இந்தியா - பாகிஸ்தான் கிரிக்கெட் மோதல்! நவம்பர் 22-ல் தோஹாவில் அனல் பறக்கும் ஆட்டம்..!

இந்தியா – பாகிஸ்தான் என்றாலே கிரிக்கெட் ரசிகர்களின் நாடித்துடிப்பு அதிகரித்துவிடும். இரு நாடுகளுக்கு இடையிலான கிரிக்கெட் போட்டிகள் அரிதாக நடைபெறும் சூழலில், இளம் வீரர்களைக் கொண்ட இரு அணிகளும் மோதவிருப்பது ரசிகர்களிடையே பெரும் எதிர்பார்ப்பை ஏற்படுத்தியுள்ளது. நவம்பர் 22-ம் தேதி கத்தாரின் தோஹாவில் உள்ள வெஸ்ட் எண்ட் பார்க் சர்வதேச கிரிக்கெட் மைதானத்தில் நடைபெறுகிறது.. நடைபெறவுள்ள இந்தப் போட்டியின் சிறப்புகளையும், இரு அணிகளின் பலத்தையும் விரிவாகப் பார்ப்போம்.

ஆசிய கிரிக்கெட் கவுன்சில் சார்பில் நடைபெறும் 2026-ம் ஆண்டுக்கான டிபி வேர்ல்ட் ஆசியக் கோப்பை ரைசிங் ஸ்டார்ஸ் கிரிக்கெட் தொடர் நவம்பர் 19 முதல் 29-ம் தேதி வரை கத்தாரில் நடைபெறுகிறது. எட்டு அணிகள் பங்கேற்கும் இந்தத் தொடர் 50 ஓவர் போட்டிகளாக நடைபெறுவது குறிப்பிடத்தக்கது.

இந்தியா ஏ அணிக்கு திலக் வர்மா கேப்டனாகவும், ரஜத் படிதார் துணைக் கேப்டனாகவும் நியமிக்கப்பட்டுள்ளனர். அதிரடி ஆட்டக்காரர்களான அபிஷேக் சர்மா, ரிங்கு சிங், இளம் வீரர் வைபவ் சூரியவன்ஷி ஆகியோர் அணியில் இடம்பெற்றிருப்பது கூடுதல் பலமாகக் கருதப்படுகிறது. பிரப்சிம்ரன் சிங், குமார் குஷாக்ரா ஆகியோரும் விக்கெட் கீப்பிங் பொறுப்புக்கு தேர்வு செய்யப்பட்டுள்ளனர்.

பந்துவீச்சைப் பொறுத்தவரை ஹர்ஷித் ராணா, பிரின்ஸ் யாதவ், அர்ஷத் கான் உள்ளிட்டோர் அணியில் இடம்பெற்றுள்ளனர். பேட்டிங், பந்துவீச்சு என இரு துறைகளிலும் இளம் திறமையாளர்களுக்கு வாய்ப்பு வழங்கப்பட்டுள்ளது.

மறுபுறம், பாகிஸ்தான் ஷஹீன்ஸ் அணிக்கு அப்துல் சமத் கேப்டனாக நியமிக்கப்பட்டுள்ளார். ஹசன் நவாஸ், ஹைதர் அலி, ஷமில் ஹுசைன், ரோஹைல் நசீர் உள்ளிட்டோர் அணியின் முக்கிய வீரர்களாக உள்ளனர். வேகப்பந்துவீச்சில் முகமது ஹஸ்னைன், அகமது டேனியல், அகிப் ஜாவேத் ஆகியோர் எதிரணிக்கு நெருக்கடி கொடுக்கத் தயாராக உள்ளனர். சுழற்பந்துவீச்சிலும் சுஃபியான் முகீம், சாத் மசூத் ஆகியோர் அணிக்கு வலுசேர்க்கின்றனர்.

இந்தத் தொடரில் பாகிஸ்தான் அணிக்கு ஒரு முக்கியமான பெருமையும் இருக்கிறது. 2023-ம் ஆண்டு நடைபெற்ற 50 ஓவர் ரைசிங் ஸ்டார்ஸ் இறுதிப்போட்டியில் இந்தியா ஏ அணியை 128 ரன்கள் வித்தியாசத்தில் வீழ்த்தி பாகிஸ்தான் கோப்பையை வென்றது. எனவே, இந்த முறை அந்த வெற்றியைத் தக்கவைத்துக் கொள்ளும் முனைப்புடன் களமிறங்குகிறது.

இந்தியா ஏ தனது முதல் போட்டியில் நவம்பர் 20-ம் தேதி நேபாளத்தையும், பாகிஸ்தான் அணி அதே நாளில் ஐக்கிய அரபு அமீரகத்தையும் சந்திக்கின்றன. நவம்பர் 22-ம் தேதி நடைபெறும் இந்தியா – பாகிஸ்தான் மோதல்தான் ரசிகர்களின் பிரதான எதிர்பார்ப்பாக உள்ளது. நவம்பர் 24-ம் தேதி இந்தியா ஏ, ஐக்கிய அரபு அமீரகத்தை எதிர்கொள்கிறது.

இரு பிரிவுகளிலும் முதல் இரண்டு இடங்களைப் பிடிக்கும் அணிகள் அரையிறுதிக்குத் தகுதி பெறும். நவம்பர் 26, 27 தேதிகளில் அரையிறுதிப் போட்டிகளும், நவம்பர் 29-ம் தேதி இறுதிப்போட்டியும் நடைபெறவுள்ளன.

இந்த போட்டியில் தனிநபர் சாதனைகளைக் காட்டிலும் அணியின் ஒருங்கிணைப்பும் இக்கட்டான நேரங்களில் வீரர்கள் வெளிப்படுத்தும் மன உறுதியும் வெற்றியைத் தீர்மானிக்கும்.. குறிப்பாக பவர் பிளே ஓவர்களில் விக்கெட்டுகளைப் பாதுகாத்தல், கடைசி ஓவர்களில் ரன்களைக் குவித்தல் என ஒவ்வொரு கட்டத்திலும் இரு அணிகளுக்கும் சவால்கள் காத்திருக்கின்றன.. இளம் வீரர்களுக்கு இது தங்களது சர்வதேச கிரிக்கெட் கனவை நோக்கி முன்னேறுவதற்கான முக்கியமான மேடையாகவும் அமையும்..

இளம் வீரர்களின் திறமை, அணிகளின் வியூகம், வெற்றிக்கான வேகம் எனப் பல சுவாரஸ்யங்களைக் கொண்ட இந்தப் போட்டியில் யார் ஆதிக்கம் செலுத்தப் போகிறார்கள்? தோஹாவில் இந்தியாவின் வெற்றிக்கொடி உயருமா? கிரிக்கெட் ரசிகர்களின் எதிர்பார்ப்பு இப்போதே எகிறத் தொடங்கிவிட்டது! பாகிஸ்தான்னுக்கு எதிரான வெற்றி அடுத்தடுத்த போட்டிகளுக்கான இந்திய அணியின் தன்னம்பிக்கையை மேலும் அதிகரிக்கும் என்பதில் சந்தேகமில்லை.