RCB-ஐ தொடர்ந்து விற்பனைக்கு வரும் மற்றொரு ஐபிஎல் அணி..! எந்த அணி தெரியுமா ?

ஆண்டுதோறும் ஐ.பி.எல் கிரிக்கெட் போட்டி மார்ச் மாதத்தில் தொடங்கி நடைபெறும். அந்த வகையில் 19-வது ஐ.பி.எல் கிரிக்கெட் போட்டி தொடங்க இன்னும் 6 மாதங்களே உள்ளது. 2026-ல் ஐபிஎல் தொடருக்கான மினி ஏலம் வரும் டிசம்பர் 16-ம்தேதி அபுதாபியில் நடைபெற உள்ள நிலையில், ஐபிஎல் அணிகள் தக்கவைத்துள்ள மற்றும் விடுத்துள்ள வீரர்களின் பட்டியல் சமீபத்தில் வெளியிடப்பட்டது.

இந்நிலையில், அடுத்த ஐபிஎல் தொடருக்கு முன்னர் 2 ஐபிஎல் அணிகள் விற்பனைக்கு வர உள்ளதாக தகவல் வெளியாகியுள்ளது. அதாவது, நடப்பு சாம்பியனான ராயல் சேலஞ்சர்ஸ் பெங்களூரு அணியை விற்பனை செய்ய உள்ளதாக அந்த அணியின் உரிமையாளர் டியாஜியோ நிறுவனம் உறுதிப்படுத்தியுள்ள நிலையில், தற்போது மற்றொரு ஐபிஎல் அணியும் விற்பனைக்கு வந்துள்ளதாக தகவல்கள் வெளியாகி கிரிக்கெட் உலகில் பரபரப்பை ஏற்படுத்தி உள்ளது.

லக்னோ சூப்பர் ஜெயண்ட்ஸ் அணியின் உரிமையாளர் சஞ்சீவ் கோயங்காவின் சகோதரர்தான் இந்த பேச்சை தொடங்கி வைத்து பரபரப்பை ஏற்படுத்தி உள்ளார். அவர் தனது எக்ஸ் பக்கத்தில், ஒன்றல்ல, இரண்டு ஐபிஎல் அணிகள் இப்போது விற்பனைக்கு வர உள்ளதாக கேள்விப்பட்டேன். ஒன்று ஆர்சிபி(RCB). மற்றொன்று ராஜஸ்தான் ராயல்ஸ் (RR). தங்களிடம் உள்ள உயர்ந்த மதிப்பீட்டை பணமாக்க விரும்புகிறார்கள் என பதிவிட்டுள்ளார்.

ராஜஸ்தான் அணியின் 65 சதவீத பங்குகளை ராயல்ஸ் ஸ்போர்ட்ஸ் குழுமம் வைத்துள்ளது. ரெட்பேர்ட் கேபிடல் பார்ட்னர்ஸ் 15 சதவீத பங்குகளையும், லாச்லன் முர்டோக் சிறிய அளவிலான பங்குகளை வைத்துள்ளது.

2008-ம் ஆண்டு ஐபிஎல் தொடரில் மட்டும் கோப்பை வென்ற ராஜஸ்தான் ராயல்ஸ் அணி, இந்தாண்டு (2025) ஐபிஎல் தொடரில், 9-வது இடத்தை பிடித்திருந்தது.

ஆனால் விற்பனை தொடர்பாக, ராஜஸ்தான் ராயல்ஸ் அணி நிர்வாகம் எந்த அதிகாரபூர்வமான கருத்தையும் இதுவரை தெரிவிக்கவில்லை என்பது குறிப்பிடத்தக்கது.

ராயல் சேலஞ்சர்ஸ் பெங்களூரு அணியை விற்க அந்த அணியின் உரிமையாளர் முடிவெடுத்து அதற்கான பேச்சுவார்த்தைகள் சென்றுகொண்டிருப்பதாக கூறப்படும் நிலையில் அந்த அணியின் பிராண்ட் மதிப்பு ரூ.1,305.84 கோடியாக உள்ளது. RCB அணியை ரூ.17 ஆயிரம் கோடிக்கு விற்க முயற்சி செய்வதாக கூறப்படும் நிலையில், இந்த அணியை வாங்க ஆதார் பூனாவாலா, நிகில் காமத், ஹோம்பாலே பிலிம்ஸ், அதானி குழுமம் ஆகியோர் வாங்க ஆர்வம் காட்டி வருவது குறிப்பிடத்தக்கது.