ஆரவாரம் இல்லாமல் அமைதியாக நடந்த செஸ் ஜாம்பவான் திருமணம்

செஸ் உலகின் ராஜாவாக திகழும் மாக்னஸ் கார்ல்செனின் (நார்வே) வாழ்க்கை கட்டத்தில் புதிதாக ராணி இணைந்துள்ளார்.

5 முறை உலக செஸ் சாம்பியனும், ‘நம்பர் ஒன்’ வீரருமான 34 வயதான கார்ல்சென், சக நாட்டைச் சேர்ந்த 26 வயதான எலா விக்டோரியா மலோனை திருமணம் செய்து கொண்டார்.

நார்வே தலைநகர் ஒஸ்லோவில் அவர்களின் திருமணம் நடந்து முடிந்துள்ளது. Holmenkollen Chapel தேவாலயத்தில் நடைபெற்ற இந்த திருமணத்தில், குடும்பத்தினர் மற்றும் நெருங்கிய நண்பர்கள் கலந்து கொண்டனர். 

chess. comஇன் படி, திருமணத்தில் நார்வே நாட்டு செஸ் வீரர்கள் ஜோஹன்னஸ் க்விஸ்லா மற்றும் அஸ்கில்ட் பிரைன், ஜிஎம் பீட்டர் ஹெய்ன் நீல்சன் மற்றும் ஜிஎம் ஜான் லுட்விக் ஹேமர் ஆகியோர் கலந்து கொண்டனர். மேலும் திருமணத்தின் போது நெட்பிளிக்ஸ் படக்குழுவினரும் உடன் இருந்ததாக தகவல் வெளியாகியுள்ளது.

பின்னர் 5 நட்சத்திர கிராண்ட் ஹோட்டலில் கார்ல்சன் - மலோன் திருமண வரவேற்பு நடந்தது. கடந்த ஆண்டு ஜெர்மனியில் நடந்த ஃப்ரீஸ்டைல் செஸ் சேலஞ்சர் நிகழ்வின் போது இவர்கள் காதலை வெளிப்படுத்தினர். அதன்பின் பல்வேறு நிகழ்வுகளில் இவர்கள் ஜோடியாக காணப்பட்டனர். கார்ல்சனின் செஸ் போட்டிகளின் போது அவருக்கு மலோன் ஆதரவளிப்பதை பார்க்க முடிந்தது.

இல்வாழ்க்கையில் சங்கமித்த அவருக்கு செஸ் வீரர்கள் மற்றும் உலகம் முழுவதில் உள்ள அவரது ரசிகர்கள் சமூக வலைதளம் மூலம் வாழ்த்து கூறி வருகிறார்கள்.

வரலாற்றில் மிகச்சிறந்த செஸ் வீரர்களில் ஒருவராக பரவலாகக் கருதப்படும் கார்ல்சன், ஐந்து உலக செஸ் சாம்பியன்ஷிப் பட்டங்கள் உட்பட ஏராளமான அங்கீகாரங்களைப் பெற்றுள்ளார்.

கடந்த 2004-ல் தனது 13-வது வயதில் கிராண்ட் மாஸ்டர் ஆன கார்ல்சன், 2011-ல் முதன் முறையாக செஸ் போட்டிகளில் உலகின் நம்பர் ஒன் இடத்தைக் கைப்பற்றினார்.

தனது 20 வயதில் இவ்வளவு பெரிய சாதனையைப் படைத்த அவர், நம்பர் ஒன் இடத்தை இன்னும் வேறு யாருக்கும் விட்டுக் கொடுக்கவில்லை. அதாவது கிட்டத்தட்ட12 ஆண்டுகள் தொடர்ந்து முதல் இடத்தை தக்க வைத்து, செஸ் உலகின் முடிசூடா மன்னனாக வலம் வந்து கொண்டிருக்கிறார் கார்ல்சன்.

அத்துடன், 2020 அக்டோபர் வரை, தொடர்ந்து 125 போட்டிகளில் தோற்காத வீரர் என்ற சாதனைக்கு சொந்தக்காரராகவும் விளங்குகிறார்.

கார்ல்சென் தொடர்ச்சியாக 5 முறை (2013,2014, 2016, 2018, 2021)உலக சாம்பியன் பட்டம் வென்றுள்ளார். 8 முறை உலக செஸ் பிளிட்ஸின் சாம்பியன் பட்டம் (2009, 2014, 2017, 2018, 2019, 2022, 2023, 2024) பெற்றவராக இருப்பது குறிப்பிடத்தக்கது.