கப்படுகிறது. வேகமான பந்துகளை எதிர்கொள்வது, சரியான நேரத்தில் தாக்குதல் ஆட்டத்தை மேற்கொள்வது ஆகியவற்றிலும் அவர் சிறந்து விளங்குகிறார்.

சர்வதேச போட்டிகளில் கிடைக்கும் ஒவ்வொரு அனுபவமும் அவரது ஆட்டத்திறனை மேலும் மேம்படுத்தும். குறிப்பாக ஆசிய விளையாட்டுப்போட்டி போன்ற மிகப்பெரிய மேடையில் விளையாடுவது, எதிர்காலத்தில் நடைபெறவுள்ள உலக சாம்பியன்ஷிப் மற்றும் ஒலிம்பிக் போட்டிகளுக்கு அவரை தயார் படுத்தும். இளம் தலைமுறையினருக்கு அவர் ஒரு சிறந்த முன்மாதிரியாகவும் மாறி வருகிறார். இந்திய டேபிள் டென்னிஸ் இல் அடுத்த சில ஆண்டுகளில் அவரது பெயர் முக்கிய இடத்தைப் பிடிக்கும் என்ற எதிர்பார்ப்பும் அதிகரித்துள்ளது.

சிண்ட்ரெலா தாஸின் கதை திறமை மட்டுமல்ல; தொடர்ந்து முயற்சி செய்தால் இளம் வயதிலும் பெரிய மேடையை அடைய முடியும் என்பதற்கான உதாரணமாகும். 17 வயதில் இரண்டு தேசிய பட்டங்களை வென்றுள்ள அவர், ஆசிய விளையாட்டில் இந்தியாவுக்காக சிறப்பாக விளையாடி பதக்கம் வெல்லும் புதிய நம்பிக்கையாக உருவெடுத்துள்ளார். இந்திய டேபிள் டென்னிஸின் அடுத்த தலைமுறை நட்சத்திரமாக அவர் உயர்வாரா என்பதை காலம் சொல்லும்.