கே.எல். ராகுலுக்கு பதிலடி கொடுத்த விராட் கோலி…  திகைத்துப் போன மைதானம்!

ஐபிஎல் 2025 தொடரில் ராயல் சேலஞ்சர்ஸ் பெங்களூரு (RCB) அணி டெல்லி கேபிடல்ஸ் (DC) அணியை வீழ்த்தி தங்கள் முந்தைய தோல்விக்குப் பழிவாங்கியது. இந்தப் போட்டியில் விராட் கோலியின் சிறப்பான பேட்டிங் மட்டுமல்ல, ஆட்டம் முடிந்த பிறகு களத்தில் நடந்த ஒரு சுவாரஸ்யமான சம்பவமும் ரசிகர்களிடையே பேசுபொருளாகியுள்ளது. குறிப்பாக, டெல்லி கேபிடல்ஸ் வீரரும் சக இந்திய வீரருமான கே.எல். ராகுலின் முன்பு செய்த வைரல் கொண்டாட்டத்திற்கு விராட் கோலி கொடுத்த நையாண்டிப் பதில் அனைவரையும் கவர்ந்துள்ளது.

டெல்லியில் உள்ள அருண் ஜெட்லி மைதானத்தில் நடைபெற்ற இந்தப் போட்டியில், RCB அணி டெல்லி நிர்ணயித்த 163 ரன்கள் இலக்கை எளிதாக எட்டிப்பிடித்தது. விராட் கோலி 47 பந்துகளில் 51 ரன்கள் எடுத்து அணிக்கு வலுவான அடித்தளம் அமைத்தார். பின்னர் க்ருனால் பாண்டியா 47 பந்துகளில் ஆட்டமிழக்காமல் 73 ரன்கள் விளாசி வெற்றியை உறுதி செய்தார். இந்த வெற்றியின் மூலம் RCB அணி புள்ளிப் பட்டியலில் முதலிடத்திற்கு முன்னேறி தனது ப்ளேஆஃப் வாய்ப்பை வலுப்படுத்திக் கொண்டுள்ளது.

இதற்கு முன்பு பெங்களூருவில் நடைபெற்ற போட்டியில் RCB-யை வீழ்த்திய DC அணி வீரர் கே.எல். ராகுல், வெற்றிக்குப் பிறகு மைதானத்தின் நடுவே நின்று, "இது என்னுடைய மைதானம்" என்பதைப் போலக் கைகளை விரித்து ஒரு சைகை செய்து தனது மகிழ்ச்சியை வெளிப்படுத்தினார். இந்தச் செயல் அப்போது சமூக வலைத்தளங்களில் பெரும் விவாதத்தையும், RCB ரசிகர்கள் மத்தியில் ஒருவித ஏமாற்றத்தையும் ஏற்படுத்தியது.

இந்நிலையில், நேற்று டெல்லியில் RCB வெற்றி பெற்ற பிறகு, விராட் கோலி நேரடியாகக் கே.எல். ராகுலிடம் சென்று, முன்பு ராகுல் செய்த அதே "இது என்னுடைய மைதானம்" சைகையைச் செய்து காட்டினார். இந்த எதிர்பாராத நிகழ்வால் ராகுல் ஒரு கணம் திகைத்து, பின்னர் சிரித்துக்கொண்டே, அருண் ஜெட்லி மைதானத்தில் உள்ள 'விராட் கோலி பெவிலியனை' நோக்கிச் சைகை செய்து, "இது உங்கள் மைதானம்" என்பதைப் போலப் பதிலளித்தார்.

இந்தக் கலகலப்பான சம்பவத்திற்குப் பிறகு, இருவரும் ஒருவரை ஒருவர் கட்டியணைத்துச் சிரித்துப் பேசிக்கொண்டனர். போட்டி நடந்துகொண்டிருக்கும் போது இருவருக்கும் இடையே சற்று காரசாரமான உரையாடல் நடந்ததாகக் கூறப்பட்ட நிலையில், ஆட்டம் முடிந்ததும் இப்படி ஒரு நட்பான தருணம் அமைந்தது கிரிக்கெட் ரசிகர்களுக்குப் பெரும் மகிழ்ச்சியை அளித்தது.